ނަފްސާނީ ސިއްހަތުގެ ދާއިރާއިން ކުރިއަށްދިއުމުގެ ފުރުސަތު ދިވެހިންނަށް އެބައޮތް: ފަޒްނާ
ނަފްސާނީ ސިއްހަތުގެ ދާއިރާއިން ކުރިއަށް ދިއުމަށް އެކަމަނާ ހިތްވަރު ދެއްވި
ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު
ނަފްސާނީ ސިއްހަތުގެ ދާއިރާއަކީ، ދިވެހިންނަށް ކުރިއަށް ދިއުމަށް ފުރުސަތު އޮތް ދާއިރާއެއް ކަމަށާއި، އެ ދާއިރާއިން ދިވެހި ދަރިވަރުން ކުރިއަށް ދިއުމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު އެދިވަޑަައިގަންނަވައިފިއެވެ.
އެކަމަނާ މިހެން ވިދާޅުވީ، ދިވެހިރާއްޖޭގެ ޤައުމީ ޔުނިވަރސިޓީގެ، ފެކަލްޓީ އޮފް ހެލްތް ސައިންސަސް އިން ހިންގި "ޕިއަރ ސަޕޯޓް ސްކޮޑް" ތަމްރީން ޕްރޮގްރާމް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ހޯމަ ދުވަހު ބޭއްވި މި ރަސްމިއްޔާތުގައި ފަޒްނާ ވަނީ ރާއްޖޭގައި ނަފްސާނީ ސިއްހަތުގެ ދާއިރާއިން ކުރެވޭ މަސައްކަތްތަކުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ.
ފަޒްނާ ވަނީ ނަފްސާނީ ސިއްހަތުގެ ދާއިރާއިން ހުރި ވަޒީފާގެ ފުރުސަތުތަކާއި އެއްވަރަށް ދިވެހިން ނުލިބޭކަން ފާހަގަކުރައްވާފައެވެ. އެކަމަނާ ވިދާޅުވިގޮތުގައި ސައިކޮލޮޖިސްޓުންގެ ވަޒީފާ އަދާކުރާނެ ދިވެހިން ވަރަށް ބޮޑަށް ބޭނުންވެފައިވާ މި ދަނޑިވަޅުގައި، ތަމްރީންތައް ނިންމާ ދަރިވަރުން ދާއިރާގައި މަސައްކަތް ކުރެއްވުން މުހިންމު ކަމަށެވެ. ސަބަބަކީ ނަފްސާނީ ބަލި ތަހައްމަލް ކުރާ މީހާ އިތުރު ތަރުޖަމާނެއް މެދުވެރިނުކޮށް ސީދާ ޑޮކްޓަރާ ވާހަކަދެއްކުމަށް ބޭނުންވާނެތީކަމުގައި އެކަމަނާ ފާހަގަކުރެއްވިއެވެެ.
މީގެ އިތުރުން ވެސް ސައިކޮލޮޖީގެ ދާއިރާއިން ކިޔަވާ ދަރިވަރުން ވެސް ޑިގްރީއާ ހަމައިން ކިޔެވުން ނިންމާނުލައި، މި ދާއިރާއިން މާސްޓަރސް ފެންވަރަށް ކިޔެވުމަށާއި، ލައިސަންސް ނެގުމުގައި ގޮންޖެހުންތައް ހުރި ނަމަވެސް ދަރިވަރުން ހިތްވަރުކޮށްގެން ވެސް ލައިސަންސް ނެގުމަށް ފަޒްނާ ބާރުއެޅުއްވިއެވެ.
ފަޒްނާގެ ވާހަކަފުޅުގައި ވަނީ، ނަފްސާނީ ސިއްހީ އެހީތެރިކަން ފޯރުކޮށް ދިނުމުގައި އެކަން ކުރެވޭނެ ހަމައެކަނި ބަޔަކީ، ސައިކޮލޮޖިސްޓުން ނޫން ކަމަށާއި، ޚިދުމަތް ހޯދަން މަރުކަޒަކަށް އަންނަ ފަރާތްތަކާ އެންމެ ފުރަތަމަ ބައްދަލުވާ މީހުންގެ ފަރާތުންވެސް އޯގާތެރިކަމާއި އަޅާލުން ބޭނުންވާނެ ކަމުގައި ވިދާޅުވެފައެވެ. އެގޮތުން، ކޮންމެ ކަމެއްވެސް ފެށިގެން އަންނަނީ ގޭތެރެއިން ކަމަށާއި، އެހެން ނަމަވެސް މިހާރު މުޖުތަމައުގެ ކަންތައްތައް ހުރި ގޮތުން، ބައެއް ފަހަރަށް ގޭގައި ނަފްސާނީ ބަލީގެ މީހުންނަށް އެކަށީގެންވާ މާހައުލެއް ނޯންނަ ކަމުގައި އެކަމަނާ ވިދާޅުވިއެވެ. އެހެންވެ، ނަފްސާނީ ދުޅަހެޔޮކަމަށް މަސައްކަތް ކޮށްދޭނެ ފަރާތްތަކެއްގެ ބޭނުންތެރިކަން ބޮޑުކަމަށާއި، ފެކަލްޓީ އޮފް ހެލްތް ސައިންސަސް އިން ކުރަމުންގެންދާ މަސައްކަތްތަކަކީ މުހިންމު މަސައްކަތެއް ކަމުގައި އެކަމަނާ ފާހަގަކުރެއްވިއެވެ.
އެކަމަނާގެ ވާހަކަފުޅު ނިންމަވާލެއްވީ، އޯގާތެރި މުޖުތަމައެއް ބިނާކުރެއްވުމަށް އެންމެން މަސައްކަތް ކުރެއްވުމަށް ތަކުރާރުކޮށް ހިތްވަރު ދެއްވަމުންނެވެ.
ފެކަލްޓީ އޮފް ހެލްތް ސައިންސަސް އިން ހިންގި "ޕިއަރ ސަޕޯޓް ސްކޮޑް" ތަމްރީން ޕްރޮގްރާމް ނިންމި ދަރިވަރުންނަކީ، އެ ފެކަލްޓީގެ ދަރިވަރުންނަށް ބޭއްވޭ ޕިއަރ ސަޕޯޓް މީޓިންތައް ރާވައި ހިންގުމުގެ މަސައްކަތްތައް ކުރުމަށް ތަމްރީން ކުރެވުނު ދަރިވަރުންނެވެ. ނަފްސާނީ ދުޅަހެޔުކަމާމެދު ހޭލުންތެރިކަން އިތުރުކުރުމުގެ ގޮތުން ބާއްވާ ޕިއަރ ސަޕޯޓް މީޓިންގތައް ބާއްވާނީ ފެކަލްޓީގައި ތަޢުލީމު ހާސިލްކުރާ ދަރިވަރުންނަށް ހުޅުވާލައިގެންނެވެ.
