މިލިޓާއޯގެ އެއްބަސްވުން ރެއާލުން އައުކުރަނީ

ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ޑިފެންޑަރު އެޑާ މިލިޓާއޯގެ އެއްބަސްވުން އައުކުރުމަށް އެ ކުލަބުން ނިންމައިފިއެވެ.

އުމުރުން 24 އަހަރުގެ ޒުވާން ޑިފެންޑަރު ރެއާލަށް ބަދަލުވީ 2019 ވަނަ އަހަރުއެވެ. އޭގެ ފަހުން އޭނާ އަންނަނީ ރެއާލްގައި ރަނގަޅު ކުޅުމެއް ދައްކަމުންނެވެ.

ސްޕެއިންގެ މީޑިއާތަކުގައި ރިޕޯޓުކޮށްފައިވާ ގޮތުން މިލިޓާއޯގެ އެއްބަސްވުން އައުކުރުމަށް އޭނާއާއެކު ރެއާލަށް ވަނީ އަނގަބަހުން އެއްބަސްވުމަކަށް އާދެވިފައެވެ. ޖުލައި މަހުން ފެށިގެން އެއްބަސްވުމަކަށް އާދެވިފައިވާއިރު، މިހާރު ރެއާލުން ކުރަމުން އަންނަނީ ލިޔެ ކިޔުންތައް ތައްޔާރުކުރުމުގެ މަސައްކަތް ކަމަށްވެސް ރިޕޯޓުތައް ބުނެއެވެ. ރިޕޯޓުތައް ބުނާގޮތުން, ރެއާލުން މިލިޓާއޯއަށް ހުށަހަޅާ އައު އެއްބަސްވުމުގެ ދަށުން 2028 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި މަޑުކުރާނެއެވެ.

މިލިޓާއޯ ވަނީ މިހާތަނަށް ރެއާލަށް 94 މެޗު ކުޅެދީ، ހަތަރު ލަނޑު ޖަހާފައެވެ. އެ ކުލަބާއެކު އޭނާ ވަނީ ސްޕެނިޝް ލީގާއި، ސްޕެނިޝް ސުޕަރ ކަޕާއި، ޔުއެފާ ޗެމްޕިއަންސް ލީގު އަދި ޔުއެފާ ސުޕަރ ކަޕް ކާމިޔާބުކޮށްފައެވެ. ބްރެޒިލްގެ ގައުމީ ޓީމުގައިވެސް ހިމެނޭ މިލިޓާއޯއަކީ އެ ޓީމުގެ މުހިންމު ކުޅުންތެރިޔެކެވެ.