އިސްރަށްވެހިންނަށް ޚާއްސަ އިޖުތިމާއީ މަރުކަޒުތައް ގާއިމުކުރުން - ކުރީ ސަރުކާރުން ކުރަން ނިންމައި، އިއުލާންކޮށްފައި އޮތް ކަމެއް

އިސްރަށްވެހިންނަށް ޚާއްސަ އިޖުތިމާއީ މަރުކަޒުތައް ގާއިމްކުރުމަކީ ކުރީ ސަރުކާރުން ނިންމާފައި އޮތް ނިންމުމެކެވެ.

އިސްރަށްވެހިންނަށް ޚާއްސަ އިޖުތިމާއީ މަރުކަޒުތަކެއް ރާއްޖޭގެ އެކި ސަރަހައްދުތަކުގައި ގާއިމުކުރުމަށް ނިންމާފައިވާކަމަށް މި ސަރުކާރުން އިއުލާންކޮށްފައި ވަނީ ހޯމަ ދުވަހުއެވެ. ސަރުކާރުން ބުނީ، ކުރީގެ ކީރިތި ގުރުއާނާބެހޭ މަރުކަޒު، އިސްރަށްވެހިންނަށް ޚާއްސަ އިޖުތިމާއީ މަރުކަޒަކަށް ބަދަލުކުރަން ނިންމާފައިވާކަމަށެވެ. އަދި ރާއްޖޭގެ އެކި ސަރަހައްދުތަކުގައި އިސްރަށްވެހިންނަށް ޚާއްސަ އިޖުތިމާއީ މަރުކަޒުތައް ގާއިމްކުރާނެކަން ވަނީ ފާހަގަކޮށްފައެވެ. މިކަަން ސަރުކާރުން އިއުލާންކޮށްފައިވަނީ އަލަށް އިއުލާންކުރި ކަމެއްގެ ގޮތުގައެވެ. ސަބަބަކީ ކުރިން އެކަން ކޮށްފައިވާކަމަށް ސަރުކާރުން އެއްވެސް ވަރަކަށް ބުނެފައިނުވުމެވެ.

އެހެންނަމަވެސް، 16 ފެބުރުވަރީ 2023ގައި، އޭރުގެ ސަރުކާރުން ވަނީ އިސް ރަށްވެހިންގެ އިޖްތިމާއީ މަރުކަޒުތަކެއް މާލެއާއި ރާއްޖޭގެ އެކި ކަންކޮޅުތަކުގައި ގާއިމުކުރާނެކަމަށް އިއުލާންކޮށްފައެވެ. އިސް ރަށްވެހިން އެއްތަނަކުން ބައްދަލުވެ، އުފާވެރި ވަގުތުކޮޅެއް ހޭދަކޮށްލައި އުޅެވޭ މާހައުލެއް ގާއިމުކޮށްދިނުމުގެ ގޮތުން އިސް ރަށްވެހިންގެ އިޖްތިމާއީ މަރުކަޒުތަކެއް މާލެއާއި ރާއްޖޭގެ އެކި ކަންކޮޅުތަކުގައި ގާއިމުކޮށްދެއްވުމަށް ގަސްދުކުރައްވާކަމުގައި، ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެފައިވަނީ، ދިވެހި ދައުލަތަށް ޚިދުމަތްކުރުމުގެ އިނާމު ދިނުމުގެ ޖަލްސާގައެވެ. މިއީ 16 ފެބުރުވަރީ 2023ގައި އިއުލާންކޮށްފައިވާ ކަމަކަށް ވުމާއެކު، އެއީ ރިޔާސީ އިންތިޚާބާ ދިމާކޮށް ވީ ވައުދެއްނޫނެވެ. އެއަށްވުރެ ބޮޑަށް އެއީ ސަރުކާރުގައި ހުންނަވައިގެން، އޭރުގެ ރައީސްގެ އިސްނެންގެވުމާއެކު ނިންމަވާފައިވާ ކަމެކެވެ.

އިސް ރަށްވެހިންގެ އިޖްތިމާޢީ މަރުކަޒުތަކެއް މާލެއާ ރާއްޖޭގެ އެކި ކަންކޮޅުތަކުގައި ގާއިމުކޮށްދެއްވުމަށް ގެންގުޅުއްވާ ވިސްނުންފުޅު ހާމަކުރައްވައި ކުރީގެ ރައީސް ސާލިހު ވިދާޅުވީ، މާލޭގައި ގާއިމުކުރާ އެފަދަ މަރުކަޒު ގާއިމުކުރައްވާނީ ނާދީ ހުރި ބިމުގައިކަމަށެވެ. އެއީ ރައްޔިތުންގެ މަޖިލީހުގެ އިދާރާވެސް ހިންގި އިމާރާތެވެ. އެމަނިކުފާނު ވިދާޅުވީ، މާލޭގައި އެމަރުކަޒު ގާއިމުކުރެއްވުމަށްފަހު ރާއްޖޭގެ އެކިކަންކޮޅުތަކުގައި އެފަދަ މަރުކަޒުތައް ހުޅުއްވަން ގަސްދުކުރައްވާކަމުގައެވެ.

