ޑިބާލާގެ އަނިޔާ ސީރިއަސް، ވޯލްޑް ކަޕް ގެއްލުމުގެ ބިރު

ރޯމާގެ އާޖެންޓީނާ ފޯވާޑް ޕައުލޯ ޑިބާލާ އަށް ލިބުނު އަނިޔާ ސީރިއަސް ކަމަށް ހޯސޭ މޮރީނިއޯ ބުނެފިއެވެ.

ޑިބާލާ އަށް އަނިޔާވެފައިވަނީ އިޓާލިއަން ލީގުގައި ރޯމާ އިން ނީސްއާ ދެކޮޅަށް ކުޅުނު މެޗުގައެވެ. އަނިޔާގެ ސަބަބުން އޭނާ ވަނީ ބަދަލުކޮށްފައެވެ.

މެޗަށްފަހު ވާހަކަ ދައްކަމުން ރޯމާގެ ކޯޗު މޮރީނިއޯ ބުނީ، ޑިބާލާއަށް ލިބުނީ މަސްގަނޑުގެ އަނިޔާއެއް ކަމަށެވެ. އަދި އެއީ ވަރަށް ސީރިއަސް އަނިޔާއަކަށް ވެދާނެ ކަމަށް ވެސް އޭނާ ބުންޏެވެ. މޮރީނިއޯ ބުނީ އޭނާ ޑިބާލާއާ ވާހަކަ ދެއްކި ކަމަށާއި، ތެދަށް ބުނާނަމަ އަނިޔާ ނުރައްކާ ކަމަށެވެ.

މީގެ އިތުރުން މޮރޯނިއޯ ބުނީ އަނިޔާގެ ސަބަބުން މެޑިކަލް ޓީމުން ބަލަން ޖެހޭ ކަންކަން ބަލަމުންދާ ކަމަށެވެ. އަދި ހޯމަ ދުވަހުގެ ވަގުތެއްގައި ޓެސްޓުތައް ހަދާނެ ކަމަށާއި، ރަސްމީކޮށް އެއްޗެއް ބުނެވޭނީ އެއަށްފަހު ކަމަށް ވެސް އޭނާ ބުންޏެވެ.

މީޑިއާތަކުގައި ރިޕޯޓުކޮށްފައިވާ ގޮތުން ޑިބާލާ އަށް ލިބުނު އަނިޔާގެ ސަބަބުން އަންނަ ނޮވެމްބަރު މަހު ޤަތަރުގައި ފަށާ ފީފާ ވޯލްޑް ކަޕް ނުކުޅެވުމުގެ ބިރު އޮތް ކަމަށެވެ. ޑިބާލާ އަކީ އާޖެންޓީނާގެ ޤައުމީ ޓީމަށް ނިސްބަތްވާ ކުޅުންތެރިޔެކެވެ. އޭނާ އަންނަނީ 2015 ވަނަ އަހަރުން ފެށިގެން އާޖެންޓީނާގެ ޤައުމީ ޓީމަށް ކުޅެމުންނެވެ.