އިންޑިއާ އާއި ޗައިނާ އެއްބަޔަކު އަނެއްބަޔަކު ދެކެން ވާނީ "ބައިވެރިން" ގެ ގޮތުގައި ކަމަށާއި "އަދާވާތްތެރިން ނުވަތަ ނުރައްކަލެއްގެ ގޮތުގައި ނޫން" ކަމަށް ޗައިނާގެ ޚާރިޖީ ވަޒީރު ވަންގ ޔީ ހޯމަ ދުވަހު ވިދާޅުވެއްޖެ އެވެ.

އޭނާ މިހެން ވިދާޅުވީ، ދިއްލީ އަށް ކުރައްވާ ދެ ދުވަހުގެ ދަތުރުފުޅެއްގަ އެވެ.

މި ދަތުރުފުޅުގައި ޔީ އާއި އިންޑިއާގެ ޚާރިޖީ ވަޒީރު އެސް. ޖައިޝަންކަރ ބައްދަލުކުރެއްވިއެވެ. މިއީ 2020 ވަނަ އަހަރުން ފެށިގެން ދެ ފަރާތުގެ މެދުގައި ބޭއްވުނު ދެވަނަ ބައްދަލުވުމެވެ. ދެ ގައުމުގެ ގުޅުން އެންމެ ފަހުން ގޯސްވީ ހިމާލަޔާގެ ބޯޑަރު ސަރަަހައްދުގެ ގަލްވާން ވެލީ ގައި ހިނގި ހަމަ ނުޖެހުން ތަކަކާ ގުޅިގެން ނެވެ.

މިހާރު ގުޅުންތައް "އެއްބާރުލުމުގެ މަގަށް އެނބުރި އައިސްފައިވާ" ކަމަށް، އަންގާރަ ދުވަހު އިންޑިއާގެ ބޮޑުވަޒީރު ނަރެންދްރަ މޯދީއާ ބައްދަލު ކުރެއްވުމުގެ ކުރިން ޔީ ވިދާޅުވި އެވެ.

ޖައިޝަންކަރ ވިދާޅުވީ، އިންޑިއާ އާއި ޗައިނާ "ގުޅުންތަކަށް ދިމާވި ދަތި ދުވަސްވަރަކުން އަރައިގަނެ ކުރިއަށް ދިއުމަށް މަސައްކަތް ކުރަމުންދާ" ކަމަށެވެ.

ޗައިނާގެ ޚާރިޖީ ވަޒީރުގެ ދަތުރުފުޅުގައި ގިނަ މައުޟޫއު ތަކަކަށް ދެފަރާތުން ވަނީ މަޝްވަރާ ކޮށްފައެވެ. އޭގެ ތެރޭގައި ވިޔަފާރިން ފެށިގެން ދެގައުމުގެ މީހުން އެއް ގައުމުން އަނެއް ގައުމަށް ޒިޔާރަތް ކުރުމާއި، ކޯރުތަކުގެ މަޢުލޫމާތު ޙިއްޞާކުރުމާ ބެހޭ މައްސަލަަތައް ހިމެނެއެވެ.

ޔީ އަންގާރަ ދުވަހު އިންޑިއާގެ ނެޝަނަލް ސެކިއުރިޓީ އެޑްވައިޒަރ އަޖިތް ދޯވަލް އާ ވެސް ބައްދަލު ކުރެއްވިއެވެ. މިއީ ދެ ޤައުމުގެ މެދުގައި އޮތް ބޯޑަރުގެ މައްސަލައިގައި މަޝްވަރާތައް ކުރެއްވުމަށެވެ.

ދޯވަލް އާއެކު ބޭއްވުނު ވަފުދު ފެންވަރުގެ ބައްދަލުވުމުގައި ޔީ ވިދާޅުވީ "މިހާރު ބޯޑަރު ގައި އަމާންކަން ޤާއިމުވެފައިވާކަން އުފަލާ އެކު ފާހަގަ ކުރާ" ކަމަށެވެ. .

"ވޭތުވެދިޔަ ތަނުގައި ދެ ގައުމުގެ ގުޅުން ފަހަތައް ދިޔަ ދިއުމަކީ ފައިދާ ހުރި ކަމެއް ނޫން ކަމަށް އޭނާ ވިދާޅުވިއެވެ.

ޔީގެ ޒިޔާރަތް ބެލެވެނި ނިއުކްލިއަރ ހަތިޔާރު ގެންގުޅޭ މި ދެ އަވައްޓެރިން ގެ ގުޅުން ރަނގަޅު ވަމުންދާ ކަމުގެ ނިޝާނެއްގެ ގޮތުގައެވެ.

