ރަޝިއާގެ އަސްކަރިއްޔާއިން މިހާރު ޔޫކްރައިންގައި ކުރަމުންދާ ވަރުގަދަ ހަނގުރާމާގައި އިންޑިއާ އޮތީ "ސުލްޙައިގެ ފަޅީގައި" ކަމަށާއި، އިންޑިއާއިން "ސާބިތުކަމާއެކު ދެމި އޮންނާނީވެސް" ހަމަ އެ ފަޅީގައި ކަމަށް، އދގެ އާންމު މަޖިލީހުގައި އިންޑިއާއިން ބުނެފިއެވެ.

ކަން މިހެން އޮތް އިރު ރަޝިއާއަކީ އިންޑިއާގެ ޒަމާންވީ ވިޔަފާރިއާއި ދިފާއީ ގުޅުންތަކުގެ ބައިވެރިއެއްކަން ފާހަގަ ކުރުން މުހިންމެވެ. ރަޝިއާގެ އަސްކަރިއްޔާއިން ފެބުރުއަރީ މަހު ޔޫކްރައިންގައި ހަނގުރާމަ ފެށިފަހުން، ރަޝިއާ އަތުން އިންޑިއާއިން ތެލާއިން ބޯޓުދެލި ގަންނަ މިންވަރު ވަނީ އިތުރު ކޮށްފައެވެ.

އަސްކަރީ ހާއްސަ އޮޕަރޭޝަނެއްގެ ނަމުގައި ރަޝިއާއިން ޔޫކްރައިންގައި ކުރަމުންދާ ހަނގުރާމަ، ސާފު އިބާރާތުން ކުށްވެރިކޮށް، އިންޑިއާއިން އަދި މިހާތަނަށް، ވާހަކަ ދައްކާފައެއް ނުވެއެވެ. ނަމަވެސް ރަޝިއާގެ ރައީސް ވްލެޑްމިއަރ ޕުޓިންއާއެކު ހުސްވި ހަފުތާގައި ކުރިއަށް ގެންދެވި ބައްދަލުވުމެއްގައި، އިންޑިއާގެ ބޮޑުވަޒީރު ނަރޭންދްރާ މޯދީ ވަނީ، މިއީ ހަނގުރާމައިގެ ދުވަސްވަރަކަށް ހެދެން ނެތް ކަމަށް ވިދާޅުވެފައެވެ.

އެމެރިކާގައި މިހާރު ކުރިއަށްދާ އދގެ އާންމު މަޖިލީހުގައި ތަގުރީރު ކުރައްވަމުން އިންޑިއާގެ ފޮރިން މިނިސްޓަރު ޑރ އެސް ޖައިޝަންކަރު ވިދާޅުވީ، އިންޑިއާ އޮތީ މަޝްވަރާތަކަށް ގޮވާލާ ފަޅީގައި ކަމަށާއި، އަދު އޮތް ހާލަތުން މިންޖުވެވެން އޮތް ހަމައެކަނި ގޮތަކީ ޑިޕްލޮމަސީ ކަމަށެވެ.

2 ވަނަ ބޮޑު ހަނގުރާމައަށް ފަހު ރަޝިއާއިން ފުރަތަމަ ފަހަރަށް ހަނގުރާމައިގެ ސަފުތައް ރުކުރުވާލުމުގެ ސީދާ ނަމުގައި އަސްކަރީ ހަރަކާތްތައް ވަރުގަދަ ކުރުމަށް ޕުޓިން ގޮވާލެއްވީ ސެޕްޓެމްބަރު 21 ވަނަ ދުވަހުއެވެ. އަދި ޤައުމުގެ ދިފާޢުގައި ނިއުކްލިއަރ ހަތިޔާރުގެ ބާރުގެ ބޭނުން ކުރައްވާނެ ކަމަށްވެސް ވަނީ އިންޒާރު ދެއްވާފައެވެ.

ދުނިޔޭގެ އެންމެ ނުފޫޒުގަދަ ޤައުމުގެ މަޤާމުގައި އޮތް އެމެރިކާއިން ދަނީ، އަސްކަރީ އަދި ދިފާއީ ބާރުވެރިކަމުގެ ދާއިރާއިން ރަޝިއާގެ މައްޗަށް އިންޑިއާއިން ބަރޯސާވާ ބަރޯސާވުން ކުޑަ ކުރުމަށް މަސައްކަތްތަކެއް ކުރަމުންނެވެ.

ޔޫކްރައިންގައި ހަނގުރާމަ ފެށިފަހުން އެކަނިވެސް، އެމެރިކާގެ އެތައް އޮފިޝަލުންނެއް ވަނީ އިންޑިއާއަށް ޒިޔާރަތް ކުރައްވާ، ރަޝިއާ ސަރުކާރާއި އިންޑިއާގެ ގުޅުންތައް ކުޑަ ކުރުމަށް ބާރު ދިނުމުގެ ގޮތުން، އިންޑިއާއަށް ދިފާއީ އާލާތްތައް ހުށަހަޅުއްވާފައެވެ. އަދި ރަޝިއާ އަތުން ގަންނަ ހަކަތައިގެ މިންވަރު ކުޑަ ކުރުމަށްވެސް އެމެރިކާއިން ދަނީ މަސައްކަތްތަކެއް ކުރަމުންނެވެ.

ބައިނަލްއަގުވާމީ ފެންވަރުގައި އެންމެ ގިނަ ޤައުމުން އެއްތަނެއްގައި މަޝްވަރާ ކުރާ އދގެ އާންމު މަޖިލީހުގައި ވާހަކަދައްކަވަމުން ޖައިޝަންކަރު އިތުރަށް ވިދާޅުވީ، "ސަރަހައްދީ އިން ހުރަސްކޮށް، އެތައް އަހަރަކަށް ދިގުލާ ގޮސްފައިވާ ޓެރަރިޒަމްގެ އަމަލުތަކުގައި" ކަންކަމުގައި އިންޑިއާއިން ގެންގުޅެނީ "ޒީރޯ ޓޮލަރެންސް"ގެ ސިޔާސަތު ކަމަށް ވިދާޅުވެފައެވެ. އެއީ އިންޑިއާގެ އަވަށްޓެރި، ނަމަވެސް އިންތިހާ ހަތުރުވެރި ޗައިނާއާއި ޕާކިސްތާނަށް އަމާޒު ކުރެއްވި ބަހުގެ ހަމަލާއެކެވެ. އަދި އދއަށްވެސް ޖައިޝަންކަރު ވަނީ ހަމަލާތަކެއް ދެއްވާފައެވެ.

ކަން މިހެން އޮތް އިރު ޗައިނާގެ ރައީސް ޝީ ޖިންޕިން އާއި މޯދީ ވަނީ، ސެޕްޓެމްބަރު 16 ވަނަ ދުވަހު އޮތް ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓްގައި އެކުގައި ފޮޓޯފުޅެއް ނަންގަވާފައެވެ. މިއީ 2020 ވަނަ އަހަރު ޗައިނާއާއި އިންޑިއާގެ ގުޅުންތައް އިންތިހާ ނުރައްކާ ދަރަޖައަކަށް ހޫނުވި ފަހުން 2 ޤައުމުގެ އެންމެ އިސް ލީޑަރުން އެކުގައި ފެނުނު ފުރަތަމަ ފަހަރެވެ.