"ރޮނާލްޑޯ ބެންޗުގައި ބޭންދީ އޭނާގެ ކެރިއަރަށް ކުރާ އިޙްތިރާމެއްގެ ސަބަބުން"

މެންޗެސްޓަރ ސިިޓީއާ ދެކޮޅަށް ކުޅުނު މެޗުގައި ކްރިސްޓިއާނޯ ރޮނާލްޑޯ ބެންޗުގައި ބޭންދީ އޭނާގެ ކެރިއަރަށް ކުރާ އިޙްތިރާމެއްގެ ސަބަބުން ކަމަށް އެރިކް ޓެން ހާގް ބުނެފިއެވެ.

ޕްރިމިއާ ލީގުގައި ސިޓީއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑް ބަލިވީ 3-6 އިންނެވެ. އެ މެޗުގައި ޓެން ހާގް ރޮނާލްޑޯ ބޭނުންކޮށްފައެއް ނުވެއެވެ. ސީޒަންގެ ފުރަތަމަ ކޮޅު ޔުނައިޓެޑަށް ލިބުނު ދަށް ނަތީޖެ ސަބަބުން ޓެން ހާގް ވަނީ ރޮނާލްޑޯ ބެންޗުގައި ބައިންދާފައެވެ. އޭރު އޭނާ ބުނަމުންދިޔައީ 90 މިނެޓުގެ މެޗެއް ކުޅޭ ވަރަށް ރޮނާލްޑޯ ފިޓުވާން ޖެހޭ ކަމަށެވެ. ނަމަވެސް އޭގެ ފަހުން ރޮނާލްޑޯ ފިޓުވެއްޖެ ކަމަށް ބުނެ އޭނާ ވަނީ ރޮނާލްޑޯ އަށް ފުރަތަމަ 11 އިން ޖާގަ ދީފައެވެ.

ސިޓީއާ ދެކޮޅަށް ރޮނާލްޑޯ ފުރަތަމަ 11 ގައި ހިމަނާނެކަމަށް ބެލުވުނު ނަމަވެސް، މުޅި މެޗު ރޮނާލްޑޯ ނިންމާލީ ބެންޗުގައި އިނދެގެންނެވެ. އެކަމާ ގުޅިގެން ވާހަކަ ދައްކަމުން ޓެން ހާގް ބުނީ، މެޗުގައި ރޮނާލްޑޯ ބޭނުން ނުކުރީ، އޭނާގެ ކެރިއަރަށް ކުރާ އިޙްތިރާމެއްގެ ސަބަބުން ކަމަށެވެ. މީގެ އިތުރުން ޓެން ހާގް ބުނީ މާޝިއަލް ކުޅެން އެރުވީ، އޭނާ އަށް ވަގުތު ބޭނުންވާތީ ކަމަށެވެ.

ޓެން ހާގް ވަނީ ޔުނައިޓެޑުން ލިވަޕޫލާއި، އާސެނަލާ ދެކޮޅަށް ކުޅުނު އިރު ފެނުނީ ޓީމެއްގެ ގޮތުގައި މަސައްކަތް ކުރި ތަން ކަމަށެވެ. އޭނާ ބުނީ ޔުނައިޓެޑުން އެންމެ ފަހުން ކުޅުނު ފަސް މެޗުގައި ވެސް ރަނގަޅު ކުޅުން ފެނުނު ކަމަށާއި، އިދިކޮޅު ޓީމު ޖެހިލުންވާ ކުޅުމެއް ދެއްކުނު ކަމަށެވެ. ނަމަވެސް ސިޓީއާ ދެކޮޅަށް ފެނުނީ އޭގެ އިދިކޮޅު ކަމަށެވެ.

ސިޓީ އަތުން ބަލިވެ ޔުނައިޓެޑް އޮތީ 12 ޕޮއިންޓާއެކު ތާވަލްގެ ހަ ވަނަ މަގާމުގައެވެ.