ދިވެހި ޕްރިމިއަރ ލީގުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންގެ އިންތިޚާބު މި މަހުގެ 29 ގައި ބާއްވަން ނިންމައިފިއެވެ.
މާޒިޔާ އިން ބުނެފައިވާ ގޮތުގައި އެ ކުލަބުގެ އިންތިޚާބު ބާއްވާނީ މި މަހުގެ 29 ވާ ބުރާސްފަތި ދުވަހުގެ ރޭއެވެ. އިންތިޚާބުގައި މަގާމުތަަކަށް ވާދަކުރުމުގެ ފުރުސަތު އެ ކުލަބުން މިހާރު ވަނީ ކުލަބުގެ މެމްބަރުންނަށް ހުޅުވާލާފައެވެ. މަގާމުތަކަށް ކުރިމަތިލުމުގެ ސުން ގަޑި އަކީ މި މަހުގެ 27 ވާ އަންގާރަ ދުވަހާ ހަމައަށެވެ. މި އިންތިޚާބުގައި ހޮވުމަށް ހަމަޖެހިފައިވާ މަގާމުތަކަކީ، ޗެއާމަން، ވައިސް ޗެއާމަންގެ އިތުރުން ބޯޑު މެމްބަރުންނާއި އިތުރު މަގާމުތަކެވެ.
މާޒިޔާގެ ޗެއާމަންކަމުގައި މިހާރު ހުރީ އަޙުމަދު ސާޖިދުއެވެ. މާޒިޔާއިން ވަނީ ފާއިތުވި ތިން އަހަރުގެ ދިވެހި ޕްރިމިއަރ ލީގު ކާމިޔާބުކޮށްފައެވެ. މާޒިޔާ އިން ވަނީ ފާއިތުވި އަހަރުތަކުގައި ގިނަ ކާމިޔާބީތަކެއް ވެސް ހޯދާފައެވެ. މިވަގުތު ދިވެހި ފުޓުބޯޅައިގެ އެންމެ ގަދަ ބާރަކީ ވެސް މާޒިޔާއެވެ.
ދިވެހި ޕްރިމިއަރ ލީގުގެ އިތުރުން މާޒިޔާއިން ވަނީ އެފްއޭ ކަޕް، ޕްރެޒިޑެންޓްސް ކަޕް އަދި ޗެރިޓީ ޝީލްޑް ވެސް އެކި ފަހަރު މަތިން ކާމިޔާބުކޮށްފައެވެ. މާޒިޔާއިން އެ ކުލަބުގެ ބޯޑު އިންތިޚާބު ބާއްވާއިރު، ބޯޑުގެ މުއްދަތަކީ ފަސް އަހަރު ދުވަހެވެ.
