ޕްރިންސް ހެރީ އާއި އަނބިކަނބަލުން މޭގަން އިނގިރޭސި ޝާހީ އާއިލާގެ "އެތެރޭގެ" ވާހަކަތަކެއް ހާމަކަން ބޮޑުގޮތެއްގައި އޮޕްރާ ވިންފްރީގެ އިންޓަރވިއުގައި ވިދާޅުވުމާއެކު އެދެބޭފުޅުންނަށް އިނގިރޭސިވިލާތުގައި އޮތް މަގްބޫލުކަން މިއިން ދުވަހަކުވެސް ދަށަށްނުދާ މިންވަރަށް ދަށަށްގޮސްފިއެވެ.
މިދިޔަ އާދިއްތަ ދުވަހު އެއަރކޮށްފައިވާ އެއިންޓަރވިއުގައި މޭގަން ވަނީ ޝާހީ އާއިލާ ތެރޭގައި އޭނާ އާ މެދު ކަންތައް ކުރެވުމެންދިޔަ ގޮތުން އަމިއްލައަށް މަރުވާން ހިތަށް އެރިކަމަށް ވިދާޅުވެފައެވެ. އަދި ދަރިކަލުންގެ ކުލަ އާ މެދު ޝާހީ އާއިލާގެ ބޭފުޅަކު ދެއްކެވި ވާހަކަތަކެއް މޭގަން ވަނީ ތިލަކުރައްވާފައެވެ.
ޝާހީ އާއިލާގެ ޑިޔުޓީތަކުން ރަސްމީކޮށް ވަކިވެވަޑައިގެން ދެ ބޭފުޅުން ތިއްބެވިއިރު ޝާހީ އާއިލާގެ އެތެރޭގެ މިފަދަ ވާހަކަތަކެއް ދެއްކެވެމުން ޝާހީ އާއިލާއަށް ވަނީ މިއިން ދުވަހަކު ނާންނަވަރުގެ ގުޑުމެއް އައިސްފައެވެ. ހާހަކަށްވުރެ ގިނަ ދުވަސްވީ މި ރަސްކަމުގެ ދަރުބާރަށް ވަނީ މިއިން ދުވަހަކު ކުރިމަތިނުވާ މިންވަރުގެ ކަންތައްތަކެއް ކުރިމަތިކުރުވާފައެވެ.
އިންޓަރވިއުއަށްފަހު އިނގިރޭސިވިލާތުގައި ނެގިގެންދިޔަ ޕޯލުތަކަށް ބަލާއިރު ސުވާލުކުރެވުނު 1664 މީހުންގެ ތެރެއިން 48 އިންސައްތަ މީހުންގެ މެދުގައި ހެރީއާ މެދު ވަނީ ނުރަނގަޅު ތަސައްވުރެއް އުފެދިފައެވެ. ހެރީ އަކީ ރަނގަޅު މީހެއްގެ ގޮތުގައި ނުވަތަ ތާޢީދުކުރެވޭ ބޭފުޅެއްކަމަށް ބުނެފައިވަނީ 45 އިންސައްތަ މީހުންނެވެ. މިއީ މިއިން ދުވަހަކުވެސް ހެރީގެ މަގްބޫލުކަން ދަށަށް ނުދާ މިންވަރެކެވެ. އަދި މިއީ އޭގެ ކުރީ ހަފްތާ އާ އަޅާބަލާއިރު 15 ޕޮއިންޓް ދަށް އަދަދެއްވެސްމެއެވެ.
އަނެއްކޮޅުން އަނބިކަނބަލުން މޭގަންއަށް އޮތް ތާއީދު ވަނީ ވަރަށް ބޮޑަށް ދަށްވެފައެވެ. އެގޮތުން މޭގަން އާމެދު ރަނގަޅު ގޮތަކަށް ދެކޭކަމަށް ބުނެފައިވަނީ ސުވާލުކުރި ކޮންމެ ދިހަ މީހަކުން ތިން މީހުންނެވެ. 58 އިންސައްތަ މީހުންނަށް މޭގަން މިހާރު ކަމަކުނުދެއެވެ.
މިޕޯލަށް ބަލާލާއިރު އެކި އުމުރު ފުރާތަކުގެ މެދުގައި ފަރަގުތަކެއް ހުރިކަން ވަނީ ފާހަގަވެފައެވެ. އެގޮތުން އުމުރުން 18 އަހަރާއި 24 އަހަރުގެ މީހުންގެ މެދުގައި ހެރީ އާއި މޭގަންގެ މަގްބޫލުކަން އަދިވެސް ބޮޑެވެ. ނަމަވެސް އުމުރުން 65 އަހަރުން މަތީގެ މީހުންގެ މެދުގައި އެދެމީހުންގެ މަގްބޫލުކަން ވަނީ ކުޑަވެފައެވެ.
ޝާހީ އާއިލާގެ ތެރެއިން ދެން މަގްބޫލުކަން ކުޑަވެފައިވަނީ ހެރީގެ ބައްޕާފުޅު ޕްރިންސް ޗަރލްސްގެއެވެ. ސަރވޭގައި ސުވާލުކުރި މީހުންގެ ތެރެއިން 42 އިންސައްތަ މީހުންގެ މެދުގައި ޗާލްސްގެ މަގުބޫލުކަން ވަނީ ކުޑަވެފައެވެ.
ސަރވޭގައި ސުވާލުކުރި މީހުންގެ މެދުގައި އެންމެ ބޮޑު މަގުބޫލުކަމެއް ހޯއްދަވާފައިވަނީ އުމުރުން ފުޅުން 94 އަހަރުގެ ރާނީ އެވެ. ސަރވޭގައި ސުވާލުކުރި މީހުންގެ ތެރެއިން 80 އިންސައްތަ މީހުންނަށް ރާނީ ރަނގަޅެވެ. ރާނީއަށް ފަހު ދެން އާންމުންގެ މެދުގައި މަގްބޫލު ބޭފުޅުންނަކީ ހެރީގެ ބޭބެކަމުގައިވާ ޕްރިންސް ވިލިއަމް އަދި އަނބިކަނބަލުން ކޭޓްއެވެ.
މީގެއިތުރުން މިސަރވޭއިން ހާމަވެފައިވާ އަނެއްކަމަކީ ޒުވާނުންގެ މެދުގައި ރަސްކަމަކަށްވުރެ ރައްޔިތުން ހޮވާ މީހަކު ހުންނަންޖެހޭކަމަށް ގަބޫލުކުރާ ގަބޫލުކުރުން އިތުރުވަމުންދިޔުމެވެ. އެގޮތުން 42 އިންސައްތަ ޒުވާނުން ގަބޫލުކުރަނީ ރައްޔިތުން އިންތިޚާބުކުރާ މީހަކު ސްޓޭޓްގެ ހެޑްކަމުގައި ހުންނަންޖެހޭނެކަމަށެވެ.
