މައްސަރު ކަންތަކޭ ބުނުމުން އިޖުތިމާއީ ފޭރާން ވީދެންޖެހޭ ސަބަބެއް ނޭނގޭ

ފިރިހެނުންނާ އަންހެނުންނަކީ ހާސްތަން ތަފާތު ބައެކެވެ. ދެބައިމީހުންނަށް ކުރިމަތިލާންޖެހެނީވެސް ތަފާތު ކަންކަމާއެވެ. ފިރިހެނަކަށް ކުރިމަތިލާންޖެހޭ ކަމަކީ ކިހާ ބޮޑު ކަމެއްކަން އަންހެނަކަށް ނޭނގިދާނެއެވެ. ހަމަ މިފަދައިން އަންހެނަކަށް ކުރިމަތިލާންޖެހޭ ކަންކަމަކީ ކިހާ ވަރެއްގެ ކަމެއްކަން، އެކަންކަން ތަހައްމަލުކުރަން ނުޖެހޭ ފިރިހެނަކަށް ނޭނގިދާނެއެވެ. އަދި އަންހެނަކު ތަހައްމަލުކުރަމުންދަނީ ކިހާ ބޮޑު ކަމެއްކަން ހަމަ އެހެން އަންހެނަކަށް ނޭނގުންވެސް އެކަށީގެންވެއެވެ.

މިވާހަކަ މިގޮތަށް މި ފާހަގަކޮށްލީ ދާދި ފަހުން ރައްޔިތުންގެ މަޖިލީހުގައި އޮތް ކޮމިޓީއަކަށް އަންހެން ވަޒީރަކު ހާޒިރުވުން ލަސްވެ، ސަބަބެއްގެ ގޮތުގައި މައްސަރު ކަންތައް ލައިގަތީ ކަމަށްބުނުމުން، މިކަމަށް އާންމުންގެ ފާޑުކިޔުން ވަރަށް ބޮޑަށް އަމާޒުވަމުންދާތީއެވެ. ސޯޝަލް މީޑިއާއިން މިއަދު ފެންނަމުންދަނީ ބަލާލަން ފަސޭހަ ޕޯސްޓުތަކެއް ނޫނެވެ.

ހައިޟުގެ ދުވަސްވަރަކީ ހަމަ ކޮންމެ އަންހެނަކުވެސް ހަޔާތުގެ ވަކި ހިސާބަކުން ތަހައްމަލުކުރަންޖެހޭނެ ދުވަސްވަރެކެވެ. މިކަމަށް ދިވެހިން އާންމުކޮށް ކިޔައި އުޅެނީ މައްސަރު ކަންތަކެވެ. އެހެންނަމަވެސް އެ ވަޒީރު އެފަދައިން ވިދާޅުވުމުން އެއް ބަޔަކަށް އެ ބުނުން ވީ އިޖުތިމާއީ މިންގަނޑާއި، އަޚުލާގީ މިންގަނޑުން ބޭރު ބުނުމަކަށެވެ. އަދި އެއީ އިޖުތިމާއީ ފޭރާން ވީދި، މީހުންގެ ތެރޭގައި ދައްކަން ރަނގަޅު ވާހަކައެއް ކަމަކަށް ގަބޫލެއް ނުކުރެއެވެ. އަދި އެ ވަޒީރު އެހެން ވިދާޅުވުމުން މަލާމާތް ރައްދުކުރި މީހުންވެސް މަދެއް ނޫނެވެ. މިފަދައިން އަޑުއަހަން ދަތި އެތައް ވާހަކައެއް މިހާރު ދަނީ އިވި، ފެންނަމުންނެވެ.

ހިތާމައަކީ މި ހުރިހާ ކަމެއް މިއަދު ފެންނަމުންދަނީ ހަމައެކަނި ފިރިހެނުންގެ ފަރާތުން ކަމަށް ނުވާތީއެވެ. އަންހެނުންގެ ފަރާތުންވެސް މިފަދަ ދަށުދަރައިގެ އެތައް ކަމެއް ފެންނަމުންދެއެވެ. ހަމަގައިމުވެސް މިއީ ކިހާ ވޭންހުރި ކަމެއްކަން އަންހެނަކަށް ވިއްޔާ އެނގޭނެއެވެ. އެކި މީހުންގެ ގައިގައި އަޅާ ވޭން ތަފާތުވިޔަސް އަންހެނަކަށްވެހުރެ މިކަހަލަ ކަންކަމުގައި އަނެކާއަށް މަލާމަތްކުރުމަކީ ލަދުގަންނަންޖެހޭ ކަމެކެވެ.

މިކަން މަޖާ ކަމަކަށް ވާންވީ ކީއްވެގެން ހެއްޔެވެ؟ މިކަން އިޖުތިމާއީ މިންގަނޑުން ބޭރު ކަމަކަށް ވާންވީވެސް ކީއްވެގެން ހެއްޔެވެ؟ މިކަހަލަ ވާހަކަތަކީ މީހުންތަކުގެ ތެރޭގައި ދައްކަންވާނެ ވާހަކަތަކެއް ނޫން ކަމުގައި ކުޑައިރުއްސުރެ ވިސްނައިދީފައި އޮތުމުން ވާ ކަމަކަށް ފަހަރުގައި މިކަން ވެދާނެއެވެ. އަދި މިއީ ފަކުރު ވާހަކައެއްކަމަށް ވިސްނިފައި އޮތީ ކަމަށްވެސް ވެދާނެއެވެ.

ރާއްޖޭގެ މުޖުތަމައުގައި މިއީ "ސެންސަރު" ވާހަކަތަކަކަށް ވާތީ، ކޮމިޓީއަށް ހާޒިރުވުން ލަސްވި ސަބަބު ތެދު ތެދަށް ބުނުމަކީ އެ ވަޒީރަށްވެސް ފަސޭހަ ކަމަކަށް ނުވާނެއެވެ. މިއީ މިއަދު މިކަން އޮންނަންވީ ގޮތް ހެއްޔެވެ؟ އަހަރެން ގަބޫލުކުރާ ގޮތުގައި މި ވިސްނުން ބަދަލުވާން މިހާރު މާ ބޮޑަށްވެސް ލަސްވެއްޖެއެވެ. ޅައިރުއްސުރެއް ފެށިގެން މިކަންކަން އަންހެނުންނަށް ކުރިމަތިވާކަން ދަރިންނަށް ވިސްނައިދޭންޖެހެއެވެ. އެއީ އަންހެން އަދި ފިރިހެން ކުއްޖެއް ވިޔަސް މެއެވެ. އެހެންނޫނީ މިއީ ދުވަހަކުވެސް ހައްލެއް އަންނާނެ ކަމެއް ނޫނެވެ.