ހެރީ ޕޮޓަރގެ އެކްޓަރ، ރޮބީ ކޮލްޓްރޭން މަރުވެއްޖެ

މަޝްހޫރު ފިލްމް ސީރީޒް "ހެރީ ޕޮޓަރ"ގައި ހޮގްވާޓްސްގެ ގޭމްކީޕަރ ހެގްރިޑްގެ ރޯލު ކުޅެފައިވާ ރޮބީ ކޮލްޓްރޭން މަރުވެއްޖެއެވެ.

އުމުރުން 72 އަހަރުގައި އޭނާ މަރުވެފައިވާކަމަށް ރޮބީގެ އެޖެންޓް ވަނީ ބުނެފައެވެ. ރޮބީ 40 އަހަރަށްވުރެ ގިނަ އަހަރު ހޮލީވުޑްގައި ހަރަކާތްތެރިވެފައިވާއިރު އޭނާގެ ފާހަގަކޮށްލެވޭ ރޯލުތަކުގެ ތެރޭގައި، ޖޭމްސް ބޮންޑްގެ ފިލްމުތަކާއި "ދަ ވޯރލްޑް އިޒް ނޮޓް އިނަފް"އާއި ބްރިޓިޝް ސީރިޒްއެއް ކަމުގައިވާ "ކްރެކާ"ގައި ކުޅެފައިވާ ރޯލު ހިމެނެއެވެ.

ރޮބީގެ މަރާގުޅޭ ތަފްސީލެއް ހާމަކޮށްފައެއްނުވެއެވެ. ނަމަވެސް ސްކޮޓްލެންޑުގެ ހޮސްޕިޓަލެއްގައި އޭނާއަށް ފަރުވާ ދިންކަމަށާއި އެ ހޮސްޕިޓަލަށް ރޮބީގެ އާއިލާއިން ޝުކުރުއަދާކުރި ކަމަށް އޭނާގެ އެޖެންޓް ބުންޏެވެ.

ރޮބީ މުނިފޫހިފިލުވުމުގެ ދާއިރާއަށް ކޮށްދިން ޚިދުމަތްތަކަށްޓަކައި އޭނާއަށް ވަނީ އިނގިރޭސި ރާނީ ދެއްވާ "ދަ މޯސްޓް އެކްސެލެންޓް އޯޑަރ އޮފް ދަ ބްރިޓިޝް އެމްޕަޔަރ (އޯބީއީ)"ގެ ޝަރަފު 2006 ވަނަ އަހަރު ލިބިފައެވެ. އަދި 2011 ވަނަ އަހަރު ރޮބީއަށް ވަނީ ސްކޮޓްލެންޑުގައި ފިލްމީ ދާއިރާގެ ހުނަރުވެރިން ފާހަގަކޮށް، ދޭ "ބަފްޓާ ސްކޮޓްލެންޑް އެވޯޑް" ވެސް ލިބިފައެވެ.