ޔޫރަޕް ކޮލިޓީގެ ބޭސް ސަރުކާރުގެ ފަރާތުން ފުރަތަމަ ފަހަރަށް ރާއްޖެ އެތެރެކޮށް ހޯމަ ދުވަހުން ފެށިގެން ވިއްކަން ފަށައިފި ކަމަށް ބުނެ ފަތުރާ ޚަބަރަކީ ހަގީގަތް އޮޅުވާލައިގެން ފަތުރާ ޚަބަރެއް ކަމަށް އެމްޑީޕީ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ހެލްތު މިނިސްޓްރީ އާއި ފިނޭންސް މިނިސްޓްރީ އާއި އެންސްޕާ އާއި އާސަންދަ އާއި މޯލްޑިވްސް ފުޑް އެންޑް ޑްރަގް އޮތޯރިޓީ އާއި އެސްޓީއޯ ގުޅިގެން ހޯމަ ދުވަހު ނެރުނު ބަޔާނެއްގައި ބުނީ، ދިވެހިންނަށް ފެންވަރު ރަނގަޅު ބޭސް ލިބޭނެ ގޮތް ކަށަވަރު ކޮށްދިނުމަކީ ރައީސް ޑރ. މުހައްމަދު މުއިއްޒުގެ ވަރަށް މުހިއްމު ރިޔާސީ ވައުދެއް ކަމަށާއި، އެއްފަހަރާ ގިނަ އަދަދެއްގެ ބޭސް ގެންނަން ޔޫއެންޑީޕީ އާއި އެސްޓީއޯއާ ހަވާލުކޮށް، އޭގެ ފުރަތަމަ ޝިޕްމަންޓް ރާއްޖެ ގެނެސްފައިވާ ކަމަށެވެ.

އަމީރު ވިދާޅުވީ ބަލްކް ޕްރޮކިއުމެންޓް ގެ ތެރެއިން ބޭސް ގެންނަން ސޮއިކުރެވުނީ 2023 ވަނަ އަހަރުގެ ޖޫން މަހުގެ ފުރަތަމަ ދުވަހު، އެމްޑީޕީ ސަރުކާރުގައި ކަމުގައެވެ.

"އެންމެންނަށް އެބަ އެނގޭ މި ސަރުކާރަކީ ދޮގާއި މަކަރާއި އޮޅުވާލުމުގެ ސަރުކާރެއްކަން،" އަމީރު މި ކަމާބެހޭ ގޮތުން ހޯމަ ދުވަހުގެ ރޭ ކަން ހިނގާފާއިވާ ގޮތް ސާފުކޮށްދެއްވުމުގެ ގޮތުން އެކްސް ގައި ކުރެއްވި ޕޯސްޓެއްގައި ވެއެވެ.

އަމީރު ވިދާޅުވީ ޔޫއެންޑީޕީ އާއެކު ބަލްކް ޕްރޮކިއުމެންޓްގެ ތެރެއިން ބޭސް ގަންނަން ކުރީ ސަރުކާރުން ސޮއި ކުރުމުގެ ސަބަބުން ކޮލިޓީ ބޭސް ލިބުމުގެ އިތުރުން، ބޭހަށް ކުރެވޭ ޚަރަދުވެސް އެތައް ގުނައަކުން ކުޑަވެގެންދާނެ ކަމަށެވެ.

1 ޖޫން 2023 ގައި އެމްޑީޕީ ސަރުކާރުގެ މިނިސްޓްރީ އޮފް ފިނޭންސުން ނެރެފައިވާ ނޫސް ބަޔާނެއްގައި އޮންނަނީ ރާއްޖެ އަށް އެތެރެ ކުރެވޭ ބޭސް ހެޔޮ އަގުގައި ގެނައުމަށްޓަކައި ބަލްކް ޕްރޮކިއުމެންޓް ނިޒާމުގެ ތެރެއިން ކޮލިޓީ ބޭސް ގެނައުމަށް ޔޫއެންޑީޕީ އާ ދެމެދު އެއްބަސްވުމެއްގައި ސޮއި ކޮށްފައިވާ ކަމަށެވެ.

އެ އެއްބަސްވުމުގެ ދަށުން ޔޫއެންޑީޕީން ރާއްޖެ އަށް ބޭސް ސަޕްލައިކޮށްދިނުމުގެ އިތުރުން ކޯޕަންހޭގަންގައި ހުންނަ ޔޫއެންޑީޕީ ގެ ގްލޯބަލް ހެލްތް ޕްރޮކިއުމެންޓް ސެންޓަރުގެ ކޮލިޓީ އެޝުއަރެންސް ޓީމުން ބޭހުގެ ކޮލިޓީ ކޮންޓްރޯލް ކުރުމުގައި އެހީތެރިވެ ދޭނެ ކަމަށްވެސް އެ ބަޔާނުގައި ބުނެފައިވެއެވެ.

މި އެގްރީމެންޓްގެ ދަށުން ބޭސް ވަގުތުން ވަގުތައް ގެނައުމަށް ފަސޭހަވުމާއި، ބޭސް ލިބުމަށް ހުންނަ ދަތިތައް ހައްލުވެގެން ދިއުމުގެ އިތުރުން ސިއްހީ ދާއިރާގެ ޕްރޮކިއުމެންޓް ރަނގަޅު ވެގެން ދިއުމާއި ސިއްހީ ނިޒާމުގެ ބައެއް މައްސަލަތައް ހައްލުވެގެން ދާނެ ކަމަށްވެސް އެމްޑީޕީ ސަރުކާރުން ނެރުނު ބަޔާނުގައި ބުނެފައިވެއެވެ.

އަމީރު ވަނީ "މި ހަގީގަތް ނޯޅޭނެ ގޮތަށް ޚަބަރު ގެނެސްދިނުމަށް" އެދިވަޑައިގަތްފައެވެ.