97 އަހަރުފުޅުގައި ޑރ މަހާތީރު ހުންނެވީ ގޮނޑީގެ އިންތިޒާރުގަ!

ޚިޔާނާތުން ކިލަނބުވެފައިވާ އޭނާގެ ޕާޓީއަށް، ކުރިއަށް އޮތް އާންމު އިންތިޚާބުގައި ކާމިޔާބު ލިބިއްޖެ ކަމުގައި ވާ ނަމަ، ޝާހީ ޢަފޫއާންމެއްގެ ދަށުން، މެލޭޝިއާގެ ކުރީގެ ބޮޑުވަޒީރު ނަޖީބު ރައްޒާޤު މިނިވަންވުން ގާތް ކަމަށް، މެލޭޝިއާގެ ސިޔާސީ މައިދާނުގެ ތަޖުރިބާކާރު ޝަހްސު އަދި އިދިކޮޅު ލީޑަރު ޑރ މަހާތީރު މުޙައްމަދު ލަފާ ކުރައްވައިފިއެވެ.

ވަން މެލޭޝިއާ ޑިވަލޮޕްމަންޓް ބަރހާޑް (1އެމްޑީބީ) ދައުލަތުގެ ފަންޑުން އެތައް ބިލިއަން ޑޮލަރެއް ލޫޓުވާލި މައްސަލައިގެ ތުހުމަތުގައި ނަޖީބާ ދެކޮޅަށް އުފުލާފައިވާ ގިނަ ދަޢުވާތަކެއްގެ ތެރެއިން ފުރަތަމަ މައްސަލާގައި އޭނާގެ މައްޗަށް ކުށް ސާބިތުކޮށް، 12 އަހަރުގެ ޖަލު ހުކެމެއް ނަޖީބުގެ މައްޗަށް އިއްވާ، ތަންފީޒު ކުރަން ފެށީ މިދިޔަ އޯގަސްޓް މަހުގެ ތެރޭގައެވެ.

ޔުނައިޓަޑް މެލޭޒް ނޭޝަނަލް އޯގަނައިޒޭޝަން (އުމްނޯ)ގެ ރައީސް އަޙްމަދު ޒާހިދު ޙަމީދީއާ ދެކޮޅަށްވެސް ޚިޔާނާތުގެ 47 މައްސަލައެއްގެ ދަޢުވާ އަމާޒުވާ އިރު، އެ މައްސަލަވެސް ނުބަލާ ދޫކޮށްލާނެ ކަމަށް، ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޑރ މަހާތީރު ވަނީ ލަފާ ކުރައްވާފައެވެ.

މެލޭޝިއާގެ ބޮޑުވަޒީރު އިސްމާއީލު ޞަބްރީ ޔަޢުޤޫބު، އެ ޤައުމުގެ ޤާނޫނު ހަދާ މަޖިލީސް އުވާލައްވާ، އަވަސް އިންތިޚާބަކަށް ގޮވާލެއްވީ، އޮކްޓޯބަރު 10 ވަނަ ދުވަހުއެވެ. ސަބަބެއް ކަމުގައިވީ ވެރިކަން ކުރާ އުމްނޯ ޕާޓީގައި އުފެދިފައިވާ ފެކްޝަންތަކާއެކު ޕްރެޝަރު ބޮޑުވުމެވެ. އުމްނޯއިން އޮތީ ނަޖީބުގެ އިތުރުން، ކޮރަޕްޝަންގެ އިތުރު ދަޢުވާތައް އަމާޒުވެފައިވާ އެތައް ބައެއްގެ ދިފާޢުގައެވެ.

ޢުމުރުފުޅުން 97 އަހަރުގެ ޑރ މަހާތީރު ވަނީ ޤާނޫނު ހަދާ މަޖިލީހުގައި އޭނާގެ ގޮނޑި ދިފާޢު ކުރައްވާނެ ކަމަށް ވިދާޅުވެފައެވެ.

އުމްނޯ ބަލިކޮށްލާ ކޮންމެ ބަޔަކާއެކުގައިވެސް މަސައްކަތް ކުރައްވަން ތައްޔާރު ކަމަށްވެސް ޑރ ޑރ މަހާތީރު ވަނީ ވިދާޅުވެފައެވެ. ކަން މިހެން އޮތް އިރު، އުމްނޯއިން ދަނީ ކުރިއަށް އޮތް އާންމު އިންތިޚާބު ކަށަވަރު ކުރުމަށް މަސައްކަތްތަކެއް ކުރަމުންނެވެ. އަދި ކޯލިޝަނަކާ ނުލާ، ސަރުކާރު އެކުލަވާލުމަށްވެސް އުމްނޯއިން ވަނީ އަމާޒު ހިފާފައި  ކަމަށް ޚަބަރު ލިބެއެވެ.