އަވަހާރަވެފައިވާ އިނގިރޭސި ރާނީ އެލިޒަބެތު ދޭއްގެ ހަށިކޮޅު ފަސްދާނުލައިފިއެވެ.
ރާނީގެ ހަށިކޮޅު ފަސްދާނުލާފައިވަނީ އެކަމަނާގެ މަންމާފުޅާއި ބައްޕާފުޅު ފަސްދާނުލާފައިވާ ފައްޅީގައެވެ. ރާނީ ފަސްދާނުލާފައިވަނީ ޝާހީ އާއިލާގެ ބޭފުޅުން އެކަނި ހާޒިރުވެ ތިއްބެވި ކުޑަ ރަސްމިއްޔާތެއް ބޭއްވެވުމަށް ފަހުގައެވެ.
ސެޕްޓެމްބަރު މަހުގެ 08 ވަނަ ދުވަހު އަވަހާރަވި އިނގިރޭސި ރާނީގެ ޖަނާޒާގެ ކަންތައްތައް ފަށާފައިވަނީ ވަނީ ހޯމަ ދުވަހު ހެނދުނުއެވެ. އެކަމަނާގެ ޖަނާޒާގެ ކަންތައްތައް ވެސްޓްމިންސްޓަރ އެބީ އިން ފަށާފައިވާއިރު، މިޖަނާޒާގައި ދުނިޔޭގެ އެކި ކަންކޮޅުތަކުގެ ފައްސަތޭކަ އެއްހާ ވެރިން ވަނީ ބައިވެރިވެވަޑައިގެންފައެވެ.
ރާނީގެ ހަށިކޮޅު ފަސްދާނުލުމުގެ ކުރިން އެކަމަނާގެ ހަށިކޮޅު ވިންސޯރ ގަނޑުވަރުގެ ރޯޔަލް ވޯލްޓަށް ތިރިކޮށްފައިވެއެވެ. އަދި އެކަމަނާގެ ސަންދޯކުގެ މަތީގައި އަޅާފައި އޮތް އިނގިރޭސި ޝާހީ ދިދަ އާއި ތާޖުވެސް ނަގާފައިވެއެވެ.
ރާނީގެ ފިރިކަލުން ޕްރިންސް ފިލިޕް އަވަހާރަވެފައިވަނީ އުމުރުފުޅުން 99 އަހަރުފުޅުގައި 2021 ވަނަ އަހަރުގެ އެޕްރީލް މަހުގައެވެ. ރާނީ އެލިޒަބެތު އަވަހާރަވިއިރު އެކަމަނާގެ އުމުރުފުޅަކީ 96 އަހަރުފުޅެވެ. އެކަމަނާ ވަނީ އިނގިރޭސިވިލާތުގެ ރަނިކަން 70 އަހަރު ކުރައްވާފައެވެ.
