ޔުއެފާ ޗެމްޕިއަންސް ލީގު ގްރޫޕް ޖީގައި ބޮރޫޝިއާ ޑޯޓްމަންޑުން ސެވިއްޔާ ބަލިކޮށްފިއެވެ.
ބުދަ ދުވަހުގެ ރޭ ސެވިއްޔާގެ އަމިއްލަ ދަނޑުގައި ކުޅުނު މެޗު ޑޯޓްމަންޑުން ކާމިޔާބުކުރީ 4-1 އިންނެވެ.
މެޗު ފަށައިގެން ހަ ވަނަ މިނެޓުގައި ޑޯޓްމަންޑުން ވަނީ ލީޑު ނަގައިފައެވެ. އެއީ މޮޅު ކުޅުމެއް ދައްކަމުން އަންނަ ޖޫޑް ބެލިންހަމް ތަނަވަސްކޮށްދިން ފުރުސަތެއްގައި ގުރެއިރޯ ޖެހި ލަނޑުންނެވެ. ފުރަތަމަ ހާފު ނިމުމުގެ ކުރިން ޑޯޓްމަންޑުން ވަނީ އިތުރު ދެ ލަނޑު ޖަހާފައެވެ. 41 ވަނަ މިނެޓުގައި ޑޯޓްމަންޑުންގެ ދެ ވަނަ ލަނޑު ޖެހީ ބެލިންހަމްއެވެ. އޭގެ ދެ މިނެޓު ފަހުން ތިން ވަނަ ލަނޑު ޖެހީ އަޑެޔޭމީއެވެ.
ދެ ވަނަ ހާފު ފަށައިގެން ކުރީ ކޮޅު ސެވިއްޔާ އިން ވަނީ ލަނޑެއް ޖަހާފައެވެ. އެއީ 51 ވަނަ މިނެޓުގައި އެން ނެސީރީ ޖަހައިދިން ލަނޑެކެވެ. ޑޯޓްމަންޑުގެ ފަހު ލަނޑު މެޗުގެ 75 ވަނަ މިނެޓުގައި ޖެހީ ބްރެންޑްއެވެ.
މެޗުން މޮޅުވެ ޑޯޓްމަންޑު އޮތީ ތިން މެޗުން ހަ ޕޮއިންޓު ހޯދައިގެން ގްރޫޕްގެ ދެ ވަނަ މަގާމުގައެވެ. އެއް ވަނައިގައި އޮތީ ނުވަ ޕޮއިންޓާއެކު މެންޗެސްޓަރ ސިޓީއެވެ. ތިން ވަނައިގައި ސެވިއްޔާ އޮތީ އެއް ޕޮއިންޓާއެކުއެވެ. ފުލުގައި އޮތް ކޯޕަންހޭގަން އަށް ވެސް ލިބެނީ އެއް ޕޮއިންޓެވެ.
