ސިފައިންގެ 68 ވަނަ އަސާސީ ތަމްރީނު ކޯހުގައި 185 އޮފިސަރުން ދަސްވެނިވެއްޖެ
26 ސެޕްޓެމްބަރު 2022 | ހޯމަ 02:03މި ރަސްމިއްޔާތުގައި ހުރިހާ ގޮތަކުން އެންމެ މޮޅު ދަރިވަރުން ހޮވާފައިވޭ
އޮފިސަރުން ދަސްވެނިވުމުގެ ރަސްމިއްޔާތު
ސިފައިންގެ ޚިދުމަތާ އަލަށް ގުޅުނު ސިފައިން ތަމްރީނު ކުރުމަށް އެމްއެންޑީއެފްގެ ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީޒްއިން ހިންގި 68 ވަނަ އަސާސީ ތަމްރީނު ކޯހުގައި 185 އޮފިސަރުން ދަސްވެނިވެއްޖެއެވެ.
އެމްއެންޑީއެފް ނޮދަން އޭރިއާ ހެޑްކުއާޓަރޒް ޅ.މާފިލާފުށީގައި ޤާއިމުކޮށްފައިވާ "ދަ ބޭސިކް ސްކޫލު" ގައި ބޭއްވި ޚާއްސަ ރަސްމިއްޔާތު ޝަރަފުވެރިކޮށްދެއްވައި ވަނަވަނައަށް ހޮވުނު ފަރާތްތަކަށް އިނާމު ހަވާލުކޮށްދެއްވީ މިނިސްޓަރ އޮފް ޑިފެންސް މާރިޔާ އަޙްމަދު ދީދީއެވެ.
މި ރަސްމިއްޔާތުގައި ޑިފެންސް މިނިސްޓަރު މާރިޔާ ވަނީ ލަޝްކަރު ބަލައި ފާސްކޮށްދެއްވައި ކޯހުގެ ދަރިވަރުންނާ މުޚާތަބުކުރައްވައި ވާހަކަފުޅު ދައްކަވާފައެވެ.
68 ވަނަ އަސާސީ ތަމްރީނު ކޯހުން ހުރިހާ ގޮތަކުން އެންމެ މޮޅު ދަރިވަރަކަށް ހޮވިފައިވަނީ ޕްރައިވެޓް ޤާސިމް އަރުޒަން ޝަކީބެވެ. ޝަހީދު އަލިރަސްގެފާނު ކޮމްޕެނީގެ އެއްވަނަ ދަރިވަރަކަށް ހޮވިފައިވަނީ ޕްރައިވެޓް ޔައީޝް ސައިފުﷲ އެވެ. އަދި ޝަހީދު ޙުސައިން އާދަމް ކޮމްޕެނީގެ އެއްވަނަ ދަރިވަރަކަށް ހޮވިފައިވަނީ ޕްރައިވެޓް މުޙައްމަދު މުއާދެވެ.
68 ވަނަ އަސާސީ ތަމްރީނު ކޯސް ފުރިހަމަކޮށް ދަސްވެނިވެފައިވަނީ 185 ދަރިވަރުންނެވެ. އެއީ 168 ފިރިހެން ދަރިވަރުންނާއި 17 އަންހެން ދަރިވަރުންނެވެ. އަސާސީ ތަމްރީނު ކޯހަކީ އަލަށް ސިފައިންގެ ޚިދުމަތާ ގުޅޭ މީހުންނަށް ސިފައިންގެ އެކި ދާއިރާތަކުގައި މަސައްކަތްކުރެވޭ ފެންވަރަށް އިލްމު އުނގަންނައިދީ ތަމްރީނު ކުރުމަށް ހިންގޭ ކޯހެކެވެ.
68 ވަނަ އަސާސީ ތަމްރީނު ކޯހުގެ ދަސްވެނިވުމުގެ ރަސްމިއްޔާތުގައި އެމްއެންޑީއެފްގެ ޖެނެރަލް އޮފިސަރުންނާއި ސިފައިންގެ ސީނިއަރ އޮފިސަރުންގެ އިތުރުން ކޯހުގެ މުދައްރިބުން ބައިވެރިވެލެއްވިއެވެ.
