އަމިއްލަ ދަރިފުޅާ، އަނބިމީހާއެކު އެތައް ކުދިންނެއް މަރާލި ޤާޠިލަށް މަގު ދައްކަމުން ދިޔައީ ޑްރަގްސް

ހުކުރު ވިލޭރޭގެ ވަގުތެކެވެ. އިންޓަނެޓާއި ސޯޝަލް މީޑިއާގެ ވިއުގައިން ގުޅިފައިވާ ބައިނަލްއަގުވާމީ މުޖުތަމަޢު ސިއްސުވާލީ ތައިލޭންޑްގެ ފުލުހުންގެ ތެރޭގައި ކުރިން ޚިދުމަތް ކުރި މީހަކު 37 މީހުންގެ ފުރާނަ ދުއްވާލި ޚަބަރާއެކުގައެވެ. ބަޑިއާއި ވަޅި ބޭނުންކޮށްގެން ދިން އެ ހަމަލާތަކުގައި 23 ކުޑަކުދިންގެ ފުރާނަ ގެއްލިފައިވާއިރު، ޤާޠިލު ވަނީ އަމިއްލައަށް މަރުވުމުގެ ކުރިން، އަނބިމީހާއާއި ދަރިފުޅުވެސް މަރާލާފައެވެ.

މަންޒަރު ދުށް ބައެއް މީހުން ދަނީ ހާދިޘާ ހިނގި ގޮތުގެ ވާހަކަތައް ހިއްސާ ކުރަމުންނެވެ.

އޮކްޓޯބަރު 6 ވީ ބުރާސްފަތި ދުވަހުގެ އެ ހާދިޘާއަކީ، މި ފަހުގެ ތާރީޚުގައި އެއް ޤާޠިލެއްގެ ޝިކާރައަކަށް ވެ، އެންމެ ގިނަ ޢަދަދެއްގެ ކުޑަކުދިންގެ ފުރާނަ ގެއްލިދިޔަ އެންމެ ހިތްދަތި، އެއް ޤަޠުލުޢާންމެވެ. އެންމެ ގިނަ ކުދިން މަރާލީ ތައިލޭންޑްގެ ވެރިރަށް ބެންކޮކްގެ އިރުއުތުރުން 500 ކިލޯމީޓަރު ދުރުގައި އޮންނަ އުތާއީ ސަވާންއޭ ކިއުނު އަވަށުގެ ޑޭ ކެއާ ސެންޓަރެއްގެ ތެރޭގައެވެ. އަމިއްލަ ގެއިން ބޭރުގައި ދަރިންނަށް ސަލާމަތާއި ރައްކާތެރިކަމާއެކު ތިބެވޭނެ ހިޔާވައްސެއް ކަމުގައި އެތައް މަޔަކާއި ބަފައަކު ހީކުރި ޑޭ ކެއާ ތެރޭގައި ގިނަ ޢަދަދެއްގެ ކުދިން މަރާލާފައި ވަނީ ވަޅިން ހަމަލާ ދީގެން ކަމަށް ފުލުހުން ވަނީ ހާމަ ކޮށްފައެވެ.

ހަމަލާ ދިނުމަށް ބޭނުން ކުރީ ވިނަކޮށަން ގެންގުޅޭ ޒާތުގެ ބަޅުވަޅިއެއް ކަމަށްވެސް ޑޭކެއާގެ ޓީޗަރު ވަނީ ކިއާދީފައެވެ.

އެއްވެސް ރަޙުމެއް ނެތް އެ ޖަރީމާ ހިންގި މީހަކީ ތައިލޭންޑްގެ ފުލުހުންގެ ފައުޖުން މިދިޔަ އަހަރު ވަކި ކުރި މީހެކެވެ. އޭނާ ވަޒީފާއިން ވަކި ކުރީ މަސްތުވާތަކެއްޗަށް ޝައްކު ކުރެވޭ މައްސަލައެއްގައި ކަމަށް ވާ އިރު، އޭނާއާ ދެކޮޅަށް ކުރިޔަށް ދާ އެމައްސަލައިގެ ޝަރިއަތުވެ އަޑުއެހުމެއް އެދުވަހުވެސް އޮތެވެ. އޭނާ މިބޮޑު ޖަރީމާ ހިންގީ ޝަރީއަތުގެ އަޑުއެހުމަށް ހާޒިރުވުމަށް ފަހު އައި މަގުމަތީގަ ކަމަށް ޚަބަރުތައް ބުނެއެވެ. އަދި އޮކްޓޯބަރު 7 ވަނަ ދުވަހުވެސް ޝަރިއަތަށް ހާޒިރުވާން ޖެހޭ ކަމަށް ވެއެވެ.

