އެމްއޭސީއެލްގެ ފްލެޓްތައް މުވައްޒަފުންނާ ހަވާލުކޮށްފި
އެމްއޭސީއެލްއިން އިމާރާތްކޮށްފައިވަނީ 14 ބުރީގެ ދެ ޓަވަރުގައި، 384 އެޕާޓްމަންޓް
އެމްއޭސީއެލްގެ ފްލެޓްތައް ހަވާލުކުރުން
ވެލާނާ އިންޓަރނޭޝަނަލް އެއާޕޯޓް ހިންގާ ކުންފުނި އެމްއޭސީއެލްއިން އިމާރާތްކޮށްފައިވާ ފްލެޓްތަކުގެ މަސައްކަތް ނިންމައި، އެ ފްލެޓްތައް މުވައްޒަފުންނާ ހަވާލުކޮށްފިއެވެ.
އެ ފްލެޓްތަކުގެ ހައްގުވެރިންނާ ފްލެޓްގެ ތަޅުގަނޑި ހަވާލުކޮށްފައިވަނީ ހޮނިހިރު ދުވަހު ހެނދުނު ހުޅުމާލޭ ދެވަނަ ފިޔަވަހީގައި ބޭއްވި ރަސްމިއްޔާތެއްގައެވެ. 14 ފަންގިފިލާގެ ދެ ޓަވަރު ހިމެނޭހެން އިމާރާތްކޮށްފައިވާ އޭރޯ ރެސިޑެންސް ފްލެޓްތަކުގައި ހިމެނެނީ ޖުމުލަ 384 އެޕާޓްމަންޓެވެ. އޭގެ ތެރޭގައި ހިމެނެނީ ދެ ކޮޓަރީގެ 240 އެޕާޓްމަންޓާއި އެއް ކޮޓަރީގެ 72 އެޕާޓްމަންޓެވެ.
މީގެ އިތުރުން އެ ފްލެޓްތަކަށް ފައިސާ ދެއްކުމަށް ކުރިން ކަނޑައެޅި 15 އަހަރު ދުވަހުގެ މުއްދަތު މިހާރު ވަނީ 20 އަހަރު ދުވަހަށް އިތުރުކޮށްދީފައެވެ. އެމްއޭސީއެލްއިން ވަނީ އެ ފްލެޓްތަކަށް ފައިސާއާއި ޑައުންޕޭމަންޓް ދެއްކުމުގައި ލުއި އިންތިޒާމުތަކެއް މުވައްޒަފުންނަށް ހަމަޖައްސައިދީފައިވާކަން ފާހަގަކޮށްފައެވެ.
މި ފްލެޓްތަކުގެ މަސައްކަތަކީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި ކުންފުނިތަކަށް ހުޅުވާލި ބޯހިޔާވަހިކަމުގެ މަޝްރޫއުގެ ދަށުން ހިންގި މަޝްރޫއެކެވެ. މި މަސައްކަތް ކޮށްފައި ވަނީ ޗައިނާގެ ބީޔޫސީޖީ ކުންފުނިންނެވެ.
