ރާއްޖޭގެ ޑިމޮކްރަސީގެ އިރު އޮއްސިފައިވާ ކަމަށާއި، މިފެންނަނީ މި ސަރުކާރު ބަލިވަމުންދާ މަންޒަރު ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

20 ނޮވެންބަރު 2024 ގައި ރައްޔިތުންގެ މަޖިލީހުން ގާނޫނު އަސާސީއަށް ބޮޑެތި ބަދަލުތަކެއް ކުއްލި ގޮތަކަށް ގެނައުމާއި ގުޅިގެން ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ޝާހިދު ވިދާޅުވީ ރާއްޖޭގައި މިހާރު ޖެހެމުންދަނީ ބިރުވެރިކަމުގެ ރަގަނބީލެއް ކަމަށާއި، އެކަމަށް ރައްޔިތުން ސަމާލުވާންޖެހޭ ކަމަށެވެ.

ބުދަ ދުވަހުގެ މަޖިލީހުގެ މަސައްކަތްތަކަށް އިޝާރާތް ކުރައްވައި ޝާހިދު ވިދާޅުވީ ގާނޫނު އަސާސީއަށް ކުއްލި ބޮޑެތި ބަދަލުތަކެއް ގެނައީ އެއްވެސް ވަަރަކަށް މަޝްވަރާ ކުރުމެއްނެތި ކަމާށާއި، ރައްޔިތުންގެ ހިޔާލެއް ނެތި ކަމަށެވެ. އެއީ ޑިމޮކްރަސީ އުސޫލުން ކަންކަން ކުރެވޭނެ ގޮތެއް ނޫން ކަމަށް ޝާހިދު ވިދާޅުވިއެވެ. އަދި ވިދާޅުވީ ރައީސް މުއިއްޒު މަޖިލިސް ކޮންޓްރޯލްކޮށް، ބޭނުންފުޅުވާ ކޮންމެ ކަމެއް ކޮންމެ ގޮތަކަށް ކުރެވޭނެކަން އަންގައިދީފައިވާ ކަމަށެވެ.

ޝާހިދު ވިދާޅުވީ 2008 ވަނަ އަހަރު ބަލައިގަތް ގާނޫނު އަސާސީގެ މުޅި މަފްހޫމަކީ ރައްޔިތުންނާ މަޝްވަރާކޮށްގެން ކަންކަން ނިންމުން ކަމަށާއި، 2009 ވަނަ އަހަރުން ފެށިގެން މަޖިލިސް ހިންގާފައިވަނީ އެގޮތަށް ކަމަށެވެ. އަދި އޭރުން ފެށިގެން ރައްޔިތުންގެ މަޖިލީހަށް ހުށަހެޅޭ ކޮންމެ ބިލެއް ވެސް ރައްޔިތުންގެ ހިޔާލަށް ފުރުސަތުދޭ ކަމަށް ޝާހިދު ވިދާޅުވިއެވެ. ނަމަވެސް 20 ވަނަ މަޖިލީހުގައި އެކަން ނިމުމަކަށް ގެނެސްފައިވާކަން ޝާހިދު ފާހަގަކުރެއްވިއެވެ.

ޝާހިދު ވިދާޅުވީ މިހިސާބަށް ރާއްޖޭގެ ކަންކަން ދިއުމުން ރައްޔިތުން މަޑުން ނުތިބޭނެ ކަމަށާއި، މަޑުން ތިބޭނެ ކަމަށް އުންމީދު ކުރުމަކީ ގޯހެއް ކަމަށެވެ. ރައްޔިތުން މިގޮތަށް ކުރާ ކަންތައްތައް ގަބޫލު ނުކުރާނެ ކަމަށް ޝާހިދު ވިދާޅުވިއެވެ. ރައްޔިތުން އުންމީދުގައި ތިބެންޖެހޭކަން ފާހަގަކުރައްވައި ޝާހިދު ވިދާޅުވީ ޑިމޮކްރަސީއަށް އަންނަ ލޮޅުންތަކާއި، ގޮންޖެހުންތަކަށް އަރައިގަތުމަށް ފުރިހަމަ ވަރުގަދަ އުންމީދާއެކު ނުކުންނާނެ ކަމަށެވެ.