ހޯމަ ދުވަހު އޮންނަ ރާނީގެ ޖަނާޒާގައި ގައުމުތަކުގެ ލީޑަރުންނާއި އިސްވެރިންގެ އެތައް ސަތޭކަ ބަޔަކު ބައިވެރިވާނެ

ރާނީ އެލިޒަބަތް 2ގެ ޖަނާޒާ އަށް ގައުމުތަކުގެ ލީޑަރުންނާއި އިސް ވެރިން ހިމެނޭހެން އެތައް ސަތޭކަ ބޭފުޅުން ބައިވެރިވެ ވަދައިގަންނަވާނެ ކަމަށާ، މިއީ ފާއިތުވި އަހަރުތަކުގައިވެސް އެންމެ ގިނަ ޑިޕްލޮމެޓުން ބައިވެރިވާ އިވެންޓަށް ވާނެ ކަމަށް މީޑިއާ ރިޕޯޓްތައް ބުނެފިއެވެ.

ރާނީގެ ޖަނާޒާ ބާއްވަން ހަމަޖެހިފައި ވަނީ ހޯމަ ދުވަހުއެވެ. މި ޖަނާޒާ ބޭއްވުމަށް ހަމަޖެހިފައިވާ ތަނަކީ 2000 މީހުންގެ ޖާގައިގެ ތަނެކެވެ. އެހެންކަމުން ގައުމުތަކަށް ދައުވަތު ދިން އިރު އިނގިރޭސިވިލާތުން ދައުވަތު ދީފައި ވަނީ ގައުމުތަކުގެ ލީޑަރުންނަށް އެކަންޏެވެ. އަދި ސިޔާސީ ސަބަބުތަކަށްޓަކާ ބައެއް ގައުމުތަކުގެ ވެރިންނަށް ދައުވަތު ނުދިނުމަށް ވެސް އެ ގައުމުން ވަނީ ނިންމާފައެވެ.

ރާނީގެ ޖަނާޒާ އަށް ޔޫރަޕް، ޖަޕާން، ހޮލަންޑް، ޑެންމާކް، ސްޕެއިންގެ ޝާހީ އާއިލާތަކަށް ވަނީ ދައުވަތު އަރުވާފައެވެ. އަދި އެމެރިކާ، ފްރާންސް، ތުރުކީ، އިޓަލީ، އޮސްޓްރޭލިއާ، ސައުތް އެފްރިކާ އަދި ބަންގްލަދޭޝް އާއި ލަންކާ ފަދަ އޭޝިއާ ބައްރުގެ ގައުމުތަކުގެ ވެރިން ވެސް މި ރަސްމިއްޔާތުގައި ބައިވެރިވެވަޑައިގަންނަވާނެއެވެ. ރާނީގެ ޖަނާޒާއަށް ދައުވަތު ނުދޭ މަދު ގައުމުތަކުގެ ތެރޭގައި ރަޝިއާ އާާއި ބެލަރުސް ހިމެނެއެވެ.