ރަޝިއާއިން ވަނީ އެއްވެސް ލަދެއްނެތި އދ. ގެ ޗާޓަރާ ފާޅުގައި ޚިލާފުވެފައި: ބައިޑަން
21 ސެޕްޓެމްބަރު 2022 | ބުދަ 17:48ނިއުކްލިއަރ ހަނގުރާމަ އަކީ ކޮށްގެންވާނެ ހަނގުރާމައެއް ނޫންކަމަށް ބައިޑަން ވިދާޅުވި
އެމެރިކާގެ ރައީސް ޖޯ ބައިޑަން
ރަޝިއާއިން ދަނީ ނިއުކްލިއަރ ހަތިޔާރު ބޭނުންކުރާނެ ކަމުގެ އިންޒާރު ދެމުންކަމަށާއި އެގައުމުން ޔޫކްރެއިނަށް އަރައި ފެށި ހަނގުރާމަ އާއިއެކު ފާޅުގައި އދ. ގެ ޗާޓަރާ ހިލާފުވެފައިވާކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
ނިއުޔޯކްގައި ކުރިއަށްގެންދާ އދ. އާންމު މަޖިލީހުގައި ވާހަކަފުޅު ދައްކަވަމުން ބައިޑަން ވަނީ ރަޝިއާގެ ރައީސްގެ އަމުރަށް އެގައުމުގެ އަސްކަރިއްޔާއިން ޔޫކްރެއިނަށް އަރައި ފެށި ހަނގުރާމައިގެ ސަބަބުން ނުރުހުމުގެ ބަސްތައް ޕުޓިންއަށް އަމާޒުކުރައްވާފައެވެ. އަދި ޕުޓިން ފެއްޓެވި ހަނގުރާމައި ގައި ރަޝިއާ އާއި ދެކޮޅަށް ހަނގުރާމަކުރުމަށް އދ. ގެ 40ހަކަށް މެމްބަރުން ޔޫކްރެއިނަށް ވާގިވެރިވެ އެހީތެރިވަމުންދާކަމަށް ބައިޑަން ވަނީ ފާހަގަކުރައްވާފައެވެ.
ބައިޑަން ވަނީ ރަޝިއާގެ މިއަމަލަކީ އދ. ގެ ޗާޓަރާ ކަނޑައެޅިގެން ހިލާފު އަމަލެއް ކަމަށް ވިދާޅުވެފައެވެ. އަދި މިއީ ރަޝިއާއިން އެއްވެސް ލަދެއް ނެތި، ޔޫކްރެއިން ފުހެލުމަށް ކުރާކަމެއް ކަމަށް ބައިޑަން ވިދާޅުވިއެވެ.
ރަޝިއާގެ ރައީސް އެގައުމަށް ހުޅަނގުން ބިރުދައްކަމުންދާ ކަމަށް ވިދާޅުވި ނަމަވެސް އެއްވެސް ބަޔަކު ރަޝިއާއަށް ބިރުދައްކަމުން ނުދާކަމަށްވެސް ބައިޑަން ވިދާޅުވިއެވެ. އެމެރިކާއިން ޔޫކްރެއިނާއެކު ދެމިހުންނާނެ ކަމަށް ވިދާޅުވަމުން ބައިޑަން ވަނީ ހަނގުރާމަ ފަށައި މަސްލަހަތު ގޯސްކުރުމުގެ މަސައްކަތްކުރަނީ ރަޝިއާއިން ކަމަށް ވިދާޅުވެފައެވެ.
ރަޝިއާގެ އާންމުރައްޔިތުންވެސް އަސްކަރިއްޔާއާއި ގުޅުމަށް އަމުރު ނެރި ގައުމުގެ ދިފާއުގައި ކުރަންޖެހުނު ކޮންމެ ކަމެއްވެސް ކުރާނެ ކަމަށް ވިދާޅުވެ ނިއުކްލިއަރ ހަތިޔާރު ބޭނުންކުރަން ޖެހިއްޖެ ހާލަތެއްގައި އެކަމަށް ތައްޔާރަށް އޮތްކަމަށް މޭރުންވާ އިބާރާތުން ޕުޓިން ދެއްކެވި ވާހަކަފުޅާއެކު ބައިޑަން ވަނީ ނިއުކްލިއަރ ހަނގުރާމައަކީ މޮޅުވެވޭނެ ހަނގުރާމައެއް ނޫންކަމަށް ވިދާޅުވެފައެވެ. އަދި ނިއުކްލިއަރ ހަނގުރާމައެއް ފެށުމަށްވުރެ ރަނގަޅުވާނީ ނުފެށުންކަމަށް ބައިޑަން ވިދާޅުވިއެވެ.
ނިއުކްލިއަރ ހަނގުރާމަ އަކީ ކޮށްގެންވާނެ ހަނގުރާމައެއް ނޫންކަމަށް ބައިޑަން ވިދާޅުވިއެވެ.
