ވަގުބުޅާ ގެންގުޅުމަށް ޗައިނާއިން ޚާއްސަ ރަށެއް ހަމަޖައްސައިފި

ޗައިނާގެ ވިޔަފާރި މަރުކަޒީ ހަބްގެ ގޮތުގައި ސިފަ ކުރަމުން ދާ ޝަންހާއީގެ ރަށްބޭރުގައި އޮންނަ ކޯރާ ގުޅިފައި ވާ ކުޑަ ރަށެކެވެ. މިއަދު އެ ރަށަކީ ޗައިނާގެ 'ކެޓް އައިލަންޑް' ނުވަތަ 'ބުޅާ ރަށެވެ'. އެއީ ކައިރި ހިސާބުތަކުގައި ގިނަވެގެން ކޮޅުކޮޅު މައްޗަށް ދުވެ ހަދާ ވަގު ބުޅާތައް އެ ރަށަށް ގެންދިއުމުގެ މަސައްކަތް، ޗެރިޓީ ޖަމާއަތަކުން ފެށި ހިސާބުންނެވެ.

600 މީޓަރުގެ 'ބުޅާ ރަށް' ހުޅުވާލީ ސެޕްޓެމްބަރު 4 ވަނަ ދުވަހުއެވެ. އޭގެ ފަހުން މިހާތަނަށް، 100އެއްހާ ބުޅަލުގެ ދިރިއުޅުން އެ ރަށަށް ބަދަލުކޮށްފިއެވެ. ގިނަ ބުޅަލަކީ ޝަންހާއީގައި ކަންބޮޑުވެފައި ތިބި ރަށްވެހިން ގެނައި ބުޅާތަކެވެ.

ކެޓް އައިލަންޑްގެ ކަންކަން ބަލަހައްޓަނީ ޝަންހާއީ ސްޓްރޭ ކެޓްސް މެނޭޖްމަންޓް ސެންޓަރުންނެވެ.

ކެޓް އައިލަންޑަށް ބުޅާ ގެންދެވުމާއެކު، އެ އެއްޗެހި ސާފުކުރުމުގެގޮތުން ޚާއްސަ ސްޕްރޭއެއް ޖަހައިގެން ފެންވަރުވާލައެވެ. އަދި ބުޅަލުގެ އިވެލުއޭޝަނެއް ހަދައެވެ. ސިއްހީ ގޮތުން ބުޅަލުގެ ހާލަތު ހުރި ނެތް ގޮތް ބަލައެވެ. އެއަށްފަހު، މިނިވަން ކަމާއެކު ރަށުތެރޭގައި އުޅުމުގެ ފުރުސަތު ބުޅަލަށް ދެއެވެ.

ސްޓްރޭ ކެޓްސް މެނޭޖްމަންޓް ސެންޓަރުގެ ޝާ ޝެންލިއަންގް ބުނީ، ވަގު ބުޅާ އިތުރުވުމުގެ މައްސަލަ ހައްލު ކުރުމަށާއި، ގުދުރަތީ ބެލެންސް ދެމެހެއްޓުމަށްޓަކައި އެ ޖަމްއިއްޔާއިން އަމަލުކުރާ ޚާއްސަ އުސޫލެއް އޮންނަކަމަށެވެ. އެއީ ބުޅާ ހިފައި، ސާފުކޮށް، ދޫކުރުމުގެ ސިޔާސަތު ނުވަތަ ޓީއެންއާރްއެވެ.

ކެޓް އައިލަންޑްގެ ސަބަބުން ވަގު ބުޅާތަކުގެ މައްސަލައަށް ކޮންމެވެސް ވަރެއްގެ ހައްލެއް ލިބުނު ކަމުގައި ވީ ނަމަވެސް، އެއީ ވަގުތީ ހައްލެކެވެ. ޝަންހާއީއަށް އެކަނި ބަލައިލި ކަމުގައި ވީނަމަވެސް، ކޮންމެ ކޮޑިކިލޯމީޓަރެއްގައި 200 ވަގު ބުޅާ އުޅޭކަމަށް އަންދާޒާކުރެވެއެވެ. އެހެން ކަމުން، ވަގު ބުޅަލުގެ އާބާދީ ކޮންޓްރޯލްކުރުމަށް އެހެން އުސޫލުތަކެއްވެސް ހޯދަން ވަނީ މަޖުބޫރުވެފައެވެ.