ކިންގް އަބްދުލް ޢަޒީޒް ޤުރުއާން މުބާރާތުގެ ފައިނަލަށް ނަބީހު
ނަބީހުގެ އިތުރުން މި މުބާރާތުގައި މުޙައްމަދު ޔޫޝަޢު ބިން ޒަމްޒަމް ވެސް ބައިވެރިވި
ނަބީހު މުބާރާތުގައި ކިޔަވަނީ
ސައުދީއަރަބިއްޔާގައި ކުރިއަށްދާ 42 ވަނަ "ކިންގް އަބްދުލް ޢަޒީޒް އިންޓަރނޭޝަނަލް ކޮމްޕެޓިޝަން އޮފް ދަ ހޮލީ ޤުރުއާންް" ގެ ފައިނަލަށް ރާއްޖެ ތަމްސީލް ކުރަމުން އަންނަ އަލްހާފިޒް އަހުމަދު ނަބީހު އަބްދުލްޤާދިރު ހޮވިއްޖެއެވެ.
މި މުބާރާތަށް ރާއްޖެއިން ދެ ބައިވެރިން ވަނީ ފޮނުވާފައެވެ. އެއީ ނަބީހުގެ އިތުރުން މުޙައްމަދު ޔޫޝަޢު ބިން ޒަމްޒަމްއެވެ. މި މުބާރާތަކީ ސަޢުދީގައި ބާއްވާ ޤުރުއާން ކިޔެވުމުގެ އެންމެ ބޮޑު ބައިނަލްއަޤްވާމީ އެއް މުބާރާތެވެ.
މި މުބާރާތުގެ ފައިނަލް ބުރަށް ނަބީހު ހޮވުމަކީ ރާއްޖެއަށް ލިބުނު ވަރަށް ބޮޑު ކާމިޔާބީއެއް ކަމަށް ޤުރުއާނާ ބެހޭ ޤައުމީ މަރުކަޒުން ބުންޏެވެ.
މިމަހުގެ 10 އިން 21 އަށް ކުރިއަށްދާ މި މުބާރާތަށް ރާއްޖެ ތަމްޞީލުކުރާނެ ބައިވެރިން ހޮވާފައިވަނީ ޤުރުއާނާބެހޭ ޤައުމީ މަރުކަޒުން ކުރިއަސްގެންދިޔަ އޮޑިޝަންއަކުންނެވެ. މި އޮޑިޝަން ކުރިއަށް ގެންގޮސްފައިވަނީ ބެލެނިވެރިންގެ ހާޒިރުގައި ފަނޑިޔާރުންގެ ޕެނަލަކުންނެވެ. މި މުބާރާތުގައި ބައިވެރިވުމަށް ހުޅުވާލުމުން 6 ފަރާތަކުން އެޕްލިކޭޝަން ހުށަހަޅާފައިވެއެވެ.
އިސްލާމިކް މިނިސްޓްރީން މައުލޫމާތު ދޭ ގޮތުގައި މި މުބާރާތުގައި ދުނިޔޭގެ 111 ޤައުމަކުން 153 ބައިވެރިން ބައިވެރިވެއެވެ. މީގެ ތެރޭގައި ދާއިރާއިން ޕީއެޗްޑީ އަދި މާސްޓަރސް ފެންވަރަށް ކިޔަވައިގެން ތިބި ފަރާތްތައް ވެސް ހިމެނެއެވެ.
މި މުބާރާތުގެ ބައިވެރިންގެ ހުރިހާ ޚަރަދެއް ކޮށްފައިވަނީ ޤުރުއާން މުބާރާތް އިންތިޒާމް ކުރި ފަރާތުންނެވެ.
މި މުބާރާތުގެ ނަތީޖާ ފާޅުކުރުމަށްފަހު، ބައިވެރިން އެނބުރި ރާއްޖެ އައުމަށް ހަމަޖެހިފައިވަނީ މިމަހުގެ 23 ވަނަ ދުވަހުއެވެ. މި މުބާރާތުގެ ތެރެއިން ބައިވެރިންނަށް ޢުމްރާގެ އަޅުކަން އަދާކުރުމުގެ ފުރުޞަތު ފަހިކޮށްދިނުމުގެ އިތުރުން މަދީނާގެ ޓުއަރއެއްވެސް ދޭނެއެވެ.
އަލްހާފިޒް އަހުމަދު ނަބީހު އަބްދުލްޤާދިރު ވަނީ މި އަހަރުގެ ކުރީކޮޅު ދުބާއީގައި ބޭއްވި ބައިނަލްއަގުވާމީ ޤުރުއާން މުބާރާތެއްގައި ވެސް ފައިނަލަށް ދަތުރުކޮށްފައެވެ.
