ރާއްޖޭގެ އިގުތިސާދު ކުރިއަރައި، މުދާ އެތެރެކުރަމުންދިޔަ މިންވަރާ ގާތަށްވެސް ވިޔަފާރި ބަނދަރު ތަރައްގީވެފައި ނެތްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

މޯލްޑިވްސް ޕޯޓްސް ލިމިޓެޑްގެ 36 ވަނަ އަހަރީދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، މާލޭގެ ވިޔަފާރި ބަނދަރުގެ ތާރީޚަށް ބަލާއިރުވެސް، ފާހަގަކުރަމުންދާ 36 ވަނަ އަހަރަކީ ހަގު އުމުރެއްކަމަށެވެ.

ރައީސް ވިދާޅުވީ، ވިޔަފާރި ބަނދަރު ތަރައްގީވެފައި ނެތީ، ދުރު ރާސްތާގެ ޕްލޭނެއް ނެތި، އެވަގުތު ދިމާވާ ކަމެއް ހައްލުކުރަން އުޅުމުން ކަމަށާއި، ވިޔަފާރި ބަނދަރު ތަރައްގީނުވެ އޮތުމަކީ ރާއްޖޭގެ އިގުތިސާދަށް ލިބޭ ވަރަށް ބޮޑު ގެއްލުމެއްކަމަށެވެ. އަދި އެތަނުގައި ޖާގައިގެ ދަތިކަން މިހާރުވެސް ބޮޑުކަމަށާއި، އަދި ރައްޔިތުންނަށް ޚިދުމަތް ދިނުމަށް ދަތިވާކަން ރައީސް ފާހަގަކުރެއްވިއެވެ.

ވިޔަފާރި ބަނދަރަށް ބޭރުން ގެންނަ މުދާ ވިޔަފާރިތަކަށް ފޯރުމަށް ހޭދަވާ ވަގުތު އިތުރުވުމަކީ ލިބޭ ވަރަށް ބޮޑު ގެއްލުމެއްކަމަށް ރައީސް ވިދާޅުވިއެވެ.

ރައީސް އިތުރަށް ވިދާޅުވީ، އެކަށީގެންވާ ގޮތަކަށް ޚިދުމަތް ދިނުމަށް ބަނދަރަށް ވަރަށް ބޮޑެތި ބަދަލުތަކެއް ގެންނަންޖެހުނު ކަމަށާއި އެ މަސައްކަތް ކުރަމުންދާކަމަށެވެ.

ރާއްޖޭގެ ވިޔާފަރި ބަނދުރަތަކަކީ ގައުމުގެ އިގުތިސާދީ ހުރިހާ ހަރަކާތްތަކުގައި މައިބަދަ ކަމަށާއި، އެއް ގައުމު އަނެއް ގައުމާ ގުޅުވައިދޭ މައި ފާލަމަކީވެސް ބަނދަރުތައް ކަމަށް ރައީސް ވިދާޅުވިއެވެ.

ރައީސް ވިދާޅުވީ ކުޅުދުއްފުއްޓާއި އައްޑޫގެ ބަނދަރު ނިމުމުން އިމްޕޯޓް އެކްސްޕޯޓްގެ މިންވަރަށް ބޮޑު ބަދަލެއް އަންނާނެ ކަމަށާއި، މާލޭ ވިޔަފާރި ބަނދަރަށް ދިމާވެފައި އޮތް ޖާގައި ދަތިކަން ހައްލުކުރެވޭނީ އެހެން ތަނަކަށް ބަނދަރު ބަދަލުކޮށްގެންކަމަށެވެ. އެގޮތުން މާލެއިން ގުޅީފަޅަށް ވިޔަފާރި ބަނދަރު ބަދަލުކުރުމުން ހަރަކާތްތައް ހަލުއިވެ، ޚިދުމަތްތައް އަވަސްވެގެންދާނެކަމަށެވެ.

މި ބަދަލުތައް ގެނައުމުން އިތުރު ފައިދާތައް ވާނެކަން ފާހަގަކުރައްވައި ރައީސް ވިދާޅުވީ، ތޮއްޖެހިފައިވާ މާލެސިޓީގައި ހިންގާ ސިނާއީ ހަރަކާތްތައް މަދުވާނެ ކަމަށާއި، މިފަދަ ބޭނުންތަކަށް ބޭނުންކުރާ ބިންތައް ރައްޔިތުންގެ އެހެން ބޭނުންތަކަށް ހުސްވެގެންދާނެ ކަމަށެވެ.

އެވޭލާ ޒާމާނުގައި ބަނދަރުތަކުގެ ދައުރު މިހާރަށްވުރެވެސް މާ ފުޅާކަން ފާހަގަކުރައްވައި ރައީސް ވިދާޅުވީ، މި ޒަމާނުގައި ބަނދަރުތަކުގެ ދައުރާއި ޒިންމާ ތަފާތުކަމަށެވެ.