އިންޓަރނޭޝަނަލް އެސޯސިއޭޝަން އޮފް ޕަރމަނަންޓް ރެޕްރެޒެންޓޭޓިވްސް ޓު ދަ ޔުނައިޓެޑް ނޭޝަންސް (އައިއޭޕީއާރް)ގެ އޮނަރަރީ މެމްބަރޝިޕްކަން ނުވަތަ ރަމްޒީ މެމްބަރެއްގެ މަގާމު، ފޮރިން މިނިސްޓަރ އަބްދުﷲ ޝާހިދުއަށް އަރުވައިފިއެވެ.

މިނިސްޓަރ ޝާހިދު ކުރެއްވި ޓްވީޓެއްގައި އެމަނިކުފާނު ވަނީ މިއީ އެމަނިކުފާނަށް ލިބިވަޑައިގަތް ފަޚުރެއްކަމަށް ވިދާޅުވެފައެވެ. އަދި ފުރަތަމަ ދުވަހުން ފެށިގެން އައިއޭޕީއާރްގެ އާއިލާ މެމްބަރެއްގެގޮތުގައި އެމަނިކުފާނަށް އިހުސާސްކޮށްދެއްވީތީ އެ އެސޯސިއޭޝަންގެ އެމްބެސެޑަރުންނަށް ޝާހިދު ވަނީ ޝުކުރު އަދާކުރައްވާފައެވެ.

އައިއޭޕީއާރް ވުޖޫދަށް އައިސްފައިވަނީ 1988 ވަނަ އަހަރު ނިއުޔޯރކްގައެވެ. އެ އެސޯސިއޭޝަންގައި ދާއިމީ ރެޕްޒެޓެންޓިވުންގެ ގޮތުގައި އޭރު 13 ގައުމުގެ ރެޕްރެޒެންޓޭޓިވުން ތިއްބެވިއެވެ. އެ ގައުމުތަކަކީ; އާޖެންޓީނާ، ފްރާންސް، ބަހާމާސް، ޗައިނާ، ހަންގޭރީ، މެލޭޝިއާ، އިންޑިއާ، ނޯރވޭ، ސެނެގަލް، ޓިއުނީޝިއާ، ވެނެޒުއެލާ، ޒެމްބިއާ އަދި ސައޫދީ އަރަބިއްޔާއެވެ. މި އެސޯސިއޭޝަންގެ މަގުސަދަކީ ޔުނައިޓެޑް ނޭޝަންސްގެ މެމްބަރު ގައުމުތަކުގެ މެދުގައި ބައިނަލްއަގުވާމީ މައްސަލަތަކާއި ކަންކަމާމެދު މަޝްވަރާކުރެވޭނެ މާހައުލެއް ހޯދައިދިނުމެވެ. އަދި ގައުމުތަކުގެ މެދުގައި އޮންނަ މުއާމަލާތުކުރުން އިތުރުކޮށް، ގުޅުން ބަދަހިކުރުމަށްވެސް މި އެސޯސިއޭޝަން މެދުވެރިއަކަށް ވެއެވެ.