ރާނީގެ ޖަނާޒާގައި ބައިވެރިވެވަޑައިގެންނެވުމަށް ޖޯ ބައިޑަން ލަންޑަންއަށް ވަޑައިގެންފި
18 ސެޕްޓެމްބަރު 2022 | އާދީއްތަ 07:43ރާނީގެ ޖަނާޒާގައި ދުނިޔޭގެ ފައްސަތޭކައެއްހާ ވެރިން ބައިވެރިވެ ވަޑައިގަންނަވާނެ
އެމެރިކާގެ ރައީސް ޖޯ ބައިޑަން އާއި އަނބިކަނބަލުން ލަންޑަންއަށް ވަޑައިގަތުން
އިނގިރޭސި ރާނީ އެލިޒަބަތު ދޭއްގެ ޖަނާޒާގައި ބައިވެރިވެ ވަޑައިގެންނެވުމަށް އެމެރިކާގެ ރައީސް ހިމެނޭގޮތަށް ދުނިޔޭގެ ލީޑަރުން ލަންޑަންއަށް ވަޑައިގަންނަވަމުން އެބަގެންދަވައެވެ. ބައިޑަން އާދީއްތަ ދުވަހު ލަންޑަނަށް ވަޑައިގެންފައިވާއިރު ރާނީގެ ޖަނާޒާގައި 500 އެއްހާ ހެޑް އޮފް ސްޓޭޓުން ބައިވެރިވެ ވަޑައިގަންނަވާނެއެވެ.
މިހާތަނަށް އިނގިރޭސި ވިލާތަށް ވަޑައިގެންފައިވާ ބޭފުޅުންގެ ތެރޭގައި ކެނެޑާގެ ބޮޑުވަޒީރު ޖަސްޓިން ޓްރޫޑޯ އާއި ނިއުޒިލަންޑްގެ ބޮޑުވަޒީރު ޖެސިންދާ އާޑަން ހިމެނިވަޑައިގަންނަވައެވެ. ޖަނާޒާގައި ބައިވެރިވެ ވަޑައިގަންނަވާ އެހެން ކޮމަންވެލްތު ލީޑަރުންގެ ތެރޭގައި ރާއްޖޭގެ ރައީސް އިބްރާހިމް މުހައްމަދު ސާލިހު، ބަންގްލަދޭޝްގެ ބޮޑުވަޒީރު ޝެއިޚް ހަސީނާ ސްރީލަންކާގެ ރައީސް ރަނިލް ވިކްރަމަސިންގހާ ހިމެނި ވަޑައިގަންނަވައެވެ. މި ޖަނާޒާގައި އިންޑިޔާ ތަމްސީލް ކުރައްވާނީ ރައީސާ މުރުމޫއެވެ.
ޔޫރަޕުން ބައިވެރިވެ ވަޑައިގަންނަވާ ބޭފުޅުންގެ ތެރޭގައި ފަރަންސޭސި ރައީސް އިމެނުއަލް މެކްރޯން އާއި ޖަރުމަނުގެ ރައީސް ފްރޭންކް ވޯލްޓަރ ސްޓައިންމަޔަރ އާއި އިޓަލީގެ ރައީސް ސަރޖިއޯ މަޓަރެއްލާ ހިމެނި ވަޑައިގަންނަވައެވެ.
ޖަނާޒާގެ ތެރެއިން ބޭއްވޭ އެންމެ ޚާއްސަ އެއް ހަރަކާތަށް ވާނީ އިއްޒަތްތެރިންގެ ޝަރަފުގައި ޗާލްސް ރަސްގެފާނު އާދީއްދަ ދުވަހު ބާއްވަވާ ޚާއްސަ ރިސެޕްޝަނެވެ. މިކަން ވެގެން ދާނީ ލީޑަރުންނަށް ސީދާ އެހެން ވެރިންނާ ބައްދަލުކުރައްވާ ޑިޕްލޮމަސީއަށް ލިބިވަޑައިގަންނަވާ އިތުރު ފުރުސަތަކަށެވެ.
ރާނީގެ ޖަނާޒާއަށް ރަޝިޔާ، މިޔަންމާ، ސީރިޔާ، އަފްޢާނިސްތާން، ވެނެޒުއެލާ އަދި ބެލަރުސް އަށް ދައުވަތު ދެއްވާފައެއް ނުވެއެވެ.
ނަމަވެސް އީރާން، އުތުރު ކޮރެޔާ އަދި ނިކަރާގުއާއަށް ދައުވަތު ދެއްވާފައިވަނީ ހަމަ އެކަނި އެމްބެސެޑަރުން ފޮނުއްވުމަށެވެ.
