ޗެލްސީގެ ޓެކްނިކަލް ޑިރެކްޓަރަކަށް ވިވެލް ހަމަޖެއްސުމަށް މަސައްކަތް ކުރަނީ

އިނގިރޭސި ޕްރިމިއަރ ލީގުގެ ޗެލްސީގެ އައު ޓެކްނިކަލް ޑިރެކްޓަރަކަށް ކްރިސްޓޮފާ ވިވެލް ހަމަޖެއްސުމަށް މަސައްކަތް ކުރަމުން އަންނަ ކަމަށް މީޑިއާ ރިޕޯޓުތައް ބުނެފިއެވެ.

ޗެލްސީގެ އައު އޯނަރު ޓޮޑް ބޮހްލީ ކުލަބާ ހަވާލުވެ އޭނާ އަންނަނީ ކުލަބަށް ބަދަލުތަކެއް ގެންނަމުންނެވެ. އެގޮތުން ޗެލްސީގެ ސްޕޯޓިން ޑިރެކްޓަރަކަށް ވެސް އައު ފަރާތެއް ގެނައުމުގެ މަސައްކަތް ކުރެއެވެ. މީގެ އިތުރުން ޗެލްސީން ވަނީ އެ ޓީމުގެ ކޯޗުކަމުގެ މަގާމުން ތޯމަސް ޓުޗެލް ވަކިކޮށް، އެ މަގާމަށް ގްރަހަމް ޕޮޓާ ހަމަޖައްސާފައެވެ.

ޖަރުމަނަށް އުފަން އުމުރުން 35 އަހަރުގެ ވިވެލް ވަނީ މީގެ ކުރިން އާރްބީ ލައިޕްޒިގްގައި މަސައްކަތްކޮށްފައެވެ. އެގޮތުން އެ ޓީމުގެ ހެޑް އޮފް ސްކައުޓިން، ޓެކްނިކަލް ޑިރެކްޓަރު އަދި ސްޕޯޓިން ޑިރެކްޓަރު ކަން ވެސް އޭނާ ވަނީ އަދާކޮށްފައެވެ. ލައިޕްޒިގްގެ ކުރިން ހޮފެންހަމްގައި ވެސް ވިވެލް ވަނީ މަސައްކަތްކޮށްފައެވެ.

މީޑިއާ ރިޕޯޓުތައް ބުނާ ގޮތުގައި ޗެލްސީގެ އައު ޓެކްނިކަލް ޑިރެކްޓަރުގެ ގޮތުގައި ވިވެލް ވަރަށް އަވަހަށް އެއްބަސްވުމުގައި ސޮއި ކުރާނެއެވެ. މީގެ އިތުރުން ޗެލްސީން މަސައްކަތް ކުރަމުން އަންނަނީ މި ހަފްތާގެ ތެރޭގައި އެ މަގާމަށް އޭނާ ހަމަޖެއްސުމަށް ކަމަށް ވެސް ރިޕޯޓުތައް ބުނެއެވެ.