ޝާކިރު، ޔޫތު މުބާރާތްތަކުގައި ރާއްޖޭގެ އެންމެ ކާމިޔާބު ކޯޗު

ކުލަބު އީގަލްސް ޓީމުގެ ހަލުވި ފޯވަޑެއްގެ ގޮތުގައި ފެނިގެންދިޔަ އަހުމަދު ޝާކިރު (ޝާކިއްޓޭ) އަކީ ރާއްޖޭގައި މިވަގުތުތިބި ޒުވާން ކޯޗުންގެ ތެރޭގައި ހުރި އެންމެ ކާމިޔާބު ކޯޗެވެ. އޭނާގެ ބެލުމުގެ ދަށުން ކްލަބް އީގަލްސް ޔޫތު ޗެމްޕިއަންޝިޕް ފުޓްބޯޅަ މުބާރާތް މިލްކުކުރީ އެހެން ޓީމަކަށް އަރާހަމަކުރުމަށް ކުޑަވެސް ފުރުސަތެއް ދިނުމެއްނެތިއެވެ.

ކުޅުންތެރިއެއްގެ ޖާޒީގައި ގޯލާ ރައްޓެހި ފޯވަޑެއްގެ ގޮތުގައި ފާހަގަ ކުރެވުނު ޝާކިރު ދަނީ ކޯޗެއްގެ ޖާޒީގައި ވެސް އޭނާގެ ހުށިހާރުކަން ސާބިތުކޮށްދެމުންނެވެ. އުނގެނެމުން، ކޯޗުކޮށްދެމުން، ޒަމާނާގުޅޭ ވައްޓަފާޅިއާ އެއްގޮތަށް ފުޓްބޯޅަ ޓެކްނިކަލް މަސައްކަތްތައް ބައްޓަންކުރަމުން ނަމޫނާ ދައްކަމުންނެވެ. އެދުރުންނާއި އަންނަމުންދާ ޒުވާން ޖީލަށް އޭނާގެ ބޭނުންތެރިކަން ސާބިތުކޮށްދެމުންނެވެ. މުބާރާތްތައް ރާވައި ހިންގައި ޓެކްނިކަލް އެނާލިސިސް ހެދުމަކީ އޭނާ ވަރަށް ގަޔާވެގެން ކުރާ މަސައްކަތެކެވެ.

ޝާކިރުގެ ހިދުމަތް އެންމެ ބޮޑަށް ލިބެމުންދަނީ ރާއްޖޭގެ ޒުވާން ޖީލަށެވެ. ކުލަބުގެ ލެވެލްގެ އިތުރުން ގައުމީ ޓީމުތަކަށެވެ. އޭނާގެ ބެލުމުގެ ދަށުން ޒުވާން އުމުރުފުރާގެ ގިނަ ޓީމުތަކެއް ވަނީ މުބާރާތްތަކުގައި ވާދަކޮށް ރަނގަޅު ނަތީޖާތަކެއް ހާސިލްކޮށްފައެވެ. ކުރުކޮށް ބުނާނަމަ އޭނާއަކީ މީގެ 10ވަރަކަށް އަހަރު ފަހުން މިއަދު ޒުވާން ޖީލުގެ ކޮންމެ ކުޅުންތެރިއަކުވެސް ޝުކުރުވެރިކަމާއެކު ފާހަގަކުރާނެ މުހިންމު ނަމަކަށްވާނެފަދަ އަގުހުރި މަސައްކަތްތަކެއް ކުރަމުންދާ ކޯޗެކެވެ.

ގައުމީ ފުޓްބޯޅަ ޓީމާއެކު ސަރައްހައްދީ މެޑެއްޔެއް ހާސިލްކުރުމަކީ ކޮންމެ ކުޅުންތެރިއަކާއި ކޯޗަކު ވެސް ދެކޭ ހުވަފަނެކެވެ. އެކަމަކު އެކަން ހާސިލްވި މަދު ކޯޗުންގެ ތެރެއިން އޭނާގެ ނަމަކީ މުހިންމު ނަމެކެވެ. 2018 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ދިވެހި ގައުމީ ޓީމުގެ ފަހުރުވެރި އެސިސްޓެންޓް ކޯޗަކީވެސް ޝާކިރެވެ.