ދެކުނު ތަރައްޤީ ވާނީ އައްޑޫ އާއި ފުވައްމުލައް އަދި ހުވަދޫ ގުޅި ލާމެހިގެން: އަސްލަމް
7 އޮކްޓޯބަރު 2022 | ހުކުރު 14:35ސަރުކާރުން މަސައްކަތްކުރަމުން ދަނީ ދަތުރުފަތުރުގެ ނިޒާމު ވަރުގަދަކުރަން: މިނިސްޓަރު
މިނިސްޓަރ މުހައްމަދު އަސްލަމް
ދެކުނު ތަރައްޤީ ވާނީ އައްޑޫ އާއި ފުވައްމުލައް އަދި ހުވަދޫ ގުޅި ލާމެހިގެން ކަމަށް މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ބުދަ ދުވަހު އައްޑޫސިޓީގެ ހިތަދޫގެ ގޮނޑުދޮށް ހިމާޔަތްކުރުމުގެ މަސައްކަތް ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ ރާއްޖެ ޓްރާންސްޕޯޓް ލިންކާއި އެކު އެ މަގްސަދު ހާސިލް ވާނެ ކަމަށް ދެކެވަޑައިގައިގަންނަވާ ކަމަށެވެ. ފުވައްމުލަކުގައި ހުންނަ މީހަކަށް ވެސް ފަސޭހަކަމާއި އެކު އައްޑޫގެ ހޮސްޕިޓަލަށް އާދެވޭނެ މަގު ފަހިވެފައި އޮންނަންޖެހޭ ކަމަށް އޭނާ ވިދާޅުވިއެވެ. ދެކުނުގެ ރަށްތަކުގެ މެދުގައި އޮތް ގުޅުން ރަނގަޅު ނުކޮށް ދެކުނު ތަރައްޤީ ނުކުރެވޭނެ ކަމަށާއި އެކަން ކުރެވޭނީ ވަރުގަދަ ދަތުރުފަތުރުގެ ނިޒާމެއް އޮވެގެން ކަމަށް ގަބޫލުކުރައްވާ ކަމަށް މިނިސްޓަރ ވިދާޅުވިއެވެ. ރާއްޖޭގެ ތާރީހަށް ބަލާލުމުން އަސާސީ ތައުލީމަށް ފަހު ރާއްޖެ އަށް އެންމެ ބޮޑު ބަދަލެއް އަންނާނެ ކަަމަކީ ދަތުރުފަތުރުގެ ނިޒާމު ރަނގަޅުވުން ކަމަށް ވެސް މިނިސްޓަރ ވިދާޅުވިއެވެ.
އެ ކަމުގެ ސަބަބުން 60000 ވަރަކަށް މީހުންގެ އާބާދީ އެއްކޮށްލެވި، އިގްތިސާދު އިތުރަށް ކުރިއަރާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ އިތުރަށް ވިދާޅުވީ ކޮންމެ ވެރިކަމެއް އޮތަސް ރާއްޖެ ދެން ދާނީ ކުރިއަށް ކަމަށް ގަބޫލުކުރައްވާ ކަމަށެވެ. ހުރިހާ އެންމެންވެސް ތަރައްްގީ ބޭނުންވަނީ ވަރަށް ބާރު ސްޕީޑުގައި ކަމަށާއި އެހެންކަމުން އެންމެ ހިތް އެދޭ ސްޕީޑުގައި ނުދާ މަޝްރޫޢުތަކުގެ މައްސަލަ ހައްލުކުރަން މަސައްކަތްކޮށް، އެފަދަ ކަންކަން މެނޭޖުކުރުމަށް މަސައްކަތްކުރައްވާ ކަމަށް ވެސް އަސްލަމް ވަނީ ވިދާޅުވެފައެވެ.
