ސްރީލަންކާގައި ކަރަންޓު ކަނޑާ ގަޑި އިތުރުކުރަންޖެހުނީ ފެންވަރު ދަށް ކްރޫޑް އޮއިލް ބޭނުން ކުރުމުގެ ސަބަބުން ބައެއް އިންޖީނުތައް ހުއްޓެން ދިމާވުމުން ކަމަށް، އެގައުމުގެ ކަމާބެހޭ އިސް އޮފިޝަލަކު ވިދާޅުވެއްޖެއެވެ. ޕަބްލިކް ޔުޓިލިޓީސް ކޮމިޝަންގެ ވެރިޔާ ޖަނަކަ ރަތުނަޔަކަ ވިދާޅުވީ, މިހާރު ބޭނުންކުރާ ތެލުގައި ސަލްފަރ އެކުލެވޭލެއް މާ މަތިކަމަށެވެ. ނަތީޖާއެއްގެ ގޮތުން މާބޮޑަށް ދުން އަރައި، އަދި އިންޖީނުތައް ހުއްޓެނީކަމަށް އޭނާ ވިދާޅުވިއެވެ.

އިގުތިސާދީ ގޮތުން ދިމާވި އަޑިގަނޑުން މަޑުމަޑުމަޑުން އަރައިގަތުމަށް މަސައްކަތްކުރާއިރު، ސްރީލަންކާގައި އަދިވެސް އަންނަނީ ވަކި ގަޑިތަކެއްގައި ކަރަންޓު ކަނޑަމުންނެވެ. މިގޮތުން ކަރަންޓު ކަނޑާ ވަގުތު އެއްގަޑިއިރާ ދިހަ މިނެޓަށް ގެންދިއުމަށްފަހު މިދިޔަ ހަފުތާގައި ވަނީ ވަގުތު އޭގެ ގާތްގަޑަކަށް ދެގުނަ، ނުވަތަ ދެގަޑިއިރާ ވިހި މިނެޓަށް އިތުރުކޮށްފައެވެ.

ސްރީލަންކާގައި ބޭނުންކުރާ ކަރަންޓުގެ 10 އިންސައްތަ އުފައްދަނީ ޑީސަލް ބޭނުންކޮށްގެން ހިންގާ އިންޖީނުތަކުންނެވެ. އަނެއްބައި، އިއާދަ ކުރަނިވި ހަކަތައިގެ އިތުރުން ދެލި ބޭނުންކޮށްގެން ހިންގާ އިންޖީނު ތަކުންވެސް ހޯދައެވެ.

ޔުޓިލިޓީސް ކޮމިޝަންގެ ވެރިޔާ ވިދާޅުވި ބަސްފުޅަށް ސްރީލަންކާގެ ޕަވަރ އެންޑް އެނަރޖީ މިނިސްޓަރ ކަންޗަނާ ވިޖޭސޭކަރަ ވަނީ ރައްދު ދެއްވާފައެވެ. އޭނާ ވިދާޅުވާގޮތުގައި ކަރަންޓު ކަނޑާ ވަގުތު އިތުރުކުރަން ޖެހުމުގައި ތަފާތު ސަބަބުތައް އެބަހުއްޓެވެ. މިގޮތުން އޭނާ ވިދާޅުވާގޮތުގައި މިގޮތަށް ކަންތައްކުރަން ޖެހުނީ ހައިޑްރޯ ޕަވަރސްޓޭޝަނެއް މަރާމާތަށް ބަންދުކުރުމާއި އަދި އިތުރު ޑީސަލްއާއި ފިއުލް ގަންނާނެ ފައިސާ މިވަގުތު ނެތުމުން ކަމަށެވެ.