މަޖިލީހުގައި ޕާޓީ އެއް ތަމްސީލްކުރަން ބޭނުންވާ މިންވަރަށް މެމްބަރުން ނެތުމުން މޯލްޑިވްސް ނޭޝަނަލް ޕާޓީ (އެމްއެންޕީ) ސިޔާސީ ޕާޓީއެއްގެ ގޮތުގައި ރައްޔިތުންގެ މަޖިލީހުގައި ތަމްސީލު ކުރުމުގެ ފުރުސަތު ގެއްލިފައިވާތީ، މަޖިލީހުގެ ގަވާއިދު ބަދަލުކޮށްދޭން އެ ޕާޓީން އެދިއްޖެއެވެ.

މަޖިލީހުގައި ސިޔާސީ ޕާޓީއެއްގެ ގޮތުގައި ތަމްސީލްކުރުމުގެ ހައިސިއްޔަތު އެމްއެންޕީ އަށް ގެއްލުނުކަން އިއުލާންކުރީ މިދިޔަ ހަފްތާގެ އަންގާރަ ދުވަހުއެވެ. އެމްއެންޕީއަށް މަޖިލީހުގައި ސިޔާސީ ޕާޓީއެއްގެ ގޮތުގައި ތަމްސީލުކުރުމުގެ ހައިސިއްޔަތު ގެއްލިފައިވަނީ ވިލިމާލެ ދާއިރާގެ މެންބަރު އަހުމަދު އުޝާމް މެންބަރުކަމުން އިސްތިޢުފާދެއްވުމާއި ގުޅިގެންނެވެ. އޭނާ މަޤާމުން އިސްތިޢުފާދެއްވާފައި ވަނީ މި ސަރުކާރުގެ ބަންޑާރަނާއިބުގެ މަޤާމަށް އޭނާ އައްޔަންކުރައްވާފައި ވާތީއެވެ.

އުޝާމްގެ އިތުރުން އެމްއެންޕީގެ މެންބަރުންގެ ގޮތުގައި މަޖިލީހުގައި ތިއްބެވީ ދަނގެތީ ދާއިރާގެ މެންބަރު މުހައްމަދު ނާޒިމް އާއި ތިމަރަފުށީ ދާއިރާގެ މެންބަރު އަބްދުﷲ ރިޔާޒެވެ. މަޖިލީހުގެ ޤަވާއިދުގެ 33 ވަނަ މާއްދާގެ (ބ)ގައި ބަޔާންކޮށްފައިވަނީ މަޖިލީހަށް އިންތިޚާބުވުމަށް ފަހު ސިޔާސީ ޕާޓީއެއްގެ ނަމުގައި ތަމްސީލްކުރުމަށް އެދޭ މެންބަރުންގެ ޢަދަދު އެއްވެސް ވަގުތެއްގައި 3 މެންބަރުންނަށް ވުރެ މަދުވެއްޖެނަމަ، އެ ޕާޓީއެއް މަޖިލީހުގައި ތަމްސީލްކުރުމަށް އެ މާއްދާގެ (ނ)ގެ ދަށުން ލިބޭ ހައިސިއްޔަތު އެ ޕާޓީއަކަށް ގެއްލިގެންދާނެ ކަމަށެވެ.

އެހެންކަމުން ސިޔާސީ ޕާޓީއެއްގެ ގޮތުގައި މަޖިލީހުގައި މެންބަރުން ތަމްސީލްކުރުމުގެ ފުރުސަތު އެމްއެންޕީއަށް ގެއްލުނުކަން ރިޔާސަތުން ވަނީ އަންގާރަ ދުވަހު އިޢުލާންކުރައްވާފައެވެ. އަދި ދަނގެތީ ދާއިރާގެ މެންބަރު މުހައްމަދު ނާޒިމް އާއި ތިމަރަފުށީ ދާއިރާގެ މެންބަރު އަބްދުﷲ ރިޔާޒު މިހާރު މަޖިލީހުގައި ތަމްސީލްކުރައްވާނީ މިނިވަން މެންބަރުންގެ ގޮތުގައެވެ.

މީގެ ކުރިން ރިޔާޒްް ވިދާޅުވީ ޤާނޫނު އަސާސީން ކޮންމެ މީހަކަށް ވެސް ޚިޔާލުފާޅުކުރުމުގެ މިނިވަންކަން ލިބިގެންވާ ކަމާއި ސިޔާސީ ފިކުރުގެ ސަބަބުން ތަފާތު ނުކުރެވޭނެކަމަށެވެ. ހަމައެހެންމެ މަޖިލީހުގެ ޤަވާއިދުގެ 33 ވަނަ މާއްދާގެ (ބ) އަކީ ޤާނޫނު އަސާސީ އާއި ޚިލާފު މާއްދާ އެއް ކަމަށް ވެސް އޭނާ ވިދާޅުވިއެވެ. މި މައްސަލައިގައި އެމްއެންޕީގެ ފަރާތުން މަޖިލީހުގެ ރައީސް މުހައްމަދު އަސްލަމަށް ފޮނުވި ސިޓީގައި ބުނެފަިއ ވަނީ ރިޔާސަތުގެ އެ ނިންމުމާއި މަޖިލީހުގެ ގަވާއިދުގެ އެ މާއްދާއަކީ ގާނޫނު އަސާސީގެ 17، އަދި 30 ވަނަ މާއްދާއާ ހިލާފު ކަމަށް އެ ޕާޓީން ޤަބޫލުކުރާ ކަމަށެވެ. އެހެންކަމުން މަޖިލީހުގެ ގަވާއިދު ބަދަލުކޮށްދިނުމަށް އެ ޕާޓީން ވަނީ އެދިފައެވެ.

މަޖިލީހުގެ އާއްމު ކޮމިޓީގެ އާދިއްތަ ދުވަހުގެ ބައްދަލުވުމުގައި އެ މައްސަލަ ދިރާސާވެސް ކުރައްވާފައިވެއެވެ.