ލ. ގަމުގައި ތަރައްގީކުރާ ކެންސަރ ހޮސްޕިޓަލުގެ މަސައްކަތުގެ ތެރެއިން މިހާރު ކުރިއަށްދަނީ ޑީޓެއިލް ޕްރޮޖެކްޓް ރިޕޯޓުގެ މަސައްކަތް ކަމަށް ރައީސް އޮފީހުން ބުނެފިއެވެ.
އިންޑިއާ ސަރުކާރުގެ ހިލޭ އެހީގެ ދަށުން ރާއްޖޭގައި ގާއިމްކުރާ ފުރަތަމަ ކެންސަރ ހޮސްޕިޓަލު ލ. ގަމުގައި ގާއިމްކުރުމަށް ސަރުކާރުން ވަނީ ނިންމާފައެވެ. ބުރާސްފަތި ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި މި މަސައްކަތުގެ އެންމެ ފަހުގެ އަޕްޑޭޓުތައް ވަނީ ހިއްސާކޮށްފައެވެ.
ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ކެންސަރ ހޮސްޕިޓަލުގެ ޓެކްނިކަލް ފީސިބިލިޓީ މިހާރު ވަނީ ނިމިފައި ކަމަށެވެ. މިހާރު ކުރިއަށްދަނީ ޑީޓެއިލް ޕްރޮޖެކްޓް ރިޕޯޓު (ޑީޕީއަރު) ހެދުމަށް ކުރަންޖެހޭ މަސައްކަތްތައް ކަމަށް މިއުވާން ވިދާޅުވިއެވެ. މި މަސައްކަތަށް މިހާރު އިއުލާނުކޮށްފައިވާކަމަށް މިއުވާން ވިދާޅުވިއެވެ. ޑީޕީއާރު މަސައްކަތް ނިމުމުން މާ ގިނަ ދުވަހެއް ނުވެ ހޮސްޕިޓަލުގެ މަސައްކަތް ފެށޭނެ ކަމަށް މިއުވާން ވިދާޅުވިއެވެ.
2021 ވަނަ އަހަރަށް ލަފާކޮށްފައިވާ ދައުލަތުގެ ބަޖެޓު މަޖިލީހަށް އިއްވަވަމުން ފިނޭންސް މިނިސްޓަރ އިބްރާހިމް އަމީރު ވަނީ މި މަޝްރޫއު އިއުލާނުކުރައްވާފައެވެ. މިއީ ސިއްހީ ދާއިރާއިން އަލަށް ފަށަން ނިންމާފައިވާ ބޮޑު މަޝްރޫއަކަށް ވާއިރު، މި މަޝްރޫއު ވެގެންދާނީ ކެންސަރާއި، އެހެނިހެން ގައިންގަޔަށް ނާރާ ބަލިތަކުން މަރުވާ އަދަދު 2018 ގައި ހުރި މިންވަރުން 15 އިންސައްތަ ދަށް ކުރުމަށް ސަރުކާރުން ހިފާފައިވާ އަމާޒަށް ވާސިލުވުމަށް މުހިންމު މަޝްރޫއަކަށް ކަމަށް މިނިސްޓަރ ވިދާޅުވިއެވެ.
ކެންސަރު ހޮސްޕިޓަލް ފުރަތަމަ އެޅުމަށް ނިންމީ ހުޅުމާލޭގައެވެ. އެކަން ހާމަކޮށްފައިވަނީ ނިމިގެންދިޔަ އަހަރުގެ ޑިސެމްބަރު މަހުގެ 4 ވަނަ ދުވަހު އިންޑިއާގެ ބޮޑުވަޒީރު ނަރެންދުރަ މޯދީއެވެ. އިންޑިއާއާއި ރާއްޖެއާއި ދެމެދު މުހިންމު 4 އެއްބަސްވުމެއް ބަދަލުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މޯދީ ވިދާޅުވެފައިވަނީ އެ ގައުމުން ރާއްޖެ އަށް ގިނަ އެހީތަކެއް ފޯރުކޮށްދެއްވާނެ ކަމަށެވެ. އެގޮތުން ހުޅުމާލޭގައި ކެންސަރުގެ ހޮސްޕިޓަލަކާއި ކްރިކެޓް ދަނޑެއް އެޅުމުގެ މަސައްކަތް ކުރަމުން އަންނަ ކަމަށް މޯދީ ވިދާޅުވިއެވެ.
ކެންސަރު ހޮސްޕިޓަލެއް ރާއްޖޭގައި އެޅުމަަށް ނިންމާފައިވާ އިރު، ކެންސަރު ބައްޔަކީ އާސަންދައިގެ ދަށުން ރާއްޖެއިން ބޭރުން އެންމެ ގިނައިން ބޭސްފަރުވާގެ ޚިދުމަތް ހޯދާ ބަލިކަމަށް އާސަންދައިގެ ތަފާސް ހިސާބުތަކުން ދައްކައެވެ.