ފުލުހުންގެ އިސްވެރިޔާ ޑެމްރޮންގްސަކް ކިއްޓިޕްރަޕާސް ވިދާޅުވީ، ހަމަލާތައް ދިނުމުގެ ކުރިން އޭނާ ކޯޓަށް ދިޔަ ކަމަށެވެ. އަދި ޑޭ ކެއާއަށް އޭނާ ގޮސްފައި ވަނީ އެ ޑޭ ކެއާގައި ހުރި ދަރިފުޅު ބަލާ ކަމާށްވެސް ޑެމްރޮންގްސަކް ކިއްޓިޕްރަޕާސް ވިދާޅުވިއެވެ.

ހުކުރު ދުވަހަށް އަލިވިލުނުއިރު މުޅި ތައިލޭންޑްގައި ވަނީ ހިތާމައިގެ ހިމޭންކަން ވަކި ހިއްޕާލާފައެވެ. ހާދިޘާގައި މަރުވެދިޔަ ކުދިންނާއި ޓީޗަރުންގެ ޢާއިލާތަކުން ތަޙައްމަލު ކުރަމުންދާ ފުން ހިތާމަ، އެނޫން ބަޔަކަށް ވަޒަން ކުރަންވެސް ދަތިވާނެކަން ގައިމެވެ.

ހާދިޘާއަށް އެތައް ގަޑިއިރެއްވީ އިރުވެސް ޢާއިލާ މެންބަރުންނަށް އަދި ހަށިގަނޑުތައް ފެންނަ ވަރެއް ނުވެއެވެ. ޕޯސްޓްމޯޓަމް ހެދުމާއި އެނޫންވެސް އިދާރީ ކަންކަން ކުރިއަށް ގެންދިއުމުގެ ސަބަބުންނެވެ. ދެލޯ ނޭދި އެދުނު ދަރި ނުވަތަ އެނޫންވެސް ގާތް ގުޅުމެއް އޮތް މައުސޫމް އެތައް ކުދިންނެއްގެ ފުރާނަ، އެއްވެސް ރަޙުމެއް ނެތި ދުއްވާލި ހާދިޘާގެ ހިތާމަ ކުރަމުން ދާ ޢާއިލާތަކުން އަޅަމުން ދާ ކަރުނައިގެ އަގު ވަޒަން ކުރަންވެސް ދައްޗެވެ. ކުދިން ކުޅެން ގެންގުޅުނު އެއްޗެހީގައި ބައްދާލައިގެން ތިބި މީހުންވެސް ފެނެއެވެ. ތައިލޭންޑް ސަރުކާރުގެ އޮފިޝަލުންވެސް ވަނީ، ހާދިޘާ ހިނގި ޑޭކެއާގެ ބޭރުގައި ޙަމްދަރުދީގެ މާބޮނޑިތައް ބަހައްޓާފައެވެ.

މަރުވި ކުދިންގެ ތެރޭގައި ގިނައީ އުމުރުން ދެއަހަރާ ހަތަރު އަހަރާ ދެމެދުގެ ކުދިންނެވެ.

ތައިލޭންޑަށް ވެރިވި ފުން ހިތާމައާއެކު، އެ ޤައުމުގެ ޤައުމީ ދިދަވެސް ވަނީ ބައި ދަނޑިއަށް ތިރިކޮށްފައެވެ. ސިހުމެއްގައި އޮތް އެ ޤައުމުގެ ކޮންމެ މީހެއްގެ ހިތުގައި އެތައް ސުވާލެއް ވަނީ އުފެދިފައެވެ. އަނެއް ބަޔަކު ދަނީ، މަސްތުވާތަކެއްޗާ ދެކޮޅަށް ސަރުކާރުގެ ފިޔަވަޅުތައް އިތުރަށް ހަރުކަށިކޮށްގެން، ކުރިއަށް އޮތް ތަނުގައި މިފަދަ ހާދިޘާތައް ހިނގިޔަ ނުދީ ވޭތޯ ބެލުމަށް، ކަމާ ބެހޭ ފަރާތްތަކަށް ޑިމާންޑް ކުރަމުންނެވެ.