އިހުސާސްތައް ބުނެ ނުދެވުނަމަވެސް ކިޔެވި ޤުރުއާނާއެކު މުޅި ދުނިޔެ އަޖައިބުކޮށްލައިފި

އައިމިނަތު މުހައްމަދާއި އަބްދުލް ޤާދިރު ޤާސިމްގެ ކައިވެންޏަށް މިއަހަރު 26 އަހަރު ފުރިފައިވާއިރު އެމީހުންގެ ފަސް ދަރިން އެބަތިއްބެވެ. އޭގެ ތެރެއިން 3 ވަނަ ދަރިފުޅަކީ އަލްހާފިޒް އަހުމަދު ނަބީހު އަބްދުލްޤާދިރުއެވެ. ތިން މަހުން ފެށިގެން ވެސް ދަރިފުޅުގެ ތަފާތުކަމެއް ހުރި ކަމަށް ނަބީހުގެ މަންމަ އަށް ފާހަގަކުރެވުނެވެ. އެހެންނަމަވެސް ދަރިފުޅަކީ ނުކުޅެދުންތެރިކަން ހުންނަ ކުއްޖެއްކަން ޔަޤީންވީ ނަބީހަށް އުމުރުން ދެ އަހަރު ފުރުނު ފަހުންނެވެ. އެކަން އެނގުމުން ނަބީހުގެ މަންމަ އާއި ބައްޕަ ވަރަށް ދެރަވިއެވެ. އެހެންނަމަވެސް އެހެން ދަރިންނެކޭ އެއްފަދައިން ނަބީހު އަކީ ވެސް މާތްﷲ ދެއްވި އަމާނާތަކަށްވުމުން އެމައިންބަފައިން އަޒުމް ކަނޑައެޅީ ވީ އެންމެ ރަނގަޅަކަށް ދަރިފުޅު ތަރުބިއްޔަތު ކުރުމަށެވެ.

ނަބީހު ތަރުބިއްޔަތު ކުރަމުން އައިރު ބައެއް މީހުން ވަރަށް ހިތުގައި ޖެހޭ ފަދަ ބަސްތައް ވެސް ބުނެފައިވާ ކަމަށް އައިމިނަތު ބުންޏެވެ.

އެންމެ ކުޑައިރުއްސުރެން ޤުރުއާނަށް ޝައުޤުވެރިކަން ނަބީހު ހުންނަކަން ފާހަގަކުރެވުނެވެ. އެގޮތުން ދެ ނަމާދު ދޭތެރޭ ޓީވީން އަންނަ ޤުރުއާން އަޑުއެހުމަށާއި ބަންގި ގޮވާއަޑަށް ނަބީހު ކޮންމެ ތާކު ހުއްޓަސް އަޑުއަހެމަށް ނިކުމެއެވެ.  

ނަބީހު ޤުރުއާން ކިޔެވުމަށް ހުރި ޝައުޤުވެރިކަމެއްގެ ސަބަބުން އޭނަގެ މައިންބަފައިން ނިންމީ ދަރިފުޅު އެ ރޮނގުން އިތުރަށް ކުރިއަށް ގެންދިޔުމަށެވެ. ނަމަވެސް މިކަމުގައި ވެސް ގިނަ ގޮންޖެހުންތަކާއި ކުރިމަތިވިއެވެ. އެއީ ނަބީހު އަކީ ނުކުޅެދުންތެރިކަން ހުންނަ ކުއްޖަކަށްވުމުން ނަބީހުއަށް ކިޔަވައިދޭން އުނދަގޫވުމުންނެވެ. އަދި ބައެއް ފަހަރަށް މި ކުއްޖާއަށް މިކަން ނުވާނެ ނުވަތަ ނުކުރެވޭނޭ ބުނެ ގެއަށް ފޮނުވާލާފަވެސް އެބަހުއްޓެވެ.

ގޮންޖެހުންތަކާއެކު ވެސް ނަބީހުގެ މަންމަ އާއި ބައްޕަ އަޒުމް ކަނޑައެޅީ ނަބީހު ޝައުޤުވެރިކަން ހުންނަ ދާއިރާއަކުން ކުރިއަށް ގެންދިޔުމަށެވެ. އެގޮތުން ރާއްޖެއާއި ރާއްޖޭއިން ބޭރުގެ ޤުރުއާން މުބާރަތްތަކުގައި ވެސް ނަބީހު ބައިވެރި ކުރުވަން ފެށިއެވެ. ނުކުރެވޭނޭ ނުވާނެ ބުންޏަސް ނަބީހުއާ މެދު ދެކެމުންއައި ފޮނި އުންމީދުތަކެއް ދުލެއް ނުކުރެއެވެ. މައިންބަފައިންގެ އުންމީދާ އެއްވަރަށް ނަބީހު ވެސް ދިޔައީ އެކި މުބާރާތްތަކުން ވަނަ ހާސިލް ކުރަމުންނެވެ.

