ސިފައިންގޭގައި ހުރެ ސިފައިންގެ ވާޖިބު އަދާކުރަން ޖެހޭ ދުވަހެއްގައި އެކަން ކުރަންޖެހޭނެ
ދަނގެތި ދާއިރާގެ މެންބަރު އަދި ކުރީގެ ޑިފެންސް މިނިސްޓަރު ކާނަލް ރިޓަޔަރޑް މުހައްމަދު ނާޒިމް (ވ) ފަށާއިރު ޕްރޮގްރާމުގައި
ސިޔާސީ މީހަކަށް ބަދަލުވާންޖެހުނީ، ސިފައިންގޭގައި އުޅުއްވަނިކޮށް ހިނގައިދިޔަ ކަންތައްތަކުގެ ތެރޭގައި ވަޒީފާ ގެއްލިގެން ދިއުމުގެ ސަބަބުން ކަމަށް ކުރީގެ ޑިފެންސް މިނިސްޓަރު އަދި ދަނގެތި ދާއިރާގެ މެންބަރު ކާނަލް ރިޓަޔަރޑް މުހައްމަދު ނާޒިމް ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމުގައި ބައިވެރިވެވަޑައިގެން ނާޒިމް ވިދާޅުވި އޭނާ އަކީ އަދިވެސް ސިފައިންގެ މީހެއް ކަމަށާއި، އެއީ ހަގީގަތް ކަމަށެވެ. މުޅި ހަޔާތް ވޭތުކުރީ ސިފައިންގެ ގޭގައި ކަމަށާއި، އެހެންނަމަވެސް 2008 ގައި ސަރުކާރު ބަދަލުވެ ސިފައިންގެ ވަޒީފާއިން އިސްތިއުފާ ދެއްވުމަށް އެންގެވި ކަމަށެވެ. އަދި އެހިސާބުން އައި ކަންތައްތަކެއްގެ ތެރެއިން ސިޔާސީ މީހަކަށް ބަދަލުވެގެންދިޔަ ކަމަށާއި، އެއީ ވަރަށް ހިތާމަވެރި ހާދިސާއެއް ކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ އޭނާ ގަބޫލުކުރައްވާ ގޮތުގައި ސިފައިންގޭގައި ހުރެ ސިފައިންގެ ވާޖިބު އަދާކުރަން ޖެހޭ ދުވަހެއްގައި އެކަން ކުރަންޖެހޭނެ ކަމަށެވެ. ނަމަވެސް އޭގެ ނަތީޖާއަކަށް ވެގެންދިޔައީ ސިފައިންގެ ހަޔާތް އެކީގައި ގެއްލިގެން ދިއުން ކަމަށެވެ. އެހެންނަމަވެސް ކޯޓަށް މައްސަލަ ހުށަހަޅުއްވުމުން ވަޒީފާ އަނބުރާ ލިބިވަޑައިގެންނެވި ކަމަށާއި، އެއަށްފަހު ރިޓަޔަރކޮށް، ކާނަލް ރިޓަޔަރއަކަށް ބަދަލުވެވަޑައިގެންނެވި ކަމަށެވެ.
ނާޒިމް ވިދާޅުވީ އަދިވެސް މުޅިން ސިޔާސީ ނުވެވޭ ކަމަށާއި، ގައިގައި ސިޔާސީ ކަންތައް ހަރުލާގޮތެއް ނުވާ ކަމަށެވެ. އަދި ސިޔާސީ މީހުން ކުރާ ކަންތައްތައް ކުރަން އުނދަގޫ ކަމަށާއި، އަދިވެސް އަސްކަރީ މީހެއްގެ ގޮތުގައި ސިކުނޑި ގަބޫލުކުރައްވާ ކަމަށެވެ. އެހެންނަމަވެސް ހަށިގަނޑު މުޅިން ސިޔާސީ ކަމަށާއި، ދެކަމެއްގައި އުޅެވޭ ކަމަށް ނާޒިމް ވިދާޅުވިއެވެ.
ނާޒިމް ވިދާޅުވީ މިހާރު ހުންނެވީ ސިޔާސީ ޕާޓީ އުފައްދަވައިގެން ސިޔާސި މަސައްކަތުގައި ރައްޔިތުންނަށް ހިދުމަތް ކުރެއްވުމުގައި ކަމަށެވެ.
