އެމެރިކާ ގައި އެންމެ ފަހުން އޮތް ރިޔާސީ އިންތިޚާބަށް ރަޝިއާ އިން އެއްވެސް ނުފޫޒެއް ފޯރުވާފައި ނުވާ ކަމަށް، އޭޝިއާ-ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓުގައި އެމެރިކާގެ ރައީސް ޑޮނަލްޑް ޓްރަމްޕާއި ރަޝިއާގެ ރައީސް ވްލަޑީމިއާ ޕޫޓިން ބައްދަލުވުމުން ވިދާޅުވެފައިވާ ކަމަށް ރައީސް ޓްރަމްޕް ވިދާޅުވެއްޖެއެވެ.

ވިއެޓްނާމުގައި ނޮވެމްބަރު 10 އިން 11 އަށް ކުރިއަށް ދިޔަ އޭޕެކް ސަމިޓުގައި ރައީސް ޓްރަމްޕް އާއި ރައީސް ޕޫޓިން ކުޑަވަގުުތުކޮޅަކަށް ބައްދަލުވެފައިވާއިރު ރައީސް ޕޫޓިން އާ ހަވާލާދީ ރައީސް ޓްރަމްޕް މީޑިއާތަކަށް ވިދާޅުވެފައި ވަނީ ރަޝިއާ އާ މެދު ކުރެވޭ ތުހުމަތުތަކުގެ ސަބަބުން ރައީސް ޕޫޓިން އަށް ނުހަނު އުނދަގޫފުޅުވެފައިވާ ކަމަށެވެ. 

ރަޝިއާ ގެ ރައީސްގެ ވާހަކަފުޅު މިމޭރުމުން ހުރިއިރު އެމެރިކާގެ އިންޓެލިޖެންސް އެޖެންސީތަކުން ބުނެފައި ވަނީ އެމެރިކާގެ އިންތިޚާބުގެ ކުރިން ބޭއްވުނު ހިޔާލު ހޯދުމުގެ ޕޯލްތަކަށް ރަޝިއާ އިން ނުފޫޒު ފޯރުވަން މަސައްކަތްކޮށްފައިވާ ކަމަށެވެ. 

ރަޝިއާ އިން އެމެރިކާގެ އިންތިޚާބަަށް ނުފޫޒު ފޯރުވި މައްސަލާގައި އެމެރިކާގެ ޖަސްޓިސް ޑިޕާޓްމަންޓުން ވަނީ މައްސަލަ ތަހުގީގުކުރަން ހާއްސަ އިންވެސްޓިގޭޓަރެއްވެސް ހަަމަޖައްސާފައެވެ. އެއީ ރޮބާޓް މުލާއެވެ. ރޮބާޓް މުލާގެ ތަހުގީގުގައި ރައީސް ޓްރަމްޕްގެ ރިޔާސީ އިންތިޚާބުގެ ކެމްޕެއިން ޓީމާ ރަޝިއާ އާއި އެއްވެސް ގުޅުމެއް ބޭއްވިތޯވެސް ބަލާނެއެވެ. 

ރައީސް ޓްރަމްޕް ގެންދަވަނީ އޭޝިއާގެ ގައުމުތަކަށް ހާއްސަ ދަތުރުފުޅެއް ކުރައްވަމުންނެވެ. އެމެރިކާ އާއި ރަޝިއާގެ މިހާރުގެ ދެ ރައީސުން އެންމެ ފުރަތަމަ ބައްދަލު ކުރައްވާފައި ވަނީ މިދިޔަ ޖުލައި ގައި ބޭއްވުނު ޖީ-20 ސަމިޓުގައެވެ. އެހެންނަމަވެސް އެމެރިކާގެ ކޮންގްރެސްއިން އޭގެފަހުން އައު ދަތިކުރުމުގެ ފިޔަވަޅުތައް އެޅުމުގެ ސަބަބުންނާއި ރަޝިއާއިން އެގައުމުގެ ތިބޭ އެމެރިކާ ޑިޕްލޮމޭޓުންގެ އަދަދު ދަށްކުރުމަށް ނިންމުމުގެ ސަބަބުން ދެގައުމުގެ ގުޅުން ވަނީ ހީނަރުވެފައެވެ.