ގާނޫނާ ޚިލާފަށް ރާއްޖޭގެ ސަރަހައްދަށް ވަދެ އުޅުނު މަސްބޯޓެއް ހިފަހައްޓައިފި
23 ސެޕްޓެމްބަރު 2022 | ހުކުރު 11:37މި ބޯޓު ކޯސްޓްގާޑުގެ ބެލުމުގެ ދަށަށް ގެންދިޔައީ އިސްދޫމުލީގެ ކައިރިން
މަސް ބޯޓު އަތުލައިގަތް ސަރަހައްދު
ޤާނޫނާ ޚިލާފަށް ރާއްޖެ ސަރަހައްދަށް ވަދެއުޅުނު ބޭރުގެ މަސްބޯޓެއް އެމްއެންޑީއެފް ސެންޓްރަލް އޭރިއާ ކޯސްޓްގާޑު ތާޑް ސްކޮޑްރަންގެ ބެލުމުގެ ދަށަށް ގެންގޮސްފިއެވެ.
ރާއްޖޭގެ ޚާއްސަ އިޤްތިޞާދީ ސަރަަހައްދުގައި ބޭރުގެ މަސް ބޯޓެއް ޤާނޫނާ ޚިލާފަށް މަސްވެރިކަން ކުރަމުންދާ ކަމުގެ ރިޕޯޓް އެމްއާރުސީސީއަށް ލިބިފައިވަނީ ހުކުރު ދުވަހުގެ ހެނދުނު 11:26 އެހާއިރު ކަމަށް އެފަރާތުން ބުނެފައި ވެއެވެ. އެ މައުލޫމާތު ހިއްސާކޮށްފައިވަނީ އެ ސަރަހައްދުން މަސްވެރިކަން ކުރަމުން ދިޔަ ދޯންޏަކުން ކަމަށް އެމްއެންޑީއެފުން ބުނެއެވެ.
މިއާއެކު ހުކުރު ދުވަހުގެ މެންދުރު 14:00 އެހާއިރު، އެ ބޯޓް ކޯސްޓްގާޑް ބެލުމުގެ ދަށަށް ވަނީ ގެންގޮސްފައެވެ. މި ބޯޓު ކޯސްޓްގާޑަށް ފެނިފައި ވަނީ ލ.އިސްދޫމުލީގެ އިރުއުތުރުން 15 ނޯޓިކަލް މޭލު ބޭރުން ކަމަށް އެ އިދާރާއިން ބުނެއެވެ.
އެމްއެންޑީއެފުން ބުނީ މި އުޅަނދު ފުލުހުންނާ ހަވާލުކުރުމުގެ މަސައްކަތް މިހާރު ކުރަމުން ދާކަމަށެވެ.
