ފުލުހުންނަށް އިންޒާރުދިން މީހާ ދޫކޮށްލީ ކޯޓު އަމުރު ނެތި ހައްޔަރުކުރުމުން
20 ސެޕްޓެމްބަރު 2022 | އަންގާރަ 08:0831 އަހަރުގެ ފިރިހެނަކު ހައްޔަރުކުރީ އިންޒާރު ދިނުމާއި ބިރުދެއްކުމުގެ ތުހުމަތުގައި
ކްރިމިނަލް ކޯޓް
ފުލުހުންނަށް އިންޒާރު ދިން މީހާ ކޯޓު އަމުރު ނެތި ހައްޔަރު ކުރުމުން އޭނާ ދޫކޮށްލައިފިއެވެ.
މި މައްސަލައިގައި އުމުރުން 31 އަހަރުގެ ފިރިހެނަކު ހައްޔަރުކުރީ އިންޒާރު ދިނުމާއި ބިރުދެއްކުމުގެ ތުހުމަތުގައެވެ. އެހެންނަމަވެސް އޭނާ ޝަރުތެއް ނެތި ބަންދުން ދޫކޮށްލުމަށް 19 ސެޕްޓެމްބަރުގައި ކްރިމިނަލް ކޯޓުން ވަނީ އަމުރުކޮށްފައެވެ.
ކްރިމިނަލް ކޯޓުގައި މި އަމުރު ނެރުއްވީ އެ ކޯޓުގެ އިސްގާޒީ އަހުމަދު ޝަކީލެވެ.
އިސްގާޒީ ނެރުއްވި އަމުރުގައި ވިދާޅުވީ، އޭނާ ހައްޔަރު ކޮށްފައިވަނީ ކުށުގެ ވެށިން ނޫން ކަމަށާއި، ހައްޔަރު ކޮށްފައިވަނީ ކޯޓު އަމުރެއް ނެތި ކަމަށެވެ. އެގޮތުން އޭނާ ހައްޔަރު ކޮށްފައިވަނީ އިޖުރާއަތާއި އެއްގޮތަށްކަމަށް ކަނޑައެޅެން ނެތްކަމަށް ގާޒީ ވިދާޅުވިއެވެ.
މި މައްސަލައާ ގުޅޭގޮތުން އޭރު ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓުވީޓެއްގައި ވިދާޅުވީ، ގްރޫޕު ހަދައިގެން ރާވައިގެން މާފަންނަށް ނިސްބަތްވާ މީހަކު ވައްކަމުގެ ތުހުމަތަށް ހައްޔަރު ކުރުމުން އެގްރޫޕަށް ނިސްބަތްވާ މީހަކު މާފަންނު ސްޓޭޝަނަށް ވަދެފައިވާ ކަމަށެވެ.
އަދި ކޮންސްޓަބަލްއަކަށް މަރުގެ އިންޒާރު ދީފައިވާ ކަމަށާއި އެ މައްސަލައިގައި އެ މީހާ ވެސް މިހާރު ހައްޔަރު ކޮށްފައިވާ ކަމަށެވެ.
އޭނާ ހައްޔަރު ކުރުމުން އޭނާ ނިސްބަތްވާ ގްރޫޕުގެ މީހުން މާފަންނު ޕޮލިސް ސްޓޭޝަން ދޮށަށް އެއްވިކަން ފާހަގަކުރައްވައި ކޮމިޝަނަރު ވިދާޅުވީ އެ މީހުންނާމެދު ވެސް ފިޔަވަޅު އަޅުއްވާނެ ކަމަށެވެ. އަދި ކުށްކުރުމާއި އާންމު އިޖުތިމާއީ މިންގަނޑުތަކާއި ހިލާފު އަމަލުތައް ހިންގާ އަދި ރައްޔިތުންގެ ހިތްތަކަށް ބިރުވެރިކަން ވަންނަ ގޮތަށް ހަރަކާތްތެރިވާ ގުރޫޕުތަކާ ދެކޮޅަށް ފިޔަވަޅު އަޅުއްވާނެ ކަމަށް ވެސް ކޮމިޝަނަރު ވިދާޅުވިއެވެ.
މި މައްސަލައިގައި ހައްޔަރުކުރި 21 އަހަރުގެ ޒުވާނަކު 10 ދުވަހަށް ބަންދުގައި ބެހެއްޓުމަށްވެސް ގާޒީ އަމުރު ނެރުއްވާފައިވެއެވެ.
ގްރޫޕަކަށް ނިސްބަތްވާ މީހަކު ފުލުހަކަށް މަރުގެ އިންޒާރު ދީފައިވާއިރު މި މަހުގެ 9 ވަނަ ދުވަހު ހެންވޭރަށް ނިސްބަތްވާ ގްރޫޕަކުން ވަނީ 3 ފުލުހަކަށް ހަމަލާ ދީފައެވެ. ފުލުހުންނަށް ދޭ މިފަދަ ހަމަލާތައް ސީރިއަސް މައްސަލަތަކުގެ ގޮތުގައި ބަލާނެ ކަމަށް ކޮމިޝަނަރު ވަނީ ވިދާޅުވެފައެވެ.
މި މަހުގެ 9 ވަނަ ދުވަހު ހަމަލާ ދީފައިވަނީ ޑްރަގް އެންފޯސްމެންޓް ޑިޕާޓްމެންޓް (ޑީއީޑީ) ގެ ތިން ފުލުހަކަށެވެ. އެ ހަމަލާ ދީފައިވަނީ އެ ފުލުހުން ހިންގި ޑްރަގް އޮޕަރޭޝަނަކާ ގުޅިގެންނެވެ.
