ކުޅިވަރުގެ ރޫޙާއި ޚިލާފަށް އަމަލުކޮށްފައިވާތީ ސެލްޓިކް, ސެވިއްޔާ އަދި ބޮރޫޝިޔާ ޑޯޓްމަންޑް ޔުއެފާއިން ޖޫރިމަނާ ކޮށްފިއެވެ.

ޔުއެފާއިން ސެލްޓިކް ޖޫރިމަނާކުރީ ޝަޚްތަރު ޑޮނެސްކާއި ދެކޮޅަށް ކުޅުނު މެޗުގައި އެޓީމުގެ ސަޕޯޓަރުން ދަމާފައިވާ ބެނާއެއްގެ ސަބަބުންނެވެ. ކުއީން އެލިޒަބަތު މަރުވިތާ ހަފްތާއެއް ފަހުން ކުޅުނު މި މެޗުގައި ސެލްޓިކްގެ ސަޕޯޓަރުން ދަމާފައިވާ ބެނާއަކީ ކުޅިވަރުގެ ރޫޙާއި ޚިލާފު ބެނާއެއްކަމަށް ޔުއެފާއިން ވަނީ ނިންމާފައެވެ. އަދި މިކަމާއި ގުޅިގެން ސެލްޓިކް ވަނީ 15,000 ޔޫރޯއިން ޖޫރިމަނާ ކޮށްފައެވެ.

ޔުއެފާއިން ސެވިއްޔާ ޖޫރިމަނާކުރީ މެންޗެސްޓަރ ސިޓީ އާއި ސެވިއްޔާ ބައްދަލުކުރި މެޗުގެ ކުރިން ސެވިއްޔާގެ ސަޕޯޓަރުން ސިޓީގެ ކުޅުންތެރިން ދަތުރުކުރާ ބަހަށް ދިން ހަމަލާއަކާއި ގުޅިގެންނެވެ. ސެވިއްޔާގެ ސަޕޯޓަރުން ވަނީ ސިޓީގެ ބަހުގެ ކުޑަ ދޮރެއް ތަޅާލާފައެވެ. މިކަމާއި ގުޅިގެން ޔުއެފާއިން ވަނީ 5,000 ޕައުންޑުން ސެވިއްޔާ ޖޫރިމަނާކޮށްފައެވެ. އަދި 30 ދުވަހުގެ ތެރޭގައި މި ސިޓީއަށް ލިބުނު ގެއްލުމުގެ ބަދަލު ދިނުމަށްވެސް ޔުއެފާއިން ސެވިއްޔާއަށް އަންގާފައިވެއެވެ.

ޑޯޓްމަންޑް ޖޫރިމަނާކުރީވެސް ހަމަ މިފަދަ ގެއްލުމެއް ޑޯޓްމަންޑުގެ ސަޕޯޓަރުން ސިޓީގެ ކުޅުންތެރިން ދަތުރުކުރާ ބަހަށް ދިނުމުންނެވެ. ޑޯޓްމަންޑުވެސް ޖޫރިމަނާކޮށްފައިވަނީ 5,000 ޔޫރޯއިންނެވެ. އަދި ސިޓީއަށް ލިބުނު ގެއްލުމުގެ ބަދަލު 30 ދުވަހުގެ ތެރޭގައި ދެއްކުމަށް ޔުއެފާއިން އަންގާފައިވެއެވެ.