ފާއިތުވި އަހަރުގެ އޮކްޓޯބަރު މަހު އިންޑިއާ އާއި ޗައިނާ އިން ވަނީ މައްސަލަ ޖެހިފައިވާ ހިމާލަޔާގެ ބޯޑަރުގައި ހަމަނުޖެހުން ކުޑަކުރުމަށްޓަކައި ޕެޓްރޯލް ކުރުމުގެ އިންތިޒާމުތަކަކަށް އެއްބަސްވެފައެވެ.

އޭގެ ފަހުން، ދެ ފަރާތުން ވަނީ ގުޅުންތައް އާދައިގެ ހާލަތަށް ގެނައުމަށްޓަކައި ގިނަ ފިޔަވަޅުތަކެއް އަޅާފައެވެ. މީގެ ތެރޭގައި ހިމެނެނީ ޗައިނާ އިން އިންޑިއާގެ ފަތުރުވެރިންނަށް މި އަހަރު ޓިބެޓް އޮޓޮނޮމަސް ރީޖަންގެ މުހިންމު ތަންތަނަށް ޒިޔާރަތްކުރުމުގެ ހުއްދަ ދިނުމެވެ. އިންޑިއާ އިން ވެސް ވަނީ ޗައިނާގެ ފަތުރުވެރިންނަށް ވިސާ ދޫކުރުން އަލުން ފަށައި، ކަނޑައެޅިފައިވާ މަގުތަކުން ބޯޑަރު ހުރަސްކޮށް ވިޔަފާރި ފެށުމާ ބެހޭ މަޝްވަރާތައް އަލުން ފެށުމަށް އެއްބަސްވެފައެވެ.

މީގެ އިތުރުން، މި އަހަރު ދެ ޤައުމުގެ މެދުގައި ސީދާ ވައިގެ ދަތުރުތައް އަލުން ފެށޭނެ ކަމަށްވެސް ރިޕޯޓުތަކުގައި ބުނެއެވެ.

ޔީ ގެ ބައްދަލުވުންތަކުން މަގުފަހިވާނެ ކަމަށް ބެލެވެނީ މޯދީ 7 އަހަރު ފަހުން ފުރަތަމަ ފަހަރަށް ޗައިނާ އަށް ކުރައްވާ ދަތުރަށެވެ. މިއީ މި މަހުގެ ފަހުކޮޅު ޝަންހާއި ކޯޕަރޭޝަން އޯގަނައިޒޭޝަން (އެސްސީއޯ)ގެ ސަމިޓުގައި ބައިވެރިވެވަޑައިގަތުމަށް ކުރައްވާ ދަތުރެކެވެ. އެސްސީއޯ އަކީ ސަރަޙައްދީ ސަލާމަތީ ބްލޮކެކެވެ.

ރިޕޯޓުތަކުގައި ބުނާ ގޮތުގައި މޯދީ ޗައިނާގެ ރައީސް ޝީ ޖިންޕިންގ އާ ދެމެދު މަޝްވަރާތަކެއްވެސް ބާއްވަފާނެއެވެ. ނަމަވެސް މިކަން އަދި އެއްވެސް ފަރާތަކުން ކަށަވަރު ކޮށްދީފައެއް ނުވެއެވެ.

މި ދެ ޤައުމުގެ މެދުގައި ގުޅުން އިޔާދަވަމުން މި އަންނަނީ އިންޑިއާ އާއި އެމެރިކާ އާ ދެމެދު އޮތް ގުޅުން ދަށަށް ދަމުންދާ ދަނޑިވަޅެއްގައެވެ.

މި މަހުގެ ކުރީކޮޅު، އެމެރިކާގެ ރައީސް ޑޮނަލްޑް ޓްރަމްޕް ވަނީ އިންޑިއާ އިން ރަޝިޔާ ގެ ތެޔޮ އަދި ހަތިޔާރު ގަތުމާ ގުޅިގެން އިންޑިއާގެ އިމްޕޯޓުތަކަށް އިތުރު 25% ގެ އަދަބެއް ކަނޑައަޅުއްވާފައެވެ. މިއާއެކު ޖުމްލަ ޓެރިފް އަރަނީ 50% އަށެވެ. މިއީ އޭޝިއާގެ ގައުމަކުން އެމެރިކާ އިން ނަގާ އެންމެ މަތީ ޓެރިފް އެވެ.

ހޯމަ ދުވަހު، ވައިޓް ހައުސްގެ ވިޔަފާރި އާ ބެހޭ މުޝީރު ޕީޓަރ ނަވާރޯ ދަ ފައިނޭންޝަލް ޓައިމްސްގައި ލިޔުއްވާފައިވާ ލިޔުމެއްގައި އިންޑިއާ އިން "ރަޝިޔާ އަދި ޗައިނާއާ ގާތްވަމުންދާ" ކަމުގެ ތުހުމަތު ކުރައްވާފައިވެއެވެ.