އަންނަ ނޮވެމްބަރު މަހު ގަތަރުގައި ފަށާ ފީފާ ވޯލްޑް ކަޕަކީ އޭނާ ފެންނާނެ އެންމެ ފަހު ވޯލްޑް ކަޕް ކަމަށް، އާޖެންޓީނާގެ ކެޕްޓަން ލިއޮނެލް މެސީ ބުނެފިއެވެ.

އުމުރުން މިހާރު 35 އަހަރުވެފައިވާ ފޯވާޑް މިހެން ބުނީ ޕޮލޯ ވިގްނޯލޯއަށް ދިން އިންޓަވިއުއެއްގައެވެ. އެ އިންޓަވިޔުގައި މެސީ ބުނީ މި ވޯލްޑް ކަޕް ވާނީ އޭނާގެ އެންމެ ފަހު ވޯލްޑް ކަޕަށާއި، އެއީ މިހާރު ޔަގީން ކަމެއް ކަމަށެވެ. މީގެ އިތުރުން އޭނާ ބުނީ އެ ނިންމުން މިހާރު އޭނާ ވާނީ ނިންމާފައިކަމަށެވެ.

މެސީއަކީ ދުނިޔޭގައި މިހާތަނަށް އުފެދުނު އެންމެ މޮޅު އެއް ފުޓުބޯޅަ ކުޅުންތެރިޔާއެވެ. އޭނާ ވަނީ އާޖެންޓީނާއާއެކު 2006، 2010، 2014 އަދި 2018 ވަނަ އަހަރުގެ ވޯލްޑް ކަޕްގައިވެސް ކުޅެފައެވެ. މީގެ ތެރެއިން 2014 ވަނަ އަހަރު އޮތް މުބާރާތުގައި މެސީ ވަނީ ތަފާތު މޮޅު ކުޅުމެއް ދައްކައި، އާޖެންޓީނާއާއެކު އެއަހަރުގެ ފައިނަލްގައި ކުޅެފައެވެ. ފައިނަލްގައި އާޖެންޓީނާ ބަލިވީ ޖަރުމަނު އަތުންނެވެ. މެސީ ވަނީ އެ އަހަރުގެ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދާފައެވެ.

ފުޓުބޯޅާގައި މެސީ ވަނީ ގިނަ ކާމިޔާބީތަކެއްވެސް ހޯދާފައެވެ. އާޖެންޓީނާއާއެކު އޭނާ ވަނީ 2021 ވަނަ އަހަރުގެ ކޮޕަރ އެމެރިކާ މުބާރާތް ކާމިޔާބުކޮށްފައެވެ. މީގެ އިތުރުން މިއަހަރު އޭނާ ވަނީ އާޖެންޓީނާއާއެކު ޔުއެފާ ކަޕް އޮފް ޗެމްޕިއަންސްވެސް ކާމިޔާބުކޮށްފައެވެ. ގަތަރުގައި ނޮވެމްބަރު މަހު ވޯލްޑް ކަޕް މުބާރާތް ފަށާއިރު، މެސީ އަންނަނީ މިހާރުވެސް މޮޅު ކުޅުމެއް ދައްކަމުންނެވެ. މެސީއާއެކު އާޖެންޓީނާއަކީ މިއަހަރުގެ މުބާރާތުގެ ފޭވަރިޓުންގެ ގޮތުގައި ބެލެވޭ ޓީމެކެވެ.

މީގެ އިތުރުން މެސީ ވަނީ ބެލެންޑޯ އެވޯޑު ހަތް ފަހަރު ހޯދާފައެވެ. މިއީ މި އެވޯޑު ހޯދުމުގެ ރެކޯޑެވެ. މެސީ ވަނީ ޔޫރަޕުގެ ރަން ބޫޓުވެސް ފަސް ފަހަރު ހޯދާފައެވެ. އޭނާއަކީ މިހާތަނަށް ޔޫރަޕުގެ ރަން ބޫޓު އެންމެ ގިނަ ފަހަރު ހޯދި ކުޅުންތެރިޔާއެވެ.