އެނގިފައިވާ ގޮތުން މި ދިޔަ ސަރުކާރު ނިމުނުއިރު، އިޖްތިމާއީ މަރުކަޒަކަށް ނާދީ ހެދުމުގެ މަސައްކަތް އޮތީ އެކަމުގެ އެންމެ ފަހުގެ މަރުހަލާގައެވެ. އެގޮތުން، ނުނިމި އޮތީ ޓައިލްސް ޖެހުން އެކަނި ކަމަށާއި، އެ މަސައްކަތް ނުނިމި އޮތީ އެ ތަނުގައި ޖަހާ ޓައިލްސް ގެނައުން ލަސްވުމުން ކަމަށް އެނގިފައިވެއެވެ. އަދި އެހެން ހުރިހާ މަސައްކަތެއް ވަނީ އެއްކޮށް ނިންމާފައި ކަމަށް ވަނީ މައުލޫމާތު ލިބިފައެވެ.

މީގެ އިތުރުން، މަރުކަޒުތަކެއް ގާއިމުކުރުމުގެ މަގުސަދުތަކަށް އަލިއަޅުވާލައްވަމުން ސާލިހު ވިދާޅުވީ، މީގެ ތެރެއިން އެއް މަގުސަދަކީ އިސް ރަށްވެހިންނަށް ދޭންޖެހޭ ހައްގު ގަދަރާއި އިހުތިރާމު ހޯދައިދިނުމަށް މަގުފަހިކުރުމާއި، އެކަންކަމަށް ބާރުއެޅުން ކަމަށެވެ. މީގެ އިތުރުން އިސް ރަށްވެހިންނަށް ބޭނުންވާ އިޖުތިމާއީ އެހީތެރިކަން ފޯރުކޮށްދިނުމާއި، މުޖުތަމައުގައި އިސްރަށްވެހިންގެ ހިއްސާ އިތުރުކޮށްދިނުމާއި އަދި ދުޅަހެޔޮ ދޮށީ އުމުރަކަށް ތައްޔާރުވުމަށް ކުރަންޖެހޭ އެންމެހާ މަސައްކަތްތައް ރާވައި ހިންގުންވެސް މި މަރުކަޒުތައް ގާއިމުކުރުމުގެ މަގުސަދުތަކުގެ ހިމެނޭކަން އެމަނިކުފާނު ފާހަގަކުރެއްވިއެވެ. އަދި އެ މަރުކަޒުތަކުގައި އިސްރަށްވެހިންނަށް އުފާވެރި ވަގުތުތަކެއް ހޭދަކުރުމުގެ ފުރުސަތު ލިބިގެންދިއުމަށް އުންމީދުކުރައްވާ ކަމުގައި ވިދާޅުވިއެވެ.

މިކަން މިގޮތަށް އޮތްއިރު، މި ސަރުކާރުން އިސްރަށްވެހިންގެ އިޖުތިމާއީ މަރުކަޒުތައް ގާއިމުކުރަން ނިންމީ، މި ސަރުކާރުގެ ސިޔާސަތުގެ ތެރެއިންކަން ފާހަގަކޮށް، ދައްކާފައިވާ ސަބަބުތަކަކީވެސް އޭރު ރައީސް ސާލިހު ފާހަގަކުރެއްވި ސަބަބުތައްކަން ފާހަގަކޮށްލެވެއެވެ. އެގޮތުން ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވީ، ރާއްޖޭގެ އާބާދީގެ ވަރަށް ބޮޑު ބަޔަކީ މިހާރު އިސްރަށްވެހިން ކަމަށާއި، ދައުލަތަށާއި ގައުމަށް ގިނަ ދުވަހު ޚިދުމަތްތަކެއް ކުރައްވާފައި ރިޓަޔަރ ކުރައްވާފައިވާ ބޭފުޅުން ގިނަކަމަށެވެ. އަދި އެބޭފުޅުންގެ ނަފްސާނީ ޖިސްމާނީ ދުޅަހެޔޮކަމަށް އެހީތެރިކަން ހޯދައިދިނުމަކީ މިސަރުކާރުގެ ވަރަށް ބޮޑު ސިޔާސަތެއް ކަމަށް ނާޒިމް ވިދާޅުވިއެވެ. އެއާއެކު ބަދަލުވީ، މާލޭގައި އިސްރަށްވެހިންނަށް އިޖުތިމާއީ މަރުކަޒު ގާއިމްކޮށްދޭތަނެވެ. ސިޔާސަތާއި ސަބަބުތަކާއި މަގުސަދަށްވެސް ބަދަލެއް ގެނެސްފައެއް ނުވެއެވެ.

އެހެންކަމުން ސަރުކާރުން ހާމަކުރި މި ސިޔާސަތަކީ ކުރީ ސަރުކާރުން ނިންމާފައިވާ ކަމެކެވެ. އަދި އެކަން ތަންފީޒުކުރާނެ ގޮތުގެ ބައެއް ތަފްސީލުތައްވެސް ހާމަކުރައްވާފައި ވާކަމެކެވެ. އަދި ރަށްރަށުގައި އިޖުތިމާއީ މަރުކަޒުތައް ގާއިމުކުރަމުން އައިއިރު، 2023 ވަނަ އަހަރު ނިންމާފައިވާ އިޖުތިމާއީ މަރުކަޒުތަކުގައި އިސްރަށްވެހިންނަށް ޚާއްސަ އިންތިޒާމްތައް ހަމަޖައްސައިދީފައިވެއެވެ.