ސަޢޫދީ ޢަރަބިއްޔާގެ އާ ވަލީއަޙްދަށް ރައީސް ޔާމީން ތަހުނިޔާ ފޮނުއްވައިފި
21 ޖޫން 2017 | ބުދަ 12:32ދެގައުމުގެ ގުޅުން ރަނގަޅު ވެގެންދާނެ ކަަމަށް އުއްމީދު ކުރައްވާކަމަށް ރައީސް ޔާމީން ވިދާޅުވި
ސައޫދީ ޢަރަބިއްޔާގެ އާ ވަލީއަޙުދު މުޙައްމަދު ބިން ސަލްމާން
ސައޫދީ ޢަރަބިއްޔާގެ އާ ވަލީއަޙުދުގެ މަޤާމަށް މިހާރުގެ ރަސްގެފާނު ސަލްމާންގެ ދަރިކަލުން މުޙައްމަދު ބިން ސަލްމާން ބިން ޢަބްދުލްޢަޒީޒް އާލް-ސަޢުދު ޢައްޔަނު ކުރެއްވުމާ ގުޅިގެން، އެ މަނިކުފާނަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ތަހުނިޔާ ވިދާޅުވެއްޖެއެވެ.
ރައީީސް ޔާމީން ފޮނުއްވި ތަހުނިޔާގެ މެސެޖުގައި ސަޢޫދީ ޢަރަބިއްޔާގެ އާ ވަލީއަޙުދުގެ ދައުރުގައި، ސަޢޫދީ ޢަރަބިއްޔާއަށާއި، އެ ޤައުމުގެ ރައްޔިތުންނަށް އިތުރު ފާގަތިކަމާއި ތަރައްޤީ ލިބޭނެކަން ޔަޤީން ކުރައްވާ ކަމުގައި ވިދާޅުވެފައިވެއެވެ. މިގޮތުން، ދުނިޔޭގެ ވިޔަފާރީގެ ގަދަބާރެއްގެ ގޮތުގައާއި، އިސްލާމީ އުއްމަތް އެއްބައިވަންތަކޮށް ހަރުދަނާ ކުރުމުގައާއި، ސަރަހައްދީ ގޮތުންނާއި ދުނިޔޭގެ ސުލްހަ ޤާއިމް ކުރުމުގައި އެންމެ އިސް ދައުރެއް އަދާކުރާ ފަރާތެއްގެ ގޮތުގައި ސަޢޫދީ ޢަރަބިއްޔާ ފާހަގަ ކުރައްވާފައިވެއެވެ.
ރައީސުލްޖުމްހޫރިއްޔާގެ މެސެޖުގައި، ސަޢޫދީ ޢަރަބިއްޔާއިން ރާއްޖެއަށް ވެދެއްވަމުން ގެންދަވާ އެހީތެރިކަމަށްޓަކައި ދިވެހި ސަރުކާރާއި ރައްޔިތުންގެ ނަމުގައި ޝުކުރު އަދާކުރައްވައި، ރާއްޖެއާއި ސަޢޫދީ ޢަރަބިއްޔާއާ ދެ ޤައުމުގެ ދެމެދުގައިވާ ގުޅުން ކުރިއަށް އޮތް އަހަރުތަކުގައި އިތުރަށް ހަރުދަނާވާނެ ކަމަށް އުއްމީދު ކުރައްވާ ކަމުގައިވެސް ވިދާޅުވެފައިވެއެވެ.
ސައޫދީ ޢަރަބިއްޔާ އަކީ ރައީސް ޔާމީންގެ މި ސަރުކާރުން އެންމެ ގުޅުން ބާއްވަމުން އަންނަ އެއް ގައުމެވެ. ސައުދީ އަރަބިއްޔާއިން އީރާނާއި ޤަތަރާއެކު އޮތް ޑިޕްލޮޓިކް ގުޅުން ކަނޑާލުމާއެކު ރާއްޖެއިން ވެސް ވަނީ އީރާނާއި ޤަތަރާއެކު އޮތް ޑިޕްލޮމެޓިކް ގުޅުން ކަނޑާލާފަ އެވެ.
