މެޑޯނާ ޕޯޗުގަލްއަށް ދިރިއުޅުން ބަދަލުކޮށްފި

ލަވަކިޔުންތެރިޔާ މެޑޯނާ އޭނާގެ ދިރިއުޅުން ޕޯޗުގަލްއަށް ބަދަލު ކޮށްފިއެވެ.

މެޑޯނާ ވަނީ އެކަން އިންސްޓަގްރާމް މެދުވެރިކޮށް ޔަގީންކޮށްދީފައެވެ. އޭނާގެ އިންސްޓަގްރާމްގައި ވަނީ ޕޯޗުގަލްގައި އޭނާ ދިރިއުޅެމުންދާ ބަދިގޭގައި ހުރެ ނަގާފައިވާ ފޮޓޯއެއް ލުމަށްފަހު އޭނާއަށް އެ ދިރިއުޅުން ވަރަށް ކަމުދާކަމަށާއި ދިރިއުޅުން ބަދަލު ކޮށްފައިވާ ކަމަށް ބުނެފައެވެ.

ޕޯޗުގަލްއަކީ ވަރަށް ކަމުދާ ގައުމެއް ކަމަށާއި އޭނާގެ އާ އަލްބަމުގެ މަސައްކަތް ފަށާނެކަމަށް ބުނެފައިވެއެވެ. އަދި އޭނާގެ ދިރިއުޅުމުގެ އާ ބާބެއް ފެށިއްޖެ ކަމަށް މެޑޯނާ އިންސްޓަގްރާމަށް ލާފައިވާ ފޮޓޯގެ ކެޕްޝަންގައި ބުނެފައިވެއެވެ.

އުމުރުން 59 އަހަރުގެ މެޑޯނާ ދަނީ ތަފާތު އެކި ގޮތް ގޮތުން އިންސާނިއްޔަތަށްޓަކައި އެހީތެރިކަން މިހާރުވެސް ފޯރު ކޮށްދެމުންނެވެ. އެގޮތުން އޭނާ މިހާރު ވެސް ދަނީ ހަ ކުޑަކުދިން "އެޑޮޕްޓް" ކޮށްގެން ގެންގުޅެމުންނެވެ. އޭނާވަނީ ކުރިން އެކްޓަރެއް ކަމަށްވާ ޝޯން ޕެން އާއި ފަހުން ޑައިރެކްޓަރު ގައި ރިޗީއާ ކައިވެނި ކޮށްފައެވެ. މިހާތަނަށް އޭނާ ވަނީ 13 އަލްބަމްގެ މަސައްކަތް ކޮށްފައެވެ. އޭނާގެ ކެރިއަރ ފަށާފައިވަނީ 1979 ވަނަ އަހަރުގައެވެ.

އޭނާ ކިޔާފައިވާ ލަވަތަކުގެ ތެރޭގައި "ލައިކް އަ ވާޖިން"، ޕާޕާ ޑޯންޓް ޕްރީޗް"، "ލައިކް އަ ޕްރެޔާ" އަދި "ފްރޯޒެން" ހިމެނެއެވެ.