ވ.އާރަށް ކުއްޔަށް ދޫކުރުމުން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި އަދި އެ ފައިސާ ލޯންޑާ ކުރެއްވި ކަމަށް ބުނެ ދައުލަތުން ކުރީގެ ރައީސް އަބްދުﷲ ޔާމީންގެ މައްޗަށް ކުރާ ރިޝްވަތު ގަބޫލު ކުރުމާއި މަނީ ލޯންޑަރިންގ ގެ ދައުވާގެ އަޑުއެހުމެއް އަންނަ އާދިއްތަ ދުވަހު ބޭއްވުމަށް ކްރިމިނަލް ކޯޓުން ތާވަލް ކޮށްފިއެވެ.
މި މައްސަލަ އަކީ މިއީ ދިވެހިރާއްޖޭގެ ތާރީހުގައި މިހާތަނަށް ހިންގާފައިވާ އެންމެ ބޮޑުއެއް ހިޔާނާތުގެ މައްސަލަކަމަށްވާ އެމް.އެމް.ޕީ.އާރު.ސީގެ ކޮރަޕްޝަންގެ މައްސަލައާ ގުޅުންހުރި މައްސަލައެކެވެ. އާދީއްތަ ދުވަހު ވެސް އޮންނާނީ ޔާމީންގެ ފަރާތުން ހުށަހަޅާފައިވާ ދިފާއީ ހެކިންގެ ހެކިބަސް ނެގުމެވެ. މީގެ ކުރިން މި މައްސަލައިގައި ކަންހިނގާ ދިޔަ ގޮތަށް ބަލާއިރު މިމައްސަލަ ސާބިތުކުރުމަށް ދައުލަތުގެ ފަރާތުން ޝަފަހީ ހެކިންގެ ގޮތުގައި 13 ހެއްކެއް ވަނީ ހުށަހަޅާފައެވެ. މި މައްސަލައިގައި ރައީސް ޔާމިންގެ ވެރިކަމުގައި ނާއިބްރައިސްގެ މަގާމާއި ޓޫރިޒަމް މިނިސްޓަރކަން ކުރައްވާފައިވާ އަހުމަދު އަދީބު ވަނީ ޝަރީއަތުގެ މަޖިލީހުގައި ރައީސް ޔާމިނާ ދެކޮޅަށް ހެކިބަސްދެއްވާފައެވެ.
މީގެ އިތުރުން މްއެމްޕީއާރުސީގެ އޭރުގެ މެނޭޖިންގ ޑިރެކްޓަރު އަބްދުﷲ ޒިޔަތު ވަނީ ވ.އާރަށުގެ އެއްބަސްވުމުގައި ސޮއިކުރުމުން ޔާމީނަށް އެއް މިލިއަން ޑޮލަރު ލިބޭނެ ކަމަށް ޔޫސުފް ނައީމް ބުނެފައިވާކަމަށް ހެކިބަސްދެއްވާފައެވެ. އަދި ވ.އާރަށުގެ އެގްރިމެންޓް ކަންތައް ނިމުމުން ރައީސް ޔާމީން ހިތްހަމަޖެހިވަޑައިގަންނަވާނެ ކަމަށް ޔޫސުފް ނައީމް ބުނިކަމަށާއި އެއީ އެ މުޢާމަލާތާ ގުޅިގެން 1 މިލިއަން ޑޮލަރު ރައީސް ޔާމީނަށް ދީފައިވާނެތީކަމަށް ޔޫސުފް ނައީމް ބުނެފައިވާކަމަށްވެސް އޭނާ ވިދާޅުވިއެވެ.
މި މައްސަލައިގައި ރައީސް ޔާމީންގެ ފަރާތުން ހުށަހެޅި ދިފާއީ ހެކިންގެ ގޮތުގައި މިހާތަނަށް މާލެ ސިޓީގެ ޑެޕިއުޓީ މޭޔަރ އަހުމަދު ނަރީޝް އާއި، ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއީލް އާއި ރައްޔިތުން މަޖިލީހުގެ ހުޅުދޫ ދާއިރާގެ ކުރީގެ މެންބަރު މުހައްމަދު ޝާހިދު (ޝާޑު) އަދި ޔާމީންގެ ޑްރައިވަރު އަބްދުﷲ ރަޝީދުގެ ހެކިބަސް ވަނީ ނަގާފައެވެ.
ނަރީޝް ވަނީ ރައިސް ޔާމީން ވިދާޅުވެގެން ޔޫސުފް ނަޢީމަށް އެއްމިލިއަން ޑޮލަރަށްވާ ދިވެހި ފައިސާ ހަވާލުކުރުމަށް އޭނާ ދިޔަކަމަށާއި އެ ފައިސާ ހުރީ ކަޅު 2 ދަބަހެއްގައި ކަމަށް ހެކިބަސްދީފައެވެ. އަދި ނަރީޝް އެގެޔަށް ދިޔައިރު އެގޭގައި ޔާމީންގެ ކުރީގެ ޑްރައިވަރު އަބްދުﷲ ކިޔާ މީހަކުވެސް އިންކަމަށާއި އެފައިސާ ޔޫސުފް ނައީމްއާ ހަވާލުކުރުމަށް ގެންދިއުމުގެ ކުރިން ރައީސް ޔާމިން ދިރިއުޅުއްވި ގެ ދޫވެހީގައި ޔާމީންގެ ހާޒިރުގައި އެފައިސާ ގުނިކަމަށް ވެސް އޭނާ ވަނީ ބުނެފައެެ. މީގެ އިތުރުން އެފައިސާ ހުރީ 500 ރުފިޔާގެ ނޫޓްތައް ހިމެނޭ ބޮނޑިތަކެއްގައި ކަމަށާއި ނަމަވެސް އެތަނުގައި ހުރީ ކިތައް ބޮނޑިކަމެއް ހަދާނެއް ނެތްކަމަށް އޭނާ ވަނީ ބުނެފައެވެ.
މީގެ އިތުރުން މި މައްސަލައިގައި ހެކިބަސްދެމުން އަބްދުﷲ ރަޝީދު ބުނީ 2015 ވަނަ އަހަރުގެ ސެޕްޓެމްބަރު މަހުގެ ދުވަހެއްގައި ރައީސް ޔާމީނާ ބައްދަލުކުރަން ޔާމީން އެދިވަޑައިގެން އެގެއަށް ދިއަކަމަށާއި އެގެއަށް ދިޔައީ މާލޭ ސިޓީ ކައުންސިލްގެ މިހާރު ޑެޕިއުޓީ މޭޔަރު އަހުމަދު ނަރީޝްއާ އެކު ކަމަށެވެ. ގ.ދޫވެހިގޭގައި ތިބެގެން އެ ފައިސާ އެ މީހުން ގުނިއިރު އޭގައި 15 މިލިއަން ރުފިޔާ ހުރި ކަމަށް ފުރަތަމަ އޭނާ ވަނީ ބުނެފައެވެ. ނަމަވެސް އޭނާ ފަހުން ބުނެފައިވަނީ ފައިސާ ގުނީ ފައިސާގެ ބޮނޑިތަކުން ކަމަށާއި އެކަމަކު އޮތީ ފައިސާގެ ކިތައް ބޮނޑިކަން ހަނދާން ނެތް ކަމަށެވެ. އެހެންކަމުން މި ދެ ފަރާތުގެ ހެކިބަހުގައި ފުށުއެރުންތަކެއް އެބަހުއްޓެވެ.
