ބޯކޮށް ވާރޭވެހި ޕާކިސްތާނުގައި ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމަށް ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން ކެޕްނޭއް ފަށައިފިއެވެ.
"ހެލްޕް ޕާކިސްތާން" ގެ ނަމުގައި މި ކެމްޕޭން ފަށާފައިވަނީ ހޯމަ ދުވަހުއެވެ. މިއީ އެ ޔުނިވަރސިޓީގެ ފެކަލްޓީ އޮފް ޝަރީއާ އެންޑް ލޯގެ ދަރިވަރުންގެ ޖަމިއްޔާއިން އިސްނަގައިގެން ކުރިއަށްގެންދާ ކެމްޕޭނެކެވެ.
މި ކެމްޕޭން ފެއްޓެވުމަށް ބޭއްވި ހާއްސަ ރަސްމިއްޔާތުގައި ޕާކިތާނުގެ ހައިކޮމިޝަނަރުގެ ނައިބު ޒުލްޤަރްނައިން އަހުމަދު ބައިވެރިވެވަޑައިގެންނެވިއެވެ. އަދި އެމްއެންޔޫގެ ޑެޕިއުޓީ ވައިސް ޗާންސެލަރ ޑރ. އައިޝަތު ޝެހެނާޒް ވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.
ޝެހެނާޒް ވިދާޅުވީ ޕާކިސްތާނުގެ ތިންބައިކުޅަ އެއްބައި ފެނުއަޑީގައި އޮތްއިރު އޭގެ ސަބަބުން 16 މިލިއަން ކުޑަކުދިން ހިމެނޭހެން އެތައް މިލިއަން މީހުން ހާލުގައި ޖެހިފައިވާ ކަމަށެވެ. އެހެންވެ، ޤައުމީ ޔުނިވަރސިޓީގެ ފެކަލްޓީ އޮފް ޝަރީއާ އެންޑް ލޯގެ ދަރިވަރުން އިސްނަގައިގެން ފެށި މި ކެޕްމޭނުގެ ސަބަބުން ޕާކިސްތާނުގައި ހާލުގައި ޖެހިފައިތިބި ރައްޔިތުންނަށް އެހީވުމަށާއި ފުރާނަ ސަލާމަތް ކުރުމުގައި އެހީތެރިކަން ފޯރުކޮށްދެވޭނެ ކަމަށް އުއްމީދު ކުރައްވާ ކަމަށް އޭނާ ވިދާޅުވިއެވެ.
ޕާކިސްތާނުގައި ކެއުމަކަށް ދިވެހި ރުފިޔާއިން ބަލާނަމަ ފަސް ރުފިޔާ ހަރަދުވާކަން ފާހަގަކުރައްވައި ޝެހެނާޒް ވިދާޅުވީ އެ ހާލަތުގައި ވެދެވޭ ކިތަންމެ ކުޑަ އެހީއެއްވެސް ވެގެންދާނީ ވަރަށް ބޮޑު ވަރަކަށް ކަމަށެވެ.
މި ރަސްމިއްޔާތުގައި ވާހަކަދައްކަވަމުން ޕަކިސްތާނުގެ ހައިކޮމިޝަނަރުގެ ނައިބު ވަނީ ހާލުގައި ޖެހިފައިވާ ޕާކިސްތާނުގެ ރައްޔިތުންނަށް އެހީވުމަށް ދިވެހިން ކުރަމުން އަންނަ މަސައްކަތް ފާހަގަ ކުރައްވައި ޝުކުރު އަދާ ކުރައްވާފައެވެ. އަދި މިފަދަ ކާރިސާތަކަކީ މޫސުމީ ބަދަލުތަކާ ގުޅިގެން ދިމާވާ ކާރިސާތައް ކަމަށާއި ޕާކިސްތާނުގައި ފެންބޮޑުވުމުގެ އަސަރު 33 މިލިއަން މީހުންނަށް ކޮށްފައިވާ ކަމަށް އޭނާ ވިދާޅުވިއެވެ.
ޤައުމީ ޔުނިވަރސިޓީއިން ވަނީ ހޯމަ ދުވަހު ބޭއްވި ރަސްމިއްޔާތުގައި ޕާކިސްތާނަށް އެހީވާން ފަންޑު ފޮއްޓެއްވެސް ބަހައްޓައިފައެވެ.
ޕާކިސްތާނަށް ކުރި ވިއްސާރައިގައި އެ ޤައުމުގެ އެތައް މިލިއަން މީހުން ހާލުގައި ޖެހިފައިވާއިރު ސްކޫލްތަކާއި އޮފީސްތަކާއި ގެތަަކަށް ވެސް ވަނީ ބޭނުން ނުކުރެވޭ ވަރަށް ގެއްލުން ވެފައެވެ. އެ ޤައުމަށް ދިމާވެފައިވާ ކާރިސާއާ ގުޅިގެން ޕާކިސްތާނުން ބޭރުގެ އެހީއަށް ވެސް ވަނީ އެދިފައެވެ.
