މެސީގެ އެއްބަސްވުން އައުކުރުމަށް ޕީއެސްޖީން މަސައްކަތްކުރަނީ

ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީގެ އެއްބަސްވުން އައުކުރުމަށް އެ ކުލަބުން މަސައްކަތްކުރާ ކަމަށް މީޑިއާ ރިޕޯޓުތައް ބުނެފިއެވެ.

ބާސެލޯނާ ދޫކޮށް މެސީ ޕީއެސްޖީއަށް ބަދަލުވީ 2021 ވަނަ އަހަރުއެވެ. އެއީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން ޕީއެސްޖީއާއެކު މެސީ ހަދާފައިވާ އެއްބަސްވުމުގެ މުއްދަތު އަންނަ އަހަރު ހަމަވާނެއެވެ. މި އެއްބަސްވުމުގެ މުއްދަތު ހަމަވާއިރު، މެސީ ހޯދުމުގެ މަސައްކަތް އޭނާގެ ކުރީގެ ކުލަބު ބާސެލޯނާއިން ކުރަމުން އަންނަކަމަށްވެސް މީޑިއާ ރިޕޯޓުތައް ވަނީ ބުނެފައެވެ.

ބޭރުގެ މީޑިއާތަކުގައި ރިޕޯޓުކޮށްފައިވާގޮތުން، ޕީއެސްޖީން ބޭނުންވަނީ މެސީ އެ ކުލަބުގައި މަޑުކުރާށެވެ. ދާދި ފަހުން ޕީއެސްޖީގެ ސްޕޯޓިންގ ޑިރެކްޓަރުވެސް ވަނީ މެސީ އެ ކުލަބުގައި ހުންނަން އެދޭކަމަށް ބުނެފައެވެ. މީޑިއާ ރިޕޯޓުތައް ބުނާގޮތުގައި ޕީއެސްޖީން މިހާރު ވަނީ މެސީއަށް އައު އެއްބަސްވުމެއް ހުށަހަޅާފައެވެ. އެއީ އިތުރު އެއް އަހަރު އެ ކުލަބުގައި މަޑުކުރުމަށެވެ. މި އެއްބަސްވުމުގައިވާ ގޮތުން މެސީއަށް މިހާރު ލިބޭ މުސާރައަށްވުރެ ބޮޑު މުސާރައެއްވެސް ވަނީ ހުށަހަޅާފައެވެ.

ޕީއެސްޖީން މެސީއަށް އައު އެއްބަސްވުމެއް ހުށަހެޅިނަމަވެސް، މެސީ އޭނާގެ ކުރިމަގާމެދު ގޮތެއް ނިންމާނީ މިއަހަރުގެ ނޮވެމްބަރު މަހު ގަތަރުގައި ފަށާ ފީފާ ވޯލްޑްކަޕަށްފަހު ކަމަށް ތަޖުރިބާކާރުން ބުނެއެވެ.