ތޫފާން ނޯރޫގެ ބާރުގަދަވެ ފިލިޕީންސްއާ ކައިރިވަމުންދިއުމުގެ ސަބަބުން އެގައުމަށް ދަނީ ވައިގަދަވެ ބޯކޮށް ވާރޭވެހެމުންނެވެ.
މީޑިއާ ރިޕޯޓުތައް ބުނާގޮތުން، ފިލިޕީންސްގެ އެތައް ހާސް ބަޔަކު ދަނީ މި ތޫފާނުގެ ސަބަބުން ގެދޮރު ދޫކޮށް ރައްކާތެރި މަންޒިލުތަކަށް ބަދަލުކުރަމުންނެވެ.
ތޫފާން ނޯރޫ ހިމެނެނީ ކެޓަގަރީ ތިނެއްގައެވެ. މި ތޫފާން ދަަތުރުކުރަމުން ދަަނީ ގަޑިއަކު 195 ކިލޯމީޓަރު ބާރުމިނުގައި ކަމަށާއި، މިސްރާބު ހުރީ ފިލިޕީންސްގެ މައި ރަށް، ލުޒޯންއާ ދިމާއަށް ކަމަށް ރިޕޯޓުތައް ބުނެއެވެ.
މި ތޫފާނުގެ ސަބަބުން ފިލިޕީންސްގައި ބިންގަނޑު ކަނޑައިގެންގޮސް، ކުއްލިއަކަށް ފެންބޮޑުވެ، ނުރައްކާތެރި މިންވަރަށް އުދަ އަރާނެކަމަށް ބެލެވެއެވެ.
މި ތޫފާނުގެ އަސަރު، ވެރިރަށް މެނީލާއަށްވެސް ކުރާނެކަމަށް ލަފާކޮށްފައިވެއެވެ.