އެގޮތުން ސައުދީއަރަބިއްޔާގައި ކުރިއަށްދިޔަ 42 ވަނަ "ކިންގް އަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤުރުއާން" ގެ ފައިނަލަށް ގޮސް އަލްހާފިޒް އަހުމަދު ނަބީހު އަބްދުލްޤާދިރު ވަނީ މުޅި ދުނިޔެ ވެސް އަޖައިބުކޮށްލާފައެވެ. އެ މުބާރާތުގައި 111 ޤައުމަކުން ބައިވެރިވި 153 މީހުންނާ ވާދަކޮށް ނަބީހު ވަނީ ރާއްޖޭގެ ނަން ރޯޝަން ކޮށްދީފައެވެ.

ނަބީހު ޤުރުއާން ކިޔެވުމުން މުޅި ދުނިޔެ އަޖައިބުކޮށްލާފައިވާއިރު އޭނާގެ މައިންބަފައިން ވެސް ތިބީ ތަޖުވީދު މަގަށް ނަބީހު ޤުރުއާން ކިޔެވުމުން އަޖައިބުވެފައެވެ. އަންތަރީސްވެފައެވެ. ސަބަބަކީ ތަނަކަށް ތަދުވިޔަސް ބުނެދޭން ނޭނގޭ ކުއްޖަކު، އެހާ ރީތިކޮށް އެހާ ފުރިހަމަކޮށް ޤުރުއާން ކިޔާވާތީއެވެ.

ނަބީހު އުމުރުން މިހާރު 20 އަހަރު ފުރިފައިވާއިރު އިހުސާސްތައް ބޭރުކުރަން އަދިވެސް އުނދަގުލެވެ. އިހުސާސްތައް އަދިވެސް ބޭރު ކުރަނީ ރުޅި ދެއްކުމުންނާއި ރުއިމުންނެވެ.

ނަބީހުގެ ބައްޕަ ޤާދިރު ބުނިގޮތުން ނަބީހުއަށްޓަކައި ބޮޑެތި ޤުރުބާނީތަކެއްވީ އޭނާގެ އަންހެނުން އަދި ނަބީހު މަންމަ އައިމިނަތުއެވެ. އެއީ ވަރަށް ތަފާތު މަންމައެއް ކަމަށް ބުންޏެވެ. އަދި އަނބީމީހާއާ ދޭތެރޭގައި އިންތިހާއަށް ފަޚުރުވެރިވާކަމަށް ވެސް ބުންޏެވެ.

ޖުމްލައެއް ފުރިހަމަ ކުރަން ވެސް ނަބީހުއަށް ވީ އުނދަގޫ ކަމަކަށެވެ. އަޅުގަނޑު ނަބީހުއާ ތިން ހަތަރު ސުވާލެއް ކުރުމުން ވެސް ނަބީހުއަކަށް ރަނގަޅަކަށް ޖަވާބެއް ނުދެވުނެވެ. އިހުސާސްތައް ބޭރު ކުރަން ބޭނުންވި ނަމަވެސް އަނގައިން ނިކުންނަނީ ދެތިން ބަހެވެ. އެހެންނަމަވެސް ޤުރުއާން ކިޔަވާލަން ބުނުމުން ނަބީހު ކިޔެވިލެއް ފުރިހަމަކަމުން އަޅުގަނޑު ވެސް އަޖައިބުވިއެވެ. އެއްވެސް ހުއްޓުމެއް ނެތި ފުރިހަމަކަމާއެކު ކިޔަވާ ނިންމާލީއެވެ. މިއީ ހަޤީޤަތުގައި ވެސް މާތްﷲ ގެ ކުޅަދުންވަންތަކަމޭ ހިތަށް އެރިއެވެ.

ނަބީހުގެ އޮތީ އެންމެ އުންމީދެކެވެ. ކޮންމެވެސް ދުވަހަކުން އިމާމަކަށްވުމެވެ. އޭނަގެ މި ހުނަރު ވެސް ވަނީ ދައްކާލާފައެވެ. ނަބީހު އަކީ ލިބުނު ބޮޑު ނިއުމަތެއްކަމަށް އޭނަގެ އާއިލާ އިން ޤަބޫލުކުރެއެވެ. އަދި ނުކުޅެދުންތެރިކަން ހުންނަ ކުދިންގެ މައިންބަފައިން ހިތްވަރާއެކު މާތްﷲ އަށް ދުޢާކޮށް ކެތްތެރިކަމާއެކު ކުރިއަށް ދިޔުމަށް ވަނީ ނަސޭހަތްތެރިވެފައެވެ. މިފަދަ ކޮންމެ ކުއްޖަކު ހާފިޒަށް ނުވި ނަމަވެސް ހެޔޮ ގޮތުގައި ތަރުބިއްޔަތުކޮށްދިނަމަ ދެ ދުނިޔޭއިން ވެސް ލިބެން ހުރީ ހުސް ސަވާބާއި ދަރުމަކަން ޔަޤީނެވެ.