ޕްރައިވެޓް ސެކްޓަރ އަކީ މިސަރުކާރުން ގަބޫލުކުރާ ސެކްޓަރ އެއް ނޫން: އަބްދުﷲ ޝާހިދު
ޕްރައިވެޓް ސެކްޓަރގެ ދާއިރާތައް ފުނޑުފުނޑުކޮށްލައި، ސަރުކާރުގެ އަތްދަށަށް ގެންދިއުމަށް މަސައްކަތް ކުރަމުންދާ ކަމަށް ޝާހިދު ވިދާޅުވި
އެމްޑީޕީގެ ރައީސް އަބްދުﷲ ޝާހިދު
އަމިއްލަ ވިޔަފާރި ނުވަތަ ޕްރައިވެޓް ސެކްޓަރ އަކީ މިސަރުކާރުން ގަބޫލުކުރާ ސެކްޓަރ އެއް ނޫންކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަފުޅު ދައްކަވަމުން، ޕްރައިވެޓް ސެކްޓަރުން ކުރަމުންދާ ހުރިހާ މަސައްކަތްތަކެއްގެ ތެރެއަށް މިސަރުކާރުން އިންތިހާއަށް ވަދެގަންނަމުންދާކަމަށް ޝާހިދު ފާހަގަކުރެއްވިއެވެ. އައިނު ހެއްދުމާއި ގާއެޅުން ފަދަ ކަންކަން ސަރުކާރުން ކުރަމުންދާއިރު، މިހާރު ޓެކްސީ ދުއްވުމުގެ ދާއިރާއަށްވެސް ސަރުކާރުން ވަންނަން ނިންމާފައިވާކަމަށް ޝާހިދު ފާހަގަކުރެއްވިއެވެ. އާންމު ރައްޔިތުން ޝަރަފްވެރިކަމާއެކު އާމްދަނީ ހޯދުމަށް ކުރަމުންދާ ކޮންމެ މަސައްކަތަކަށް ސަރުކާރުން ވަދެ، އެދާއިރާތައް ފުނޑުފުނޑުކޮށްލައި، ސަރުކާރުގެ އަތްދަށަށް ގެންދިއުމަށް މަސައްކަތް ކުރަމުންދާކަމަށް އެމަނިކުފާނު ވިދާޅުވިއެވެ.
ކުރީގެ ސަރުކާރުތަކުގައި ތަރައްގީގެ މަޝްރޫއުތައް ޕްރައިވެޓް ސެކްޓަރާ ހަވާލުކޮށްގެން ކުރިއަށް ގެންދިއުމުން، އެދާއިރާގެ ވިޔަފާރިތަކަށް އާމްދަނީ ލިބި، ވަޒީފާގެ ފުރުސަތުތައް އިތުރުވެގެންދިޔަ ކަމަށް ޝާހިދު ފާހަގަކުރެއްވިއެވެ. އޭގެ ސަބަބުން ޝަރަފްވެރިކަމާއެކީގަ ބުރަ މަސައްކަތް ކޮށްގެން އާމްދަނީ ހޯދުމުގެ ފުރުސަތު ފަހުރުވެރި ދިވެހި ރައްޔިތުމިހާ އަށް ލިބިގެންދިޔަކަމަށް ޝާހިދު ފާހަގަކުރެއްވިއެވެ. ނަމަވެސް މިހާރު ފެންނަމުންދަނީ ކޮންސްޓްރަކްޝަން ދާއިރާގެ ޕްރައިވެޓް ސެކްޓަރ އެއްކޮށް ފުނޑިގެންދާ މަންޒަރުކަމަށް ޝާހިދު ވިދާޅުވިއެވެ.
މިހާރު ފެންނަނީ އެެއްވެސް މަސައްކަތެއް ޕްރައިވެޓް ސެކްޓަރ އަކަށް ނެތި، ކޮންސްޓްރަކްޝަންގެ ޕްރައިވެޓް ސެކްޓާ އެއްކޮށް ފުނޑެމުންދާތަން. ޖިމެއް ހަދަންވިއްޔާ ހަވާލުކުރަނީ އެމްއޭސީއެލް އަށް، ހޮސްޕިޓަލެއް އަޅަން ވިއްޔާ ސަރުކާރުގެ މަގުހަދާ ކުންފުންޏަށް، ގެސްޓްހައުސްއެއް ހަދަން ވިއްޔާ ހައްޖު ކޯޕަރޭޝަނާ، މިހެންގޮސް ރައީސް މުޙައްމަދު މުޢިއްޒުގެ ސަރުކާރުން މުޅި ނިޒާމު ފުނޑުފުނޑުކޮށްލައިފިއެމްޑީޕީގެ ރައީސް އަބްދުﷲ ޝާހިދު
ބުރާސްފަތި ދުވަހުގެ ރޭ ރައީސް މުޢިއްޒު ވަނީ، ސަރުކާރުން އާންމު ރައްޔިތުންގެ ކުންފުނިތަކަށް ދޭންޖެހޭ ފައިސާ 5 މަސްދުވަހުގެ ތެރޭގައި ދޫކުރައްވާނެކަމަށް އިޢުލާންކުރައްވާފައެވެ. މިކަމާ ގުޅޭގޮތުން ވާހަކަދައްކަވަމުން ޝާހިދު ވިދާޅުވީ، ރައީސް މުޢިއްޒު މިހާތަނަށް 4 ފަހަރެއްގެ މަތިން މިފައިސާ ދެއްވާނެކަމަށް ވިދާޅުވެފައިވާކަމަށެވެ. އެންމެ ފަހުން ނޮވެންބަރު މަހުގައިވެސް 7 މަސްދުވަހުގެ ތެރޭގައި މިފައިސާ ދޫކުރައްވާނެ ކަމަށް ވިދާޅުވެ އިތުރުފުޅު ހައްދަވާފައިވާކަން ޝާހިދު ފާހަގަކުރެއްވިއެވެ.
ރައީސް މުއިއްޒުގެ ސަރުކާރުގެ ދޮގުހެދުމާ އޮޅުވާލުމުގެ ސަބަބަން ރައްޔިތުން ތިބީ މިހާރު ގޮތް ހުސްވެފައިކަމަށް ގިނަބަޔަކު ސިފަކުރެއެވެ. ސަރުކާރު ޖަވާބުދާރީ ކުރުވުމަށްޓަކައި އެމްޑީޕީން ހުކުރު ދުވަހުގެ ރޭ މާލޭގައި ބާއްވާ ބޮޑު އެއްވުމަށް އެމްޑީޕީގެ ރައީސް ވަނީ އެންމެހާ ދިވެހި ރައްޔިތުންނަށް ދަޢުވަތު އަރުވާފައެވެ. މި އެއްވުން ފެށިގެންދާނީ ހުކުރު ދުވަހުގެ ރޭ 8:30 ގައި އާޓިފިޝަލް ބީޗުގައެވެ.
