އުފަންދުވަހުގެ ސެޓްފިކެޓް ވެސް ޑިޖިޓަލައިޒް ކުރުމަށް ވަނީ ހަމަޖެހިފައި
މާލެ ސިޓީ ކައުންސިލުގެ މޭޔަރު ޑރ. މުހައްމަދު މުއިއްޒު
މާލޭ ސިޓީ ކައުންސިލުގެ ހުރިހާ ޚިދުމަތެއް ޑިޖިޓަލައިޒް ކުރުމުގެ މަސައްކަތް ކުރަމުންދާ ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަަވަމުން ޑރ.މުއިއްޒު ވިދާޅުވީ އެ ކައުންސިލުގެ ޚިދުމަތްތައް ޑިޖިޓަލައިޒްކުރުމަށް ވާން ޖެހޭ ތައްޔާރީތައް ވަމުންދާ ކަމަށެވެ. އެގޮތުން އެކަމަށްޓަކައި ހަދަން ޖެހޭ ދިރާސާތަކުގެ މަސައްކަތް ވެސް ކޮށްފައިވާނެ ކަމަށް މޭޔަރު ވިދާޅުވިއެވެ. މީގެ އިތުރުން އެފަދަ މަސައްކަތެއް ކުރާ އިރު ސަލާމަތާއި ރައްކާތެރިކަން ކަށަވަރުކުރުމަކީ މުހިންމު ކަމެއްކަން ފާހަގަކުރައްވާ އޭނާ ވިދާޅުވީ އެ މަސައްކަތް ކުރާ އިރު މައުލޫމާތުތައް ރައްކާކުރެވޭކަން ޔަގީންކުރައްވާނެ ކަަމަށެވެ. އެ ޚިދުމަތްތައް ގާއިމުކުރަން އެކުލަވާލާ ޑިޖިޓަލައިޒް ސިސްޓަމަކީ ރައްކާތެރި ސިސްޓަމެއްކަން ޔަގީންކުރުމަށް މިނިވަން ތަޖުރިބާކާރުންގެ އެހީ ހޯދުމަށް ހަމަޖެހިފައިވާ ކަމަށް މޭޔަރު މުއިއްޒު ވިދާޅުވިއެވެ. މީގެ އިތުރުން ސިޓީ ކައުންސިލްގެ ޚިދުމަތްތައް ޑިޖިޓަލައިޒް ކުރުމަށް ކުރަމުންދާ މަސައްކަތްތަކުގެ ދަށުން އުފަންދުވަހުގެ ސެޓްފިކެޓް ވެސް ޑިޖިޓަލައިޒް ކުރުމަށް ހަމަޖެހިފައިވާ ކަމަށް މުއިއްޒު ވިދާޅުވިއެވެ.
ސިޓީ ކައުންސިލުގެ މަސައްކަތްތައް ޑިޖިޓަލައިޒް ކުރުމުގެ މަސައްކަތް ކުރަމުންދާއިރު ސަރުކާރުގެ ވުޒާރާތަކާއި މުއައްސަސާތައް އަދި އިދާރާތަކުން ވެސް ދަނީ ޚިދުމަތްތައް ޑިޖިޓަލައިޒްކުރަމުންނެވެ. ޚިދުމަތްތައް ޑިޖިޓަލައިޒް ކުރަނީ އިދާރާތަކާއި މުއައްސަސާތަކަށް ހާޒިރު ނުވެ ޚިދުމަތްތައް ހޯދޭނެ މަގު ފަހިކޮށްދީ، ޒަމާނީ ވަސީލަތްތަކުގެ އެހީގައި އަވަސް، ފަސޭހަ ޚިދުމަތެއް އާއްމުންނަށް ފޯރުކޮށްދިނުމުގެ މަގްސަދުގައެވެ.
