މީ ސަމާސާއެއް ނޫން، ގައުމުގެ ދިފާއުގައި ކުރަންޖެހޭ ކޮންމެ ކަމެއްވެސް ކުރާނަން: ޕުޓިން

މިއީ ސަމާސާ ވާހަކަތަކެއް ނޫން ކަމަށާއި ގައުމުގެ ދިފާއުގައި ކުރަންޖެހޭ ކޮންމެ ކަމެއްވެސް ކުރައްވާނެ ކަމަށް ރަޝިއާގެ ރައީސް ވްލެޑްމިއަރ ޕުޓިން ވިދާޅުވެއްޖެއެވެ.

ރަޝިއާގެ ރައީސް ވަނީ ހުޅަނގުން އެގައުމަށް 'ނިއުކްލިއަރ ބްލެކްމެއިލް' ކުރަމުންދާނަމަ ދިފާއުގައި އެގައުމުގެ އަސްކަރީ ހުރިހާ ބާރެއް ބޭނުންކުރަން ރަޝިއާއިން ތައްޔާރަށް އޮތްކަމަށް ވިދާޅުވެ ހުޅަނގަށް އިންޒާރުދެއްވާފައެވެ.

ޕުޓިންގެ މިވާހަކަފުޅާއެކު ރަޝިއާ އާއި ހުޅަނގުގެ މަސްރަހު މިވަނީ އިތުރަށް ހޫނުވެގެން ގޮސްފައެވެ. ރަޝިއާގެ ނިއުކްލިއަރ ހަތިޔާރު އެމެރިކާއަށްވުރެ ވެސް ގިނައެވެ.

ފެބްރުއަރީ 24 ވަނަ ދުވަހު އަސްކަރީ އޮޕަރޭޝަނެއްްގެ ނަމުގައި ޕުޓިންގެ އަމުރަށް ރަޝިއާގެ އަސްކަރިއްޔާއިން ޔޫކްރެއިނަށް އަރައި ދޭންފެށި ހަމަލާތަކާއެކު ފެށުނު ޔޫކްރެއިން ރަޝިއާ ހަނގުރާމައިގެ ސަބަބުން ރަޝިއާ އާއި ހުޅަނގުގެ ގައުމުތަކާ އޮތް ގުޅުން ވަނީ ހީނަރުވާން ފަށާފައެވެ. މިހަނގުރާމަ ހުއްޓުމަކަށް ނައިސް ދިގުދެމިގެން ގޮސްފައިވާއިރު، ޕުޓިންގެ އެންމެ ފަހުގެ މި އިންޒާރާއެކު މަސްރަހު މިވަނީ އިތުރަށް ގޯސްވެފައެވެ.

އެގޮތުން ރަޝިއާގެ މީޑިއާތައް މެދުވެރިކޮށް ދެއްކެވި ވާހަކުފުޅެއްގައި ޕުޓިން ވަނީ ގައުމަށް ނުރައްކާވާނަމަ، ގައުމާ ރައްޔިތުންގެ ދިފާއުގައި ކުރަންޖެހުނު ކޮންމެ ކަމެއްވެސް ކުރްއްވާނެ ކަމަށް ވިދާޅުވެފައެވެ. އަދި ގައުމާއި ރައްޔިތުންގެ ދިފާއުގައި ކޮންމެ ކަމެއް ކުރަންވެސް ތައްޔާރަށް އޮތް ކަމަށް ބުނާ ބުނުމަކީ ސަމާސާއަކަށް ބުނާ ބުނުމެއް ނޫންކަމަށްވެސް ޕުޓިން ވިދާޅުވިއެވެ.

ޕުޓިން ވަނީ ހުޅަނގުން ގުޅިގެން ރަޝިއާ ނައްތާލަން މަސައްކަތްކުރާކަމަށް ތުހުމަތުކުރައްވާފައެވެ. އަދި މިހާރު ޔޫކްރެއިންގައި ރަޝިއާއިން ކޮންޓްރޯލްކުރަމުންދާ ސަރަހައްދުތައް ރަޝިއާ އާ ގުޅެން ބޭނުންވޭތޯ ކަށަވަރުކުރުމަށް އެސަރަހައްދުތަކުގައި ރެފެރެންޑަމް ނުވަތަ ފެންނަ ނުފެންނަ ވޯޓެއް ބޭއްވުމަށް ތާއިދުކުރައްވާކަމަށް ވަނީ ވިދާޅުވެފައެވެ. ނަމަވެސް މިއީ ހުޅަގުންވެސް އަދި އެހެންގައުމު ތަކުންވެސް ގަބޫލު ކުރާނެ ކަމެއް ނޫނެވެ.

ޕުޓިން ވަނީ ދެވަނަ ބޮޑު ހަނގުރާމައަށްފަހު ފުރަތަމަ ފަހަރަށް ރަޝިއާއިން ހަނގުރާމައަށް އެގައުމުގެ އާންމުން އަސްކަރިއްޔާއަށް ގުޅުމަށް ގޮވާލައްވާފައެވެ. މިއާއެކު ރަޝިއާގެ ޑިފެންސް މިނިސްޓަރު ސަރްގެއި ޝޮއިގު ވަނީ ރައީސްގެ މިނިންމެވުމާއެކު 300،000އެއްހާ މީހުންނަށް ރަޝިއާ އަސްކަރިއްޔާއާއި ގުޅުމަށް އެންގޭނެ ކަމަށް ވިދާޅުވެފައެވެ.

ބައެއް ރިޕޯޓްއް ބުނާ ގޮތުން ރަޝިޔާ ސަރުކާރުން، ފައިސާގެ ބަދަލުތައް ދީގެން ޖަލު ތަކުންވެސް މީހުން ގެންދަނީ ރެކްރޫޓް ކުރަމުންނެވެ.