ދުނިޔޭގެ ވެރިން މި ހަފްތާ އަލިއަޅުވާލަނީ ރަޝިއާ-ޔޫކްރެއިން ހަނގުރާމައަށް
ހަނގުރާމަ ކުރިއަށްދާތާ 7 މަސް ވަނީ ފާއިތުވެފައި
އދ. ގެ މައި އޮފީސް ކައިރީގައި އާންމުންގެ ބަޔަކު ނުކުމެ ޔޫކްރެއިނަށް ހިތްވަރުދެނީ
މި ހަފްތާ ތެރޭގައި ދުނިޔޭގެ ގައުމުތަކުގެ ވެރިން އދ. ގައި ބާއްވާ ބައްދަލުވުމުގައި މަޝަވްރާކުރާނީ ރަޝިއާއާއި ޔޫކްރެއިނާ ދެމެދު ކުރިއަށްދާ ހަނގުރާމައާއި، ކާނާގެ ކާރިސާއާ ގުޅޭގޮތުންކަން ހާމަވެއްޖެއެވެ.
ދުނިޔޭގެ 193 ގައުމެއްގެ ވެރިން މި ބައްދަލުވުމުގައި ބައިވެރިވާނެއެވެ. ރޮއިޓަރސްގައި ރިޕޯޓުކޮށްފައިވާގޮތުން މި ބައްދަލުވުމާ ގުޅޭގޮތުން އދ. ގެ ސެކެޓްރީ ޖެނެރަލް އެންޓޯނިއޯ ގުޓަރޭސް ވިދާޅުވީ ހަނގުރާމައާ ގުޅޭގޮތުން މަޝްވަރާކުރިނަމަވެސް ސުލްހަ ގާއިމްކުރުމުގެ ފުރުސަތު ކުޑަ ކަމަށެވެ.
ރަޝިއާ އަދި ޔޫކްރެއިނާ ދެމެދު ކުރިއަށްދާ ހަނގުރާމައަށް 7 މަސް ވެފައިވާއިރު، ހަނގުރާމައިގެ ސަބަބުން އިތުރު އެހެނިހެން ކަންކަމާ ވެސް ޤައުމުތަކުން ދަނީ ކުރިމަތިލަމުންނެވެ. އެމެރިކާއިން އދ. އަށް ކަނޑައަޅުއްވާފައި ހުންނަވާ ސަފީރު ލިންޑާ ތޯމަސް ގްރީންފީލްޑް ވިދާޅުވީ އދ. އިން ދުނިޔޭގެ އެހެން ކަންކޮޅުތަކުގައި ހިނގަމުންދާ ކަންކަމަށް ސަމާލުކަން ނުދޭކަމުގެ ކަންބޮޑުވުން ދުނިޔޭގެ އެހެން ގައުމުތަކުން ފާޅުކުރަމުންދާކަމަށެވެ.
ދުނިޔޭގައި ގޮވާމުގެ ބާވަތްތައް އެންމެ ގިނައިން އުފައްދާ ގައުމުތަކުގެ ތެރޭގައި ރަޝިއާއާއި ޔޫކްރެއިން ހިމެނޭއިރު، މި ގައުމުތަކުން ގޮވާން އެކްސްޕޯޓްކުރުން ހުއްޓާލުމާއެކު ގިނަ ގައުމުތަކަކަށް އޭގެ އަސަރު ދަނީ ކުރަމުންނެވެ.
