އަނިޔާގައި ހުރެ ކެރިއަރު ނިންމައެއްނުލާނަން: ސްޓެފް ހައުޓަން
22 ސެޕްޓެމްބަރު 2022 | ބުރާސްފަތި 10:53ހައުޓަންއަށް ވަނީ އަނިޔާގެ ސަބަބުން މިއަހަރު އޮތް އަންހެނުންގެ ޔޫރޯ މުބާރާތް ގެއްލިފައި
ސްޓެފް ހައުޓަން
އަނިޔާގައި ހުރެ ކެރިއަރު ނިންމާނުލާނެކަމަށް، އިންގްލެންޑުގެ ގައުމީ އަންހެން ފުޓްބޯޅަ ޓީމުގެ ޑިފެންޑަރު ސްޓެފް ހައުޓަން ބުނެފިއެވެ.
ހައުޓަންއަށް ވަނީ އަނިޔާގެ ސަބަބުން މިއަހަރު އޮތް އަންހެނުންގެ ޔޫރޯ މުބާރާތް ގެއްލިފައެވެ. އޭނާގެ ފަޔަށް ލިބުނު އަނިޔާއަކާ ގުޅިގެން ހައުޓަން ވަނީ ސަރޖަރީއެއްވެސް ހަދާފައެވެ.
އުމުރުން 34 އަހަރުގެ ހައުޓަން ބުނީ، އަނިޔާގައި ހުރެ ކެރިއަރު ނިންމާލުމުގެ ބަދަލުގައި އޭނާ ބޭނުންވަނީ ރަނގަޅު ކާމިޔާބަކާއެކު ކެރިއަރު ނިންމާލަން ކަމަށެވެ. އެހެންކަމުން އޭނާއާއެކު ކުޅުނު ބައެއް ކުޅުންތެރިން ފަދައިން އެހާ އަވަހަށް ކުޅުން ހުއްޓާލަން ނުވިސްނާކަމަށް ހައުޓަން ބުންޏެވެ.
އިނގިރޭސި ޓީމަށް ކުޅުނު ސްކޮޓްއާއި ވައިޓް ވަނީ މިހާރު ގައުމީ ޓީމަށް ކުޅުން ހުއްޓާލާފައެވެ. މި ދެކުޅުންތެރިންނަކީވެސް ޔޫރޯ މުބާރާތް އިންގްލެންޑަށް ކާމިޔާބުކޮށްދިނުމުގައި މުހިންމު ދައުރެއް އަދާކުރި ދެކުޅުންތެރިންނެވެ.
ހައުޓަން ވަނީ އަނިޔާއިން ސަލާމަތްވެ، އޭނާ ކުޅެމުން އަންނަ މެންޗެސްޓަރ ސިޓީގެ ފަރިތަކުރުންތަކުގައި މިހާރު ބައިވެރިވާން ފަށާފައެވެ. އޭނާގެ އެންމެ ބޮޑު އަމާޒަކީ ވޯލްޑް ކަޕް 2023 ކާމިޔާބުކުރުމެވެ